檬檬樣

檬檬 : 媽咪，我返工喇！

雖然媽咪成日都比我啲靚仔樣大家睇但係其實我都

有好多古怪樣架!!

右下:滿懷心事look..

好鍾意呢張~

奶媽分享

有blogger問我: 其實餵人奶你有無甚麼可以share???其實我唔係十分成功，不如我就做反面教材啦!
(以下純個人感受，如有不正確請見諒)我覺得餵人奶最緊要係堅持，同得到屋企人支持，
佢地都要明白人奶係咩一回事，例如人奶會容易消化啲，
所以bb會容易啲肚餓，
並唔係話媽媽夠唔夠奶。媽媽心理會好過啲
當然，啱啱頭幾日可能未係咁夠奶，啜多啲就得,  我覺得唔使用擔心佢唔飽，因佢唔飽就一定大喊。夠濕片重就得，
因啲嫲嫲婆婆老公（包括自己）
都會覺得點解呀B食極都好似唔飽就叫你補奶粉，
補吓補吓就懶左身!!因要多奶就要多啲埋身(泵都得) 身體造奶會好啲, 最緊要清空佢，你身體先知道要造奶。

如果平時辛苦極都只係自己，只要自己堅持就得，
但坐月其間，又婆婆又嫲嫲又老公，
仲可能有其他探你3姑6婆(好彩我冇)多口打擊你，
所以你自己心理質素都好緊要，唔好理佢地，當聽唔到
(其實我都有自己打擊自己=p, 有朋友就想專心餵奶唔應酬，不過好難)試過泵出嚟好少，少到覺得BB好似食得好少，好唔開心，喊左，
又試過泵出嚟之後倒瀉左，又喊！
之後發覺用手擠完多，就冇咁唔開心，
可能我唔夾個泵，但又唔想呢個時候買（果時差不多想唔餵）
所以之後都用手，又快捷（15分鐘）返工仲方便

曾經睇過一文章講，人奶可以比喻為無限量添飲，即你唔飲哂啲咖啡，
係唔會再斟比你，你飲哂就你要幾多都得!

有時間，聽下講座，知道多啲會好啲，其實屋企人都應該聽！
香港母乳嬰育協會講座唔收費，但我覺得好有意義，所以我有捐錢以示支持(健康院姑娘都可以比到意見，又唔使錢)我實在唔知道自己食咩先多奶，
有啲人食飯，芝麻糊，黑豆漿，黑豆茶。。。
啲食物都係普通野，一試冇防，個個人唔同
我覺得均衡就得，飲多啲水，
書仔有教如下湯水
 

我而家已經冇咩再特燈食，但係都好似差不多。
之前嘅一篇blog我有講而家情況（for blogger only ）
夠唔夠奶／家庭同工作環境性格都會好影響
見過身邊有朋友餵到6個月，佢性格好tough，
佢話如果公司唔比佢餵佢會告佢歧視家庭工作崗位
有朋友頭一個月放棄，佢性格都好tough但怕辛苦。
有一個一開始就唔餵, 冇諗過
有一個好想餵， 但係冇奶
可以講餵人奶真係好辛苦，
尤其係剛生完又話要休息，又要餵, 佢仲食極啲唔夠, 人都癲
我相信那些用泵同全奶媽肯定辛苦過我百倍，實在受人景仰!!生仔辛苦係一日或兩日嘅事，但係餵奶就喺長時間，

話分兩頭說，佢亦比到你好大滿足感，
同BB一齊嘅溫馨時間，係其他野取代唔到嘅。
見到佢食住個心好甜，好感動。
兩個人為一體，你會更加愛佢！！(當然唔餵都好愛~)睇到檬檬佢而家咁得意可愛，就咩都值！

凡事唔好勉強，唔好比自己咁多壓力，
好多事知易行難，好享受，
都係果句，盡力便好，
BB一定知道媽咪, 仲有喺背後默默支持嘅爸爸錫佢嘅！
各位加油!!!!!!!!!!!!

檬檬的禮物

曾經聽過一個故事
女主角叮囑男主角每次經過車站的小店時，都要買香口珠給她，
雖然男主角不明白為什麼女主角自己不買，
但每天經過小店的男主角都總會買給她.

原來女主角希望男主角每天也會想想她，

當他經過小店買香口珠時，
便會想起自己!!!!

為什麼突然想起這故事？？
因為檬檬爸爸都由上海出trip回來，買回來的都是檬檬的禮物！！

檬檬: 唔知爸爸下次買咩比我呢？？

3pcs @ next  (rmb210 for 3pcs )   1pc @ GAP (價格同香港一樣 ,仲要係人仔)

相信他在外時必定非常掛念檬檬…….現在看到什麼也是會留意是否他需要！(之前買的是給婆婆及嫲嫲的茶葉。媽媽都試過有茶葉嘅… 可能爸爸唔知媽媽的需要或者沒有媽媽的需要啦。。。)

這次是檬檬出世後第一次的long trip，相信爸爸都很掛念檬檬，
幸好現在的whatapps非常方便，能常常給他最新的消息及相片，
以解相思之苦。

(暫時應該係單思!)

有時間。影 冇時間都。影!

 呢幾日出門口都好趕，已經唔夠瞓，
想瞓耐啲，真係瞓得一陣得一陣。。。

（我以前會同老公講瞓多”1秒”，真係講完都1秒, wakaka….

 所以老公果時會叫我做1秒人）

尋晚12點幾瞓，瞓到2點幾，見佢郁郁吓（媽媽力量：自己咁眼瞓都知佢郁）
都知應該要食奶，由於唔係即刻可以食，就起身準備。

首先喺雪櫃取出人奶，喺室溫到放一下，之後先可以坐熱佢，
呢度都用左半個鐘，瞓又唔係，唯有hea左一陣，
之後諗住佢起身啦，點知又冇咩動靜，我唔敢叫醒佢食，
因為我嘈醒佢嘅下場會好～慘！！

扭到你死，所以情原佢自己醒！ 

於是我都瞓埋一份，但咁嘅情況吓點會瞓得淋架。。。。
結果，瞓吓醒吓到5點幾佢地先真係肚餓醒左。

唔好諗住快啲食完就瞓得喇~錯！
佢食奶好煩！！佢而家鍾意食我個9G，
一比樽樽佢就食令歪面，用手撥開，腳撐到行，
喊喊喊，唔肯食，一係等佢順返氣，拍拍佢同佢玩返開心先肯食
（我都試過先比9G佢食，呃佢食食吓變樽樽）

扭得嚟又凍返。。。又要熱過, 坐熱緊嘅奶又可能熱得滯，又要攤返凍少少
救命呀...又話肚餓, 咪食囉~ 又ai又西終於食完！！ 我都冇力，由婆婆收手同佢掃風先瞓。

9：30返工瞓到8：45 先起身，
起身見佢喺到玩，行埋去。佢就勁開心，真係忍唔住同佢影吓相

又有麵包超人新玩具喇。

真係咁趕都要影!

好在IP夠方面，咩靚相機都冇用，最緊要就手～快！！

(結果我又要做伸手黨)

奶媽近況

而家返左工差不多一個月, 早上擠一次，返工lunch擠一次，
到差不多放工，5~6 點擠一次。返都家，夜晚有時比佢埋身。有時半夜都有起身擠。

（由於半放棄狀態，但係喺屋企嘅次數唔定，有時太累，

有時朝早太趕，有時唔記得。。哈哈）

我而家有飲organic mother milk 係茶包喺荷花有得賣，keep 住飲，
唔知有冇效，不過唔理, 當茶包飲。

另外有飲過黑豆茶，喺city super 有得賣，不過好貴，一大包＄100，
一小包要成＄10，所以我媽咪都有自己炒嚟煲。

之前都有飲木瓜魚湯/花生魚湯，咩魚都得，我覺得效果差不多。

而家媽咪湊B都唔得閒煲魚湯我飲, 只係飲organic mother milk 茶包, 但我嘅奶量都差不多, 有時好似仲多左, 所以最緊要飲多啲水，放鬆心情，密密bump

餵左BB兩個多月，返工之後諗過放棄，但又唔捨得，又想bb 好，
諗住唔做咁多野，等佢自己冇,

但係每日keep住bump都keep 都有奶，雖然未係可以做到全人奶，(我冇儲奶)但都起碼每日有一至兩餐, 反而放寬心情唔好諗住夠唔夠會好啲。

擠奶點滴
試過放工太趕，唔記得拎.
有同事發現我喺到出現，好似發現新大陸咁，係咁問我喺度做咩。。。我話你咪理啦！哈哈
試過上到去先知唔記得拿鎖匙，又要行返落去,拎左先發現又冇拎樽樽
試過唔記得拿冰，留左喺公司雪櫃
試過啲奶不停咁擠到塊面，因為佢冇定向風
只可以拿起件衫擠，頭仲要dup 低，好累
有同事話睇我整得幾耐。。。
開門入去時，好似偷野咁，個心好驚。唔想比同事見到，但我明明光明正大！
我諗其他用泵嘅媽媽們比我更加麻煩!!!!!!!

奶媽與檬檬近照

Giant in the street @ Dwinguler

就黎3個月喇。可能好快已經識爬，所以我地買左張地墊~Dwinguler比檬檬
呢張墊應該係同類產品中算係貴，同用料好嘅一張。韓國製造，

買左開心農場M size
 放喺客廳啱啱好

另一面:

100%韓國製造
防滑防撞．安全實用以特別技術加工之特殊浮雕表面，讓地墊緊貼地面，不易滑動，避免孩童滑倒；
特製的柔軟緩衝層可保護孩童免受硬地沖擊；
此產品已經測試符合嚴格之歐洲玩具安全標準 (36個月或以下小童級別)

吸音保溫
此產品密集微少空氣層，有效吸收孩童蹦跳玩耍時的噪音；
密集的微少空氣層能隔絕清涼的地面，於寒天尤其適用；亦以免孩子腳部受傷。

教育效果
多種主題及鮮艷顏色，有助培養孩童感官及認知能力。
正反兩面採用不同設計，讓孩童學習更添樂趣。

易擦易洗 美觀耐用 防菌衛生
物料不含有害物質，並易擦易洗。
可用一般清潔劑清洗，不會破壞防菌塗層。不易積藏細菌，保障兒童健康。

$1326 (baby pace company)
比左$$, 送到嚟屋企~

呢面係開心農場

Giant in the street ~

媽媽力量

檬檬爸爸出trip5日, 而家過左3日,

已經累到爆！婆婆已經過嚟瞓唔使我兩邊走, 但放工後都急急腳返屋企, 
唔想婆婆咁辛苦呢兩2晚都只係我自己應付檬檬嘅夜半哭聲~換片，餵奶，掃風，自己擠奶，真係好累。

我尋晚已經將瞓教嘅時間推前到9點幾! 
但斷斷續續都係瞓得大約5-6個鐘, (其實比起之前已經好好)
我係需要瞓起碼8個鐘先夠架,
所以呢幾日喺公司超眼瞓 zzz  zzzz

要繼續發揮媽媽力量!!!!

雖然好累，但夜晚返到去都會同佢玩吓！

檬檬見到我辛苦都即刻笑得甜啲冧返我
自我陶醉~

檬檬玩具

小朋友嘅玩具真係同啲衫一樣，好快唔啱，係唔啱玩!!
我地喺檬檬出世之前只係買左啲啲玩具，其他都係朋友送，
趁復活假期, 一齊拎出嚟

各位觀眾，哂冷~~~

你哋見唔見到我呀？

你睇佢笑得幾奸。。

其實佢都唔知發生咩事～

呢個熱帶雨林地墊喺朋友仔仔嘅，不過已經唔啱玩，
仲好新，所以比bb玩。真好，又慳返啲!

而家嘅小朋友，物質豐富，我都要等佢知道玩具唔係話要就要，
唔係隨便可以買，
不過一啲教學嘅玩具就除外!

希望我地都做得到啦，雖然係錫佢，但係唔可以寵壞佢！

笑檬檬

自從檬檬識笑之後，我地就好鍾意引佢笑。



只要你對住佢笑，佢就會對返你笑，
又或者佢自己喺床仔度玩，好耐冇人理佢，
突然你去睇佢，佢地就會對住你笑，
好似話: 好野，有人嚟睇我喇!!

對住佢, 真喺咩煩惱都冇哂!!

(扭計除外)

第2次打針@母嬰健康院

BB 2個月大，,要打第2次針，但預約到尋日先約到時間去健康院打針！

去到健康院，咁啱裝修，好大裝修味，於是搵個遠啲嘅位坐。

今次BB兩個月以上，可以唔使除片，距離上次磅重都有個半月，今次嘅成績

	出生日	1M	2M16D
	26/01/2012.	26/02/2012.	11/04/2012.
體重	2.8kgs( 6.17lbs )	3.49kgs ( 7.69lbs )	4.6 kgs ( 10.14lbs )
身高	/	/	56.5cm
頭圍	31cm	35cm	37.2.cm

成長線都係正常，不過檬檬都係屬於細碼B。
唔緊要啦，健康就最好!!

今次第一次度身高，到下一次先可以比較

(隔離初生BB除左片，爸爸抱住行去磅嘅時候，突然便便。。。。

一地都係，爸爸仲成身都係，呢咁hea，
仲要比姑娘微言，好慘!! 初為人父母，好多野都未有經驗，

梗會有呢啲事情發生，唉。。姑娘唔好話佢地(我地)啦!!! ）

同上一次差不多，打完針，大喊10秒之後再瞓返。。。真係叻仔

今次一次過打2支針，四合一針及肺炎鏈球針，
姑娘話打完針可能有副作用{發燒}，健康院開左退燒藥水比佢以備不時之需

尋晚臨瞓前check 冇燒，2點幾再起身check，發覺有少少，摸吓頭仔好慶，個心即時好驚，
好緊張，好似少少燒 37.3度, 姑娘話38度先要食藥，我又少少擔心，所以都比左佢食，
婆婆抱住檬檬，我就將藥水在匙更放入佢口，佢都好乖，冇扭!!
(我諗起我細個時媽媽夾住餵我食藥)

不過佢尋晚同今朝都好精神，應該都冇事!

尋晚得我一個照顧檬檬，雖然臨瞓已經探左一次熱，
但要keep住睇吓佢，幫佢探熱，好驚佢唔舒服，
所以我瞓得超唔好，今日仲要返工，好累！！

之前都聽過BB病，媽咪最辛苦，終於感受到！

洗白白

除左初生果段時間，檬檬出世到而家都算鍾意沖涼！
不過之前唔鍾意洗頭，一攪佢個頭實喊，
而家大左啲，已經冇喊，好冷靜~
除非佢心情唔好，瞓唔夠！

大部分時間都係婆婆同佢沖，如果冇去婆婆到，就爸爸沖，
皆因媽咪我對手仲有少少痛。
初頭爸爸都好驚下，而家就好好多

1.比人包住，好無奈

2. 洗頭中
3.大爺
4. 比我出賣肉體
5. 扮cutie

6. 完成喇!!!!

我覺得佢沖完涼之後塊面好似肥啲，唔通係濕水麵包？!!

Baby G @ 4D 對照

生了Baby之後，非常忙，好似永遠都未能停落嚟，
以前屋企已經執極都執唔完，而家更加!!

執野時候見返呢張4D， 佢孤伶伶咁自己一張放喺到，
連放埋一疊都唔係，可想而之幾咁嚴重!!!!!!

即刻睇返究竟似唔似Baby G ,
搵到張最接近嘅角度比較

都OK似喎!!
下巴尖尖，面仔有肉，鼻頭有肉。(好似睇相..haha)
不過好似4D果張會將啲五官放大左同誇大左，
果時我以為Baby G 出世個樣會係漢堡包咀....哈哈
原來唔係

好在呢次吳醫生都當一次產檢，
如果唔係我都考慮會唔會做！！
慳返啲嘛~~

與檬檬的悠閒下午

一連四日的公眾假期好快過去, 又要返工!!又要繼續掛住我的檬檬喇。。。

實在有萬千樣屋企的事情要做，諗住假期可以清吓，
但都未能全部完成!

淨係清理啲衫已經一頭煙！

大肚前的衫有啲唔啱著，尤其係啲牛仔褲，真係唔開心。
又唔想扔住，希望瘦返可以穿著返，又要keep，
而家啲天氣反常，冬天衫又未收得埋，
夏天衫又要拎出嚟, 暈~~~~

屋企衣櫃而家又比檬檬張床阻住，

所以衣櫃都係明存實亡!!

我千千萬萬嘅衫啲唔知點執
(我老公已經冇咩衫…我霸哂啲位架喇)
唯有又買muji啲膠箱頂住!

清清啲舊衫，不過清完又有新衫，
我要忍手!

喺屋企仲忙過返工，不過有得對住檬檬，就唔同哂！

和檬檬忙裡偷閒。。。

過一個悠閒嘅下午

Baby G @ 2M

{back issue 真係好忙，冇時間update }

 @26/03/2012.

Baby G已經2個月大喇！

真係眨吓眼

BB大得真係快，所以我都要多啲同佢影相！

又回顧一吓先:

• 樣貌 

佢對眼而家冇之前咁細，開始似爸爸！雙眼皮, 但平時影相唔覺~ 瞓醒先見到!

• 社交技巧

佢識得笑，係有意識嘅社交微笑， 好鍾意我地同佢玩，同傾計，笑到呢。。。

偶然會發出 "arr"嘅聲音

目光會跟住物品移動

•  肌能活動

踢腳仔就大力左，好多時張被仔都踢跌埋。手力都好咗，有時食奶扯住我件衫

• 食奶

奶量都係冇變，但食奶時會扭，仲難餵左。。 。 =_=

• 便便

好正常。
都係痾咗都唔喊......滿瀉都冇問題,係一個污漕B

• 重量

未磅，下星期先去健康院，不過我地都覺得墜手左。

• 身長

都有進展，因有件衫仔已經吊腳。所以我地都快啲同佢著多啲細件嘅衫。

• 健康

都好OK，之前見佢好似有啲痰，但問過醫生應該係冇，應該係氣管嘅聲，好多BB都有。

皮膚，兩邊面有少少粒粒，同佢睇左醫生話好好多BB都有，佢啲皮膚已經好靚（我擔心唔理佢會變差嘛。。。）

搽左幾次好快冇左
之前頭仔好多頭皮，好乾，（唔係頭泥），所以我買左另一支洗頭水比佢，用左好好多。

指甲已經剪左好多次，長得好快，所以我地都比佢帶住手套仔，但又要除吓比佢鬆鬆，比佢摸吓野。

今朝連腳甲都剪埋，長到反甲喇~

腳仔，頭一個月同BB片時見到佢對腳成日灣起，有啲擔心，去健康院時問過醫生，原來BB之前喺媽咪肚入面唔夠位都係灣住腳，所以出嚟要比啲時間佢變返直。原來係咁，自己嚇自己~

等我假期post 佢今個月嘅相先......
 

Baby G 乳名

Baby G 出世之後，有個乳名叫 ~

檬檬
(音：檸檬嘅檬，高音嘅）

點解佢對眼都算大都會叫檬檬？？ 

原因就係呢張相

呢張相係佢沖完涼影嘅, 沖完涼影出嚟係腫啲，唔通浸左水？？

佢個樣好傻，對眼好檬，
好似好眼瞓咁，檬吓檬吓,

好好笑, 

於是我地就叫佢~檬檬。

而家對眼，龍眼咁。。。。都唔係檬檬喇!

   
有啲似整容前後.... 

奶媽＠work

上回講到惆悵究竟返咗工仲可唔可以餵人奶。。。

返工第1日，仲好似發緊夢咁，啲follow up 根本唔知從何入手，
同呀姐對野時，順便話比佢聽，我有餵人奶，希望返左工都餵到，
雖然唔知份量夠唔夠，不過都盡人事, 希望佢支持，比我有啲時間行開，
初頭驚佢有微言，點知佢話呢啲小問題啦!
 Good~

到地方喇，問左總務部
原來公司有個小洗手間有得沖涼，only比客有需要用，
同只有一個女director 有鎖匙，佢都好少用呢到，
雖然都係洗手間，不過都算好好，好乾淨因冇人用!

於是我上星期就食lunch時去泵奶，
其實係擠奶（我用泵出唔到奶, 不過我覺得仲方便，唔使洗泵。。。哈哈）

擠左15分鐘到，就完成。
跟住入落個密實盒到，用個袋裝好，唔使咁揚比人見到，
到5/6點，擠第2轉，喺雪櫃拎出嚟就即返家。
如是者，呢個安排都算OK，我先再買左個冰袋，如果唔得唔想Side～

我買左個Tommee tippee ，原因好簡單，
因為附近嘅嬰兒用品舖只有呢個牌子賣。
返到公司放冰種入冰格，到走先拎返放內入袋，
都keep 到6個鐘，等我放工去買啲野先返去都得！

而星期六／日喺屋企，諗住埋身體餵，
唔知點解，佢有啜，但好快就lur返個奶G出嚟，
但我試又有奶架喎,
唔通慣左擠，而家BB啜出唔到奶？佢食唔到？？
定係覺得慢呢???
又或者而家習慣左樽樽？???
好彩之前都肯食，都同佢溫馨過一排
湊BB真係會出現十萬個為什麼。。。
希望佢快啲食返啦!

提外話:又試過佢超肚餓，喊到拆天，點知又唔食，
(平時一放樽樽比佢，就即食)
但好肯定係飢餓架喇，

於是諗會唔會個咀塞左，又換吓個咀，又唔得，

會唔會係太凍？因為有時佢食開120ML， 突然食凈少少，就助熱住先，
到太熱又要cool down返，啱飲佢唔食又凍返，又要熱返，
仲要單手抱住佢，佢又扭緊，又要氹佢。。。
真係人都癲

又諗係唔係唔鍾意媽媽奶嘅味，於是又開吓奶粉，
點知都未放入口，就大叫, 好煩!!!

最終係同佢傾吓計，笑吓，玩吓腳仔，等佢開心返先得。。。
原來扭緊計佢係唔肯食~~

返番正題，雖然而家嘅量只可以食到1至2餐，
我返工之前諗住唔餵，所以冇儲到奶，好多人話返工之後奶量就跌，
但都係果句，餵得一餐得一餐！！

p.s. 其實我應該早啲試泵奶，但由於我嘅madela泵係朋友比我用，唔使錢，
所以我唔係好心急個泵有冇用，如果自己買，就會快啲用。。。用多啲添。
不過果時又驚如果餵唔到都唔使side
其實應該破斧尋舟，買左先，迫住用，可能好啲~