小檬語錄~貴

話說有日行超級市場，媽咪見到啲野好貴（已經唔記得係咩）

只係純粹想表達一吓

媽咪：哇，呢個好貴呀！！

小檬冇咩反應

媽咪：小檬呀。。。其實你知唔知咩係貴架？

小檬：貴即係唔買得囉～

應該係媽咪成日灌輸嘅概念~ 哈哈哈哈哈 

行開玩具店，小檬想買玩具，媽咪又同佢講錢

媽咪：小檬，你知唔知好多野都要錢架。。。妹妹食奶啦／換嘅片片啦，仲有住嘅地方／買食物／返學都要俾錢。。樣樣都要錢

小檬：我知道。。

媽咪：所以要點呀？？ （model answer，留返啲錢，唔好買咁玩具）

小檬：要去返工做野～搵錢！！！！！！

睇返上年淨係識"搵錢"，而家加埋返工做野先係搵錢

l小檬語錄~小檬"睇"玩具

小檬語錄~母子閒談

小檬語錄~小檬"睇"玩具

小檬識講好多野之後，好多都冇再記錄

突然諗起呢件事，要寫返低佢。。。

細個時睇玩具, 永遠都係話下次買

到大咗啲, 我就成日話屋企冇位，唔再買玩具，

於是佢睇玩具果時, 唔會扭要買

就會話等買新屋企/買咗大啲屋企先買呢個俾佢，

每次聽到我都會好感動，覺得佢好乖，好生性。

小檬舊年十月左右，同舅父喺百貨公司玩具睇，

佢叫舅父拎一盒都大嘅lego睇，跟住問舅父

小檬： 呢盒幾多錢呀？

舅父： 二百幾

小檬：即係貴唔貴呀 ?!

舅父：小小貴啦。。。

小檬即刻話：咁你放返上去啦~ 

再拎第二盒細啲嘅問

小檬：咁呢盒呢？

舅父： 一百蚊

小檬：咁呢盒平唔平呀？

舅父：都平啦。。

小檬：咁我要呢盒啦!

其實由頭到尾都冇話買玩具俾佢，

不過舅父見到小檬咁乖，都忍唔住要買俾佢。

從來冇刻意教佢，不過我諗可能我日常生活都會話太貴唔買。。

要平嘅先買,小檬 自己領略到，

keep it up

人生好多事情都靠你自己領略！

父親節禮物前傳

媽媽冇諗啲咩特別嘅父親節禮物，見爸爸個鬚刨好似都舊，

啲刀應該都換吓，索性趁父親節買個新嘅比佢。

於是提早啲安排

趁爸爸返大陸，就叫婆婆預早同小檬出嚟商場
同小檬一齊出去買。。
(妹妹就係屋企指揮，冇出到！)

食完野，就action～

我覺得好成功呀！！！！

 佢都做到自己去買嘅效果。。

雖然有啲位佢唔敢自己同sales哥哥應對（而家會唔好意思）

買完禮物搭車時就要教育

媽咪: 你記住唔好同爸爸講我地嚟買禮物比佢喎。。
小檬:  點解呀？ 
媽咪: 因為呢個係一個秘密，秘密呢就唔可以話比人知架。
小檬: 哦。

講左一次之後，返到屋企就唔提，希望過一日就唔記得呢件事

第二晚晚上，爸爸返咗嚟，接我放工時，

我一上車, 見到個 "飛抱抱" 盒，

心諗點解爸爸又買咗個鬚刨???

原來佢買個電動牙刷比我試吓用（因為之前啲牙唔好）

同一牌子個盒大細差不多，我都睇錯，

如果咁拎上屋企小檬一定以為係鬚刨，

而爸爸一定叫我拆黎睇同叉電，到時實穿煲！

於是我一拎到返去就自己入房拆哂個盒話要叉電先，

順利瞞過小檬同爸爸！
心諗好在我醒目先可以避過穿煲！

跟住小檬去WeeWee，佢而家會自己洗手，

有時會自己攪掂，不過如果有大人得閒都盡量睇住佢，

驚佢跣親，於是我就叫爸爸睇住佢洗手喇。。。

小檬見到洗手盤隔離爸爸個鬚刨，

就同爸爸講:

 "我地買咗個新嘅呢啲比你呀！！！"

我聽到心知不妙。。。如果爸爸問就話唔知佢講咩。。。

點知小檬出嚟就話:

 " 媽咪，爸爸個秘密呢？？快啲比個秘密爸爸啦！！！" 

wakaka~ wakaka ~

講到咁

我唔覺得爸爸會唔知囉!!!
所以，其實父親節之前
爸爸已經知道將會收到呢個禮物架喇~

小檬畫畫班 Lesson 12 / 13~ 我的家 & 玫瑰花

唔經唔覺，又兩堂～

之前每次都係老師問小檬想畫咩，

差不多畫哂成個動物園出嚟~

於是上上星期老師今次自己叫畫咩喇。。。

小檬話比我聽，呢個係我地嘅屋企～

5間房，um....都OK啦

今星期呢堂畫咗玫瑰花～

好鍾意用呢啲板同油彩畫嘅畫，好靚！！ 

都係老師用鉛筆起稿之後跟住畫～

我覺得好有大師水準！！

返到屋企小檬同我有以下對話:

小檬：媽咪，朵玫瑰花畫比你架！

媽咪：係呀？好靚呀！點解畫朵玫瑰花送比我嘅？

小檬：因為我好鍾意你，好錫你囉！I love you！

媽咪：I love you,too！

小檬：都送埋比妹妹架。。我都好錫佢架！

媽咪冧C喇～

所以話，唔一定母親節先同媽媽表達愛意嘅！！

尋晚再叫佢演繹一次以上對話

等我老左睇返再冧過!!!!

小檬語錄~母子閒談

媽咪：小檬呀。。你知唔知呢畫畫啦，返學啦。。都要比錢架, 所以呢要比心機呀
小檬 : 哦~

事隔一日

小檬：媽咪，我知道返學啦...學畫畫啦，都要比錢架
媽咪：係呀 (感動中。。真係記得) 所以要點呀？？
小檬：要搵錢！！！！！！
媽咪 : =______________=

吖吖吖吖吖。。。

去完旅行之後我決定要好好休息，不過完來唔得，

因為屋企仲有幾千樣野等我處理。

好在有個幫到手又錫我啲小朋友嘅姐姐，我先可以多啲時間陪佢地。

妹妹13個月都未有時間寫添！

FB未得閒post妹妹嘅相，已經收到朋友問點解見唔到妹妹豬

從上一個post得知，呢到都有blogger 掛住妹妹豬，

好啦，攝一個video送比掛住妹妹豬嘅blogger啦！

婆婆餵完粥仔就會問佢食完未，

佢就識吖大個口比婆婆睇裡面仲有冇。。。

媽媽覺得佢真係好得意呀～

i love 妹妹豬!!! 心心

Neck Warmer + 小檬語錄

天氣開始凍，想搵啲短身嘅頸巾比佢用，唔使咁危險，

不過都未搵到（其實冇特登去搵）

上星期行過UNY，就比我見到neck warmer，

雖然都驚佢唔肯用，

不過都要試吓，條頸暖，成身差好遠！

今朝成功著到！

天氣凍可以著自己外套返學校，

多得契仔嘅羽絨褸，小檬就唔使變雪條！

小檬語錄

尋晚落街買野。
已經有小小雨，幫佢帶返風褸上嘅帽

媽咪：落雨喇，媽咪件衫冇帽. 要行快啲喇！

小檬： 你好似我咁收埋個頭就冇事架喇！

原來佢意思係好似佢咁帶返頂帽，哈哈！

小檬語錄~ 圖書館 & 拖鞋

圖書館

媽媽買咗本新書比小檬，內容係圖書館。

媽媽：呢本書係講Library嘅~

小檬：中文即係咩呀？

媽咪：圖書館。咁你知唔知咩係圖書館呀？

小檬：我知，係Library !!

拖鞋

媽咪: 爸爸，我對拖鞋爛欄地，我想買過對。。。

小檬插咀:  唔使買啦，屋企有呀，咁貴!!

芝麻街Flash Card

一歲之後小檬講野都唔差，之前都有同佢玩吓Flash card，

不過大肚之後就好少同佢，懶得坐落地。

前兩日見返呢副flash 咭同佢玩，居然好多都識。。。

我諗都係之前玩嘅時候記得

有啲我都唔記得佢係咩，好似snow咁，都唔知佢想指手定係咩。。。

我都要睇吓先知。

呢啲Flash card一盒＄11@Aeon

真係又平又靚又學到野！ 

My First Calenda

小檬就嚟返學，想比少少日期星期嘅idea佢，就買咗呢塊磁石板。
＄99

有January 到December，Monday 到Sunday

Weatther & Season 

日子可以用1至0自行組合

每日換個星期幾，咩天氣，

Date 冇整住，太容易唔見喇! 

不過呢塊板都要喺我嚴格嘅監管底吓先可以玩，

如果唔係好快唔見哂啲磁石。

順便教埋讀

日期..星期..呢啲野冇實質嘅物品喺手去解釋，其實好難，
唯有等佢自己領略。

小檬26M喇! (2)

小檬26M喇! (2)

說話

講野都係佢最快嘅一項(不過我發覺佢發唔到F音)

而家已經成句句子講。基本上亦已經明白哂我地講緊嘅野.
日常對答已經唔係BB話，

小檬："媽媽，你唔好抱妹妹啦，爸爸抱妹妹，你同軒軒玩啦"
小檬："爸爸食公仔面果時朦查查"
（除咗眼鏡食，佢就覺得爸爸矇查查，都唔知佢點解知道冇眼鏡就係矇查查)

成日指住問東問西，"媽媽呢個咩嚟? "
有啲識嘅公仔又問，我又問返佢，佢又話返我知，
有啲我都唔知點答佢
一見到自己認識嘅公仔或者物品，就會用高十度嘅聲去講

叫親佢小心呀。。佢就會話："知喇。知喇。"

（好似嫌你煩咁，十足佢爸爸）

我地瞓之前成日傾吓計。。。而家影吓相或者錄低佢，
佢又時會話"唔好唔好"好似啲藝人同啲狗仔隊咁

把口由朝到晚除左瞓，都係冇停過嘅！

活動能力

11個月識行嘅小檬，反而未係好識用雙腳跳，呢排叻咗d
行樓梯都算OK。

自己上落我地張大人床 同car seat

呢個細膽豬近排先夠膽擒吓d杆架！

喺屋企擒來擒去就唔驚喎！

認知能力

佢觀察能力好強，可能小朋友會好簡單留意自己既野，

見到啲講野bubble，佢就會話"實現普選"

我初頭都一舊雲唔知佢做咩，

後來先知道原本政府廣告用啲講野bubble 宣傳"實現普選"

六面嘅puzzle都好輕易咁砌到

自己做到啲嘢就話讚自己好叻！我唔得閒睇敷衍佢,佢就話: "媽媽用兩隻眼睛睇吖"

我諗佢都算鍾意唱歌，而家會跟住啲歌一齊唱

有時話佢唔鍾意就好惡話唔好，再話就掩住面，跟住就喊！

有時知我嬲，就喐晒咀話"梳尼媽媽"

硬頸果陣叫佢講對唔住, 佢就話"唔對住！"

有時又會好冧行埋嚟話 "I Love you" 之後錫我一啖
爸爸行開就話要爸爸，媽媽行開就話要媽媽 =_=
喺澳門酒店商場去吓廁所就喊到豬頭咁話要媽媽

瞓教一定要拎啲玩具陪住，話望住佢瞓喎。 
不停喺張床到碌碌碌先瞓到，

有時要話再唔瞓spider man （變形俠醫都得) 就嚟搵佢，

或者我地打比spider man（求其搵張相喺電話比佢睇）
 佢先會瞓。
總之有咩野要佢做就出動佢地就得，不過我驚會變性童年陰影



自己叫完麥當當，姐姐見佢咁叻比個玩具佢
估唔到叫個細薯條都有玩具

小檬依人

終於肯帶帽，不過只係三秒鐘! 

食飯碗就拎嚟玩

瞓教要攬住我隻手，仲要親吻我手臂

瞓親都要碌，差不多碌到床尾。。。

成日講野冇停口

睇恐龍 + 自己叫麥當當

見到咁多人去睇恐龍，趁可以weekday去，又出走！ 

嘩，隻恐龍真係好大隻呀。。估唔到唔使入去都睇到！ 

我都諗過小檬呢隻細膽豬驚驚，但估唔到出面大果隻就唔驚，

反而入面果啲就驚喎～ 

year pass 會遲啲先買，因為今次得我一個，

咁啱星期三正館免費, 比$20都冇所謂。

睇完諗住走人，行過小檬見到麥當當，係咁講。。

麥當當。。。麥當當。。。

我都唔諗住同佢食，點知，我諗起廣告果個椰子新地，

我就投降入咗去試吓～ 

有啲搵笨，就咁淋啲椰子汁同啲肉就係。

本來諗住淨食雪糕就走，點知買野比錢果時，

小檬自己同姐姐講"細橙汁，細薯條，喺到食。"

姐姐雖然聽唔到佢噏咩，淨係收我雪糕錢，

但我唔忍心見佢講完冇得食於是又買咗比佢食。

(點解佢會自己叫???? 因為我喺屋企有同佢玩去麥當當叫野食，

我扮收銀姐姐，  佢扮買野食，買完再用手扮八達通do咗)

行去尖東站搭車，以為係總站，點知紅堪先係，

好在抱住小檬上車有人讓位在比我地，我叫佢瞓陣啦，

佢仲口硬話要睇野，

點知佢唔使兩秒就瞓咗，

我。。。已經好耐冇喺街到抱小檬喇！ 

大肚之前佢歲幾，冇而家咁重（雖然佢都算輕身），

但我都真係覺得好重，之後仲要轉巴士（唔知道點解唔諗住搭的士）

見到㗎車就開仲去追車，真係辛苦，

不過幾辛苦都冇諗過叫醒佢，因為我都係慈母 ~ 

小檬碌吓碌吓

好懷念以前小檬喺床仔到碌吓碌吓就瞓著嘅佢

記得差不多兩歲時佢成日要話玩唔瞓，

一入房就發哂癲，有一排又要喺sofa度瞓, 真係咩都試過，

好在我大肚後期都已經叫做回復正常，

喺我地張床到碌，不過我就要身手敏捷啲，

因為佢隻飛毛腿會除時fing嚟fing去，我就要捉住佢唔好踢到B be，

唔知點解佢又鍾意瞓喺我兩隻大脾中間，好似生仔咁=_=

好喇,正常之後，就係我話要瞓喇，佢就會拎啲玩具入房，

碌吓碌吓, 望住啲玩具瞓

最經典係要拎個超大嘅停車場，我地當然唔比啦。。每日拎嘅玩具都唔同

爸爸或者婆婆同佢瞓又唔得

而家每晚我已經累到未瞓落張床已經瞓著咗，(好難明哩)

我仲要同佢玩東玩西，雖然我真係好愛佢，但係我都真係好眼瞓架嘛。。。

呢晚仲夜媽媽同佢切生日蛋糕，唱生日歌！ 

（不過我又聽得好開心喎，哈哈）

有一晚就瞓低同佢玩，唔使講，梗係自己瞓著咗啦，

有時佢會話媽媽唔好瞓，

但係呢晚佢就自己玩，冇理我瞓咗喎！

 但當我醒返嘅時候, 就咁喇。。。。。。

佢差不多將所有玩具都搬咗入嚟

爸爸喺出面對住個情人，點會記得阻止佢吖! 

呢晚又要砌puzzle, 可以砌到6個圖畫出嚟，

每粒有6面

老實講，我就覺得幾難, 睇到我一舊雲，

但小朋友呢，對於玩，好多時就叻過大人！ 

已經係兩三個月前買，而家已經可以自己砌到

首先砌好一個個character先

點解同一套睡衣仔嘅？因為佢日又砌

夜又砌 

完成!

今晚又砌 仲要話軒軒自己砌完自己~好叻

笑C我

小檬: 媽媽~再砌多次吖。。。 

 (媽媽暈低喇@_@)

我是歌手 ~ ABC song

由細聽到大嘅ABC song 終於可以一口氣全部有音域咁唱出嚟喇！！

現在有請小檬高歌一曲，多謝支持~!!

爸爸激嬲我。。。

前兩日，小檬爸爸激嬲我, 我真係氣難吓!!!!!

點知佢使出絕招小檬出馬

喺我剛瞓醒嘅情況下，

抱住小檬喺我邊叫小檬同我講。。。

第一吓聽到真係笑咗出嚟

已經嬲唔落喇~ 

到夜晚問返佢，已經唔記得呢兩句野!

經我提點之後再講多一次比我錄低佢先~ 

第二句，唔好嬲"爸爸" 我都講錯哂，

變咗唔好嬲"媽媽"添。。。哈哈

自創歌曲 <提子包> + 靜夜詩 ~更新片~

原來之後upload 錯咗段片，而家整返啱先

聽聞而家香港樂壇青黃不接，淨得一兩位歌手，

(啲新歌手我真係一個都唔識)

小檬得知此消息後，突然自己作曲作詞，
推出第一首作品提子包，
希望為樂壇出一分力

再送埋靜夜詩給大家欣賞！
希望大家多多鼓勵!!!

呢個月開始小檬就有咗唱歌呢個concept（有音域果隻）

有時我會叫佢唱ABC，因為聽得最多，但都唔係好成功

反而有一日佢自己突然開金口自創提子包一曲~

真係笑到我碌低!!

靜夜詩就已經唔玩野，講返啱，仲唔使提水添～

不過開始有啲性格，

唔係即叫即做，叫佢做多次會話唔好=_=

新生趣~

之前做嘅飛機師劇集，小檬好鍾意。。

可能有飛機啦～

連帶佢嘅主題曲都鍾意埋，相信佢都係唯一嘅一位粉絲 

到今日有時同佢瞓教唱歌，我問佢唱咩好呀，佢就會話新生趣。

我都唔記得哂全首，所以，求其唱一段。

之前發現佢喺我每唱完一句之後，都repeat 我最後一個字

所以我就試吓同佢咁唱。。。

 原來真係記得識唱少少喇~
我最後鍾意就係佢唱嘅「滋味。」！

而家一兩個字就咁開心。。做媽媽真係好容易滿足！

認 ABC & 123

ABC呢首歌真係由出世就聽到而家，

BB果時佢一喊我就播放同唱， 真係倒返轉頭都識唱。 

而家玩呢啲ABC/123字母板，玩咗一排，

已經認得哂啲ABC／123， 有時佢自己仲一路讀一路砌添。

 

123其實已經識咗好耐，講個1字時 仲話蛇蛇，

我初頭都唔知佢講咩， 後來先見到原來1字底係條蛇， 

可能講到厭， 唔講1字喇。。，就講蛇蛇 =_=

溫。吐。fi。科。

識行識走已經好鍾意呢隻迪迪尼教嘅做體操歌，而家會跟住唱同做動作喇˜˜

溫。吐。fi。科。。。