學校水果日@K2 & PN

每年學校也會舉辦水果日，今年都唔例外！
第一年小檬扮pear，其實都唔係扮，只係著件TEE係啤梨仔。
學校水果日

第二年小檬扮西瓜仔！
小檬學校水果日@K1

到今年，水果日差不多殺到埋身嘅時候，
我都未諗到同未有時間整，今年仲要一整整兩個！
最後一個星期，入直路！問過兩位主角，要扮咩先真正動手，
唔係攪完一大輪又話唔肯就麻煩！

小檬大個仔喇，太卡通未必適合，
於是買咗件黃色tee比小檬，然後簡單咁加啲v扮菠蘿釘，
再加頂帽仔扮菠蘿葉。






妹妹豬呢，當然要扮可愛嘅水果啦～ 
好快就鎖定目標做士多啤利妹妹！

上身搵咗件紅色TEE
剛好RB叔叔之前俾嘅聖誕節tee係紅色，但身上啲聖誕鹿太礙眼，

於是反轉佢著就算，一日半日，影相冇人發現嘅！
淨紅色好似好悶，

又剪啲綠葉襯托一吓加埋個名就完工！

買咗條紗裙，再剪好啲士多啤梨核，

貼上去就得

  

再埋啲葉~

 完成


士多啤利妹妹與菠蘿仔

學校嘅返圖！ 

拎埋個菠蘿仔！！

不過妹妹應該被認錯為西瓜！！哈哈哈

係喎。。又幾似喎！
整吓整吓我都唔知自己整咗啲咩！
唔緊要啦。。。（自我安慰中）

2017 Happy Mother's Day

母親節前一晚，半夜喉嚨痛，
全屋就只有龍角散可以止吓咳！

第二朝，有啲發燒添=___=
見到老公同小檬已經出咗去買花花送比我！

於是頂硬上換返套衫扮吓靚靚

老公安排好哂，搵埋婆婆出去飲茶！

出去之前收吓禮物, 影吓相先

好名貴嘅手鏈呀！！
心心，colorful，i love you 好開心呀~ 

多謝妹妹豬

仲有一束靚花！
有花有葉有絲蝴蝶結!!靚靚

多謝小檬

出到尖沙咀，老公要排停車場，

於是我同婆婆,小朋友先行

行到升降機前面，妹妹豬要我抱，
咁快累？？

 啱啱行咋喎,算啦！
母親節可能要黐住媽咪！(咩原因)

行到去酒樓門口，佢話肚仔唔舒服，
出門口之前淨係飲咗杯奶，

我話可能肚餓，好快有野食冇事！

點知轉前頭就 ~ 嘔 !!
噴射式咁嘔出嚟，
我成個右邊身中哂招!!!!
@@

放低佢又嘔咗一次，
我同婆婆即刻安慰佢，幫佢抹身，
通知酒樓弄污jo地下講唔好意思之後，
就安排到位比我哋坐

婆婆同妹妹先入去，再清潔一吓，
叫婆婆立即order個米粉佢食！

小檬喺妹妹嘔嘅時候，掩住鼻好大聲咦咗一聲！

待婆婆照顧緊妹妹時候，我就叫小檬坐埋一邊當幫忙

我先將衫簡單清潔之後，行落樓吓搵衫買！
小檬就幫助我拎住手袋，跟住我行。
一路行一道解釋比佢知妹妹唔舒適先會嘔，

佢都唔想，唔可以嫌棄妹妹臭，發生事情應該冷靜睇吓有咩野可以幫忙

（其實佢唔使做任何野乖乖坐定。已經係好大嘅幫忙）

入咗間價錢相宜嘅連鎖店，一身臭味嘅我唔敢大遙大擺咁周圍睇，

好在都冇咩人發現，求其揀咗條裙入面試身室著完之後，跟住比錢，

係，直接著住比錢！型！

跟手買套比妹妹豬。
上返酒樓，妹妹豬已經食緊野，

好似咩事都冇發生咁！

結論係妹妹豬唔可以空肚食早餐，飲咗牛奶都唔得，

唔可以空肚坐車點都要有啲野到肚
而頭先嫌妹妹臭嘅小檬返到去，
都有即刻問返妹妹有冇事，算佢啦

我雖然換晒衫，仍然有種揮之不去嘅味道喺到，呢餐茶，好明顯飲得唔暢快！
不過見到妹妹冇事又開心返，我要自我調節心情

飲完茶就拿拿臨返屋企沖涼！

做媽媽嘅，無論邊日咩日子都好，都係要照顧小朋友，冇得偷懶

遇到小朋友唔舒服，亦第一個企出嚟
(包括都係媽媽嘅婆婆)

眨下眼又到晚餐時間，老公已經諗好安排主理(佢)最鍾意嘅打邊爐
（避開人群，難得小朋友又好鍾意食）

見老公同婆婆安排緊，我就同小朋友放下電！
（我叫婆婆一齊架。。不過佢喺都要幫爸爸咋！）

母親節都想小朋友有得玩開心吓

雖然母親節過咗，

我同兩個鬼馬嘅小朋友

祝所有媽媽日日都咁快樂！

綁蝴蝶

新鮮熱辣！

前排見有個同齡嘅女仔都啱啱識咗綁鞋帶，

心諗小檬應該都未識，一來男仔遲熟啲，

二來小檬係啲粗心大意，

沙lee弄匆（低音）嘅嘅人，

連束褲都束到一舊，

一啲入面一啲出面，

食野又亂晒龍，就覺得佢一定未識。

有日見到佢自己try，就慢慢教下佢，

前兩晚就真係識自己綁到蝴蝶結

真係好開心～好感動呀！

雖然唔係好實，不過總算一大進步吖！

妹妹豬成長記錄~3歲2個月喇

生活上嘅一些轉變，令呢到停滯不前。。
心情也需要時間適應，
希望可以繼續。。不定時上映！

打尖！萬七咁多野寫，呢篇一定要打個尖！

<妹妹豬成長記錄>

真係唔好意思，妹妹豬嘅成長由每月變成差不多半年冇寫！

妹妹豬3歲2個月喇

食

一向食得都好嘅妹妹豬繼續keep住（咪講)
飯，餸，湯，生果。豬肉，牛肉，雞肉，魚，菜都食。
最鍾意食魚，咩魚都食，通菜，豆苗，豆腐。。。
大部分食物都食，都有啲話唔食架，不過重點係嘗試完先話唔食！
肯嘗試已經好好

食方面唯一頭痛就係早餐，佢唔係咁鍾意食麵包！

唯有諗啲其他嘅早餐比佢，有時都會照安排食麵包，唔可以太就佢
自己坐喺位就食, 密密食。。見到啲食物會自己主動要求食

食嘅時候都會乾淨過哥哥（唔比較）, 
明明自己食完見到我食又要食。。哥哥食唔晒又會話食埋
為食嘅小朋友真係特別可愛

以前唔鍾意啲食物分開食，要大舊／全部，
而家好啲，不過鍾意嘅最好大舊啲啦

瞓
唔知幾時開始放學返嚟已經唔使nap
有時出街喺車反而會瞓一陣，叫醒佢都OK， 唔會扭計，好好
而家瞓教好癡我，一定要我講故事，講吓東講吓西，
講吓一日回顧！拖住手手就瞓著

自理能力
基本上已經可以做到晒自己要做嘅野，食野，穿外套，
著襪著襪，孭袋。都算係咁，
女仔比心思細密，比較斯文嘅

活動能力
跑跑跳跳已經好叻！ 夠膽自己擒鋼架
大部分時間都係自己行，

有時玩累都會要抱，
平時都算乖自己行
所以呢啲情況當然會抱吓啦

情感發展

冇講佢成半年，呢半年成長得好快，已經唔係BB喇。
完全係一個小朋友，好有自己思想。脾氣好咗（唔好講）
比之前較講道理，算聽話
女仔真係好唔同，好識關心人。我話累會話幫我揼揼，
女仔真係零捨sweet，婆婆你小心行呀，呢到有水會煽架！
我扶住你吖！
我留喺房佢自己出去會好o爹咁話,
媽咪，我出去一陣攞少少野，好快返嚟陪你好冇？？
會攬住我話，加埋甜甜嘅眼神, 我鍾意媽咪。

一日發生嘅事會講得返晒出嚟，一輪咀咁。
唔好話句子，成本書叫佢講返個故事出嚟都仲得！

自己講故事，哥哥喺學校開始要講故事比同學聽，
唔知點解妹妹豬知道，自己又講，真係講得有文有路，
絕對不比哥哥輸蝕

唔知道係咪學咗哥哥，好鬼馬，唔係走玉女路線，
成日整蠱做怪。帶比我哋好多快樂時間！

介片

上年返學前仲未介片嘅妹妹豬，返咗學一個星期左右就介咗片

唔使幾耐未夠三歲嘅時候，係神不知道，鬼不覺嘅情況下介埋夜片！

完全唔使我費心！

 介咗日片之後，臨瞓前去一次廁所之後，就著返片片瞓，

每晚到係乾片起身，兩個月左右，瞓到三更半夜如果要we we會起身，

叫好平靜咁同我哋講，佢要WeWe

（佢哥哥果時戒夜片，夜晚一起身要去廁所就喊到爆燈，鬼晒咁嘈）

有一晚，佢話唔要片片。。。當時我仲驚過佢，怕佢瀨，

又怕自己天寒地凍要起身同佢去廁所，

但突然間又仁慈母上身，個女都咁生性自己肯介夜片，

梗係咩都冇問題啦！

冇著咗片之後都好順利，唔係成日去廁所（可能冬天）

到而家臨瞓前去咗，都唔係先日要起身去，

就算去完，放返落床都即刻瞓著！（勁）

再一次比我感覺女仔係成熟啲嘅

為食事情
有日返屋企停車場落車上樓，突然間大喊漏咗野冇拎，
我以為係啲咩玩具啦。。。
跟住大叫: 我個炒麵呀！
原來佢以為唔記得攞盒炒麵
（食飯食淨咗個上海粗麵，打包比婆婆拎返屋企）
妹妹以為係比佢嘅， 於是落車就大叫！笑C我，
小朋友都係最緊張啲玩具，佢就最緊張自己啲食物！

有日喺九龍站趕住入去廁所，經過藥材舖頭
妹妹話，媽咪我要食芒果，我估佢見到芒果乾，
等是我話好好好，出嚟買。
去完再行過，我喺舖前面搵咗好耐都見唔到芒果乾，
再睇，只見到成間舖前面都係一箱箱花膠!!! 
我就知道佢以為啲花膠係芒果乾！
哈哈哈哈。。笑C我

雖然好忙，冇寫記錄，
但妹妹豬嘅每日成長記錄都一定有我在旁！