小檬＠Baby mo

有時見到小檬d靚相，都會寄去Baby-Mo

有日收到編輯姐姐Email邀請我投稿成長日記,
其實之前都諗過投稿的，當比小檬嘅生日禮物留個紀念，
但係懶同冇時間，就拖。。。。

而家喺有人嘅推動吓，終於完成！
喺六月號到刊登咗喇

登登登登。。。凳！

今月之B ~


小檬好幸運成為今期咁多位BB之中嘅
今。月。之。B。!!!!

要喺屋企咁咁咁咁咁咁咁咁咁咁多相之後揀十張要有紀念價值，
又要靚，光線又好嘅。。。真係好難，
好在各方好友幫小檬都影左唔少相，
主力揀攝影大C同TC果啲已經OK！

其中食餬仔／反身／老虎波波就喺媽媽傑作

(舅父知道竟然問我點解冇佢果啲。。。哈哈，
因為每次佢影完都冇比返我囉！下次喺到比大家睇吓)

交咗稿之後收到編輯姐姐嘅電郵：

This baby diary is one of the unforgettable baby diaries that I have edited.
Though I am just a reader, I can feel massive love inside. Thanks for your "great effort"!
Thanks again for your great support!

Hope小檬will enjoy reading it!

好開心。。啲相揀到頭爆，
啲wording諗到頭爆
（又唔想老土，又限字數）
都叫做有人覺得好，見得吓人

雖然唔喺咩威水史，不過都不失為一個紀念啦。。
等小檬大咗都可以回味吓吖。。。

小檬，送比你嘅!



希望你鍾意!!

剪髮前後???!!!

星期六媽媽自己一個湊檬。

係一個人湊住呀檬喺條街到

呢日爸爸要應酬老闆，冇車坐
同佢食完飯仔，媽媽就帶佢去剪頭髮。
而家帶佢出街已經拎車仔又冇拎咩帶。
只係抱佢，同叫佢自己行
好在MTR都有位坐。。。。

去之前已經買咗個價值＄15嘅扭蛋比佢拎住
點解咁貴嘅？

一入到去已經喊，係爆喊果隻！！！
拎哂所有可以嘅野比佢都唔得。呃咗我啲星星餅都仲係要喊。

諗住比萬寧貓佢睇都冇用，
自拍喇，有時佢好鍾意自拍見到自己個樣架嘛，
都唔得相（所以先影到呢張）

你睇食飯仔果時個開心樣同呢個樣!!


好勉強先剪到少少吉眼嘅蔭，
喊到劏豬咁，呀妹姐姐話不如唔好剪啦，
我話山長水又遠嚟到唔剪？？？
唯有同佢行出去一個圈，一陣之後返去，
到門口已經再爆喊，
真係歇斯底里果隻，呀妹姐姐話自己好似殺人兇手咁!!

結果呢次係剪咗dddddddddd嘅
即係等於冇剪。。。
好在唔使錢

（有朋友去坐馬仔果啲比三百幾蚊諗住呀B肯，點知一樣唔肯要呀媽抱住）

教檬小小分享

呢兩日有唔同嘅blog友都有問我呢個問題，點樣教小檬?唔好話心得，我冇資格，
分享吓小小感受
我係懶媽媽，冇睇啲教育BB或者小朋友嘅書，只係自己覺得啱就算。。
係咪教完一樣到一樣？
係，我係!! 好記得第一樣byebye 教咗好耐，我先開始教第二樣，
之後果啲好多佢學 一兩 次已經識，佢學野好快，真係唔使教好多次。
我會先做一次比佢睇，
例如，點樣洗洗手架？
我會示範比佢睇，之後捉住佢做一次，自己再做。再同佢一齊做，
如果教咗一排都唔識冇進展, 我會教到佢識先教第二樣。
不過太悶又唔得，好似好廢話，不過我覺得真係睇情況，因才施教。
佢學野快梗係得，但係佢學野慢，你迫佢都冇用，唯有要比啲心機
我冇用食物引誘佢學野，我唔想佢覺得學習等同有野食。
都會有食食吓生果或者小食教佢，佢做完又食吓玩吓，
冇特定學習時間，通常都係玩吓玩就學，
冇壓力先會鍾意學野，唔使set行哂咁學。

而家都係教佢一般生活上嘅事，果啲生字Apple bear bear都係好隨意

(話時話，rody生字咭都好耐冇拎出嚟玩。)

我覺得教到佢自理能力同生活細節都好緊要，執野著鞋除

洗手（而家開左水喉會gi啲泡比佢，佢會自己捽捽手。。。

希望好快學埋抹野。。。哈哈!!）

由出世我就已經成日同佢講野，我做咩，去邊都講，我唔理佢識唔識，只係要同佢多啲溝通。我諗佢聽聽埋埋要用時就容易啲講出嚟。
好似頭髮咁，我冇教過佢，有日我問下佢，佢居然摸住啲頭髮，
我都好amazing，點解佢會識，我諗係因為又細到大都好多人話佢多頭髮，
之後梗摸吓佢啲頭髮，可能咁樣佢就知。
又或者媽媽去開奶喇，我地換片片喇，我地去婆婆屋企喇，
舅父呢？之後會入舅父房揾佢，見冇人會話比佢知舅父返咗工。
之後到佢識行識走問佢舅父呢
佢就會自己入舅父搵或者手指指入去。
有好多佢而家識嘅野，唔使特別教，
我覺得係因為之前都有同佢講，你唔會估到佢吸收幾多，
咁咪平常心咁當佢係識聽同佢講囉!
另外語氣，我發覺大聲同有啲威嚴好似會work啲，
不過我而家反而會盡量溫柔啲，希望佢都受，
唔使我咁大聲做惡婆惡婆
大家又有咩心得交換下呢？

自己放鞋仔

自從教咗佢tidy up啲玩具之後，佢就知道tidy up 係執好啲野。
再進一步我就教咗佢放好對鞋仔。

幫佢除咗鞋之後，就開定鞋櫃比佢放，呢次好成功，

但有時會拎咗去玩，又或者放唔到入去跌返出嚟又唔知

而家話去街街就會指住鞋櫃要拎鞋，
我會幫佢著好對鞋之後等佢自己去貼魔術貼，
雖然佢貼得唔好, 但都當佢係佢自己著，
比啲鼓勵佢，跟住幫佢黐返好

距離自己著鞋又邁進"一"大步喇!!!

tidy up 玩具

識行識走之後，小檬就自己去搵玩具玩，
通常就摷哂出嚟，
之後就玩吓東，玩吓西，冇咩pattern。
有時就好有心機玩一樣野，有時就玩兩野又走去玩第樣。

玩完會教佢先tidy up啲玩具。
初頭教佢就同佢一齊執，放入個玩具箱度。
而家玩完叫佢tidy up 就會自己執。

不過有時執執吓，會忍唔住又玩返。

 

唔知點解每次叫佢做野都係要大聲少少先得，
我好溫柔嘅聲佢好似聽唔到，
所以我發覺我video啲聲都係啲惡嘅聲。
之前都睇過篇文章話啲BB同小朋友係反而會聽惡或嚴厲嘅人話。。。
話因為佢地知道佢係屋企嘅話事人喎！

唔通真係慈母多敗兒？

Bear Bear & Apple

Bear Bear & Apple !

自己進食 (試驗篇1)

過年時候，約咗班同學仔團拜（仲仔？），見到2歲嘅LH哥哥好叻咁自己畢野食，
高貴而美麗嘅EE就叫我可以開始訓練佢。。。

好啦，等我試吓啦，我將呢個過程分開兩part，

就係'畢"同"放"

第一part，就等我幫佢畢好咗先，等佢自己放入口

都好似好成功!!

第二part，自己畢, um。。。。等佢放入口純熟啲先啦！！

不過喺我監管底下，佢放入口之前，都有一吓將啲食物fing到通地都係。。。。
佢啲動作實在太快喇。。都唔似1歲bb，唔通佢第日身手可以好似家樂仔咁？？

呢篇"自己進食"，唔知會唔會寫到一百幾十都未成功呢？

士多啤梨 ~ 2

續。。。

第二粒，繼續比佢自己拎住，佢食得好滋味，佢愈食愈開心，仲。。。。。。




留意到嘛？？
佢肉緊到搾實咗粒士多啤梨呀！！
搾到爛哂，流哂啲汁出嚟！！

哈哈哈，搗蛋嘅BB都會帶比我地好多歡樂

BB相架

呢個相架都係我有BB之前買，因為好鍾意

已經好耐冇見到啲靚嘅相架, 所以咁耐都未買新相架!!

不過我真係太懶，之前RB叔叔送比我地果個靚靚相架都仲未整齊啲相。。。

通屋爸爸 + 萬寧貓

萬寧貓貓真係男女老幼都鍾意！！ 小檬都係佢fans

而家見到啲公仔都係咁叫貓貓, 不過叫貓貓又唔正，變咗叫媽媽

唔知點解佢學識咗爸爸之後就咩野都爸, 全部都係爸爸,  而家叫我又唔知點解叫我"拜buy a" , 又唔係好正式叫"爸爸"
但係問佢，佢又知道邊個係爸爸，邊個係媽媽...我地懷疑佢整蠱我，因為佢講完會笑嘅!

恭喜發財!!!!

恭喜發財!!!!!!!!
小檬祝大家蛇年身體健康，萬事如意，心想事成！！
日日都好似我咁開心，笑口常開!!!

各位靚EE姐姐青春常駐，哥哥叔叔財源廣進，BB小朋友快高長大，聰明伶俐!!

最佳新人獎候選人〜小檬

新春將至，等小檬帶d歡樂比大家啦！

又係臨瞓時段，同佢玩聞臭腳，之後我就話臭到暈咗，做比佢睇，跟住：



哈哈哈，真係笑C我！！！

咁好戲，呢個獎，應該志在必得！

由喊包樣到檬檬樣

頭一年BB嘅成長真快,
睇吓佢一出世喊包樣到而家嘅變化先!!

就係呢個樣我叫咗佢做檬檬，你睇佢隻眼幾檬

好多重要嘅時間我都有記低，因為我知我會好快唔記得！

3M19D則身4M5D成功反身

6M hip hot爬爬

6M14D訖pat pat

7M8D自己扶住起身

8M 自己食星星餅

9M行兩步

9.5M 叫媽媽

10M錫錫比車車魚魚, bye bye, 拜公公

11M 飛吻,臭腳，鼻鼻，頭髮，耳仔

11.5 M 自己行,bye音，爸爸音

1歲   叫媽媽爸爸, 扮暈, 舉起手指1歲

冇寫低果啲已經唔記得!

1歲到2歲應該有更多認知發展&語言發展,
小檬繼續加油呀!!

終於自力更新

一路小檬都好懶，唔肯自己拎奶樽，見到見他BB超細佢都自己拎住食哂，
唔得喇，我要做野喇!!

首先，星期六朝早要佢揸住，OK喎。。。

唔通一歲就生性咗？

之後影低張相比婆婆睇, 比啲鼓勵佢，等佢知道小檬係得嘅!

星期一媽媽返到公司就見到老公send比我嘅呢張相
yeah！！ 婆婆終於都可以等小檬自己食喇！！
婆婆坐喺到監視住佢

有時我都明老人家會好寵BB，覺得佢地未得，
但你唔放手又點知佢唔得呢。。
所以在職嘅媽媽又要兼顧埋呢啲事，
媽媽真係N樣事要理，萬能咁!!

剪頭髮過年

小檬啲頭髮已經好長，其實一月頭已經試過同佢剪，但係係失敗嘅！
佢唔肯再坐定定喺度比我剪喇，剪第一吓已經走咗，
我用盡所有方法都唔得，
啲頭髮碎已經跌到周圍都係，包括我身上方。。

唉，算喇算喇 
呢啲錢真係要比人賺吓嘅（其實次次呀妹姐姐都唔收我錢不過今次我買咗盒蛋糕比佢地食）

你睇前頭頂啲頭髮！！

呀妹姐姐話唔好太短，會好傻仔，
你話是啦，最多快啲再返嚟剪啫，
唔通佢想見多呀檬幾面！？

終於都爸喇！

媽咗咁耐，終於都爸吓喇！

之前都試過發"bye bye"嘅音，但都未爸到！

呢兩個星期，就爸得好正！而家爸爸問佢，佢會識叫爸爸。。

但可能佢太興奮，新野梗要用多啲，連問我都係叫"爸爸"。。。

有時就識轉chanel，分到"爸爸"同"媽媽"，
尋日仲勁，叫我就變咗 "媽媽爸"！一箭雙雕!!

今日你幾多歲呀？

今朝同小檬準備去生日會換衫果時教佢，好快就識，可能因為之前都有教佢指隻手指出嚟玩點蟲蟲！

小檬檬1歲喇！！

小檬一歲喇！！  

時間走得真快，
由上年初四穿水見紅經歷12小時生產過程,
小檬伏在我心口來到這世界的那一刻開始，
就改變我倆的一切。
這年間，生活很是忙碌，但也很開心，
每天看到他已經是最欣慰滿足的。

小檬當初是一個睡在我臂彎的乖乖小B，到現在已經可以自己周圍走，
當中的每一步也令媽媽興奮，
儘管是一個簡單的反身，或是搖搖擺擺的試著行路，
看在媽媽眼中都是多麼的重要!!
不經意的一句媽媽或簡單的一個飛吻，已經足夠令媽媽甜在心頭!!

這些細微的開心小事，媽媽說半天也說不完，只有媽媽們才明白。
看著這年你迅速的轉變，有點不捨得你成長得那麼快，真矛盾!!

我的小檬，你永遠也是媽媽的心干寶貝！

祝小檬生日快樂！