父親節 ~ 母親節

前言:
 生左BB之後就好期待自己第一個嘅母親節，
因為由細大都會幫媽媽慶祝，其實都唔係有啲咩慶祝活動，細細個果時只係會同哥哥落街買支康乃馨（真係一支！）
覺得呢一日做媽媽嘅會好有感覺，自己都覺得好溫馨。
所以到自己做左媽媽都會特別期待，雖然小檬未識亦未會做啲咩，
亦唔係要啲咩禮物，第時可能錫我一啖已經好滿足!
今年嘅母親節，爸爸同左我及同埋小檬婆婆嫲嫲去左飲茶，唔。。。。冇咩感覺。
後冇安排啲咩節日，去左探朋友個剛出世嘅細仔，唔。。。。冇咩感覺，
好似平時放假咁。冇出去食飯，因為唔想咁多人，
簡簡單單買食魚蛋粉返屋企同埋藏婆婆一齊食就算。
老公送左一個我唔鍾意嘅牌子嘅袋仔比我做禮物，個size又唔知想點。。。。唔，我唔係要物質，
就算係要，都唔好要一個我唔鍾意嘅牌子吖
仲要我加錢換另一size先叫可以用得到, X交叉Y~

我明白一家人係埋一齊已經好滿足, 但其實呢排檬檬爸爸激親我,所以我先唔係咁開心。。。
唉, 又開始思覺失調!

算啦，既然係咁，等我比返第一個難忘嘅父親節比爸爸你啦！

之前已經諗住買部電話比爸爸，等佢可以幫檬檬影多啲靚相同拍片，佢部IP 3S 已經夠期
於是新款出左之後就訂，好彩剛剛夠時間取到新貨！ 

星期五取到電話後，趁爸爸未返，喺婆婆屋企, 快啲叫小檬攬住個電話影張相

婆婆見到佢咁又笑到傻左。

之後就將呢張相放入電話做wallpaper，

等爸爸一開機就見到
再入埋呢張情深說話入去做開機畫面


星期六晚上，小檬如常沖涼，食奶，玩一陣之後瞓教，通常都係我同小檬瞓教，拍吓拍吓，睇吓轉轉轉之後就瞓著。
我將電話放入小檬嘅睡袋入面，之後叫老公同佢瞓，我話我去沖涼先，諗住等佢睇到，
我已經放喺心口位，點知成個盒, 成舊野咁凸出嚟佢都睇唔到!!

老公只係瞓喺床到睇住佢，我話拍吓佢啦，佢話得架喇，佢自己會瞓架喇。。。。
之後我唯有話沖完涼入房要執吓衫，開返燈，等佢看得清楚啲個仔，點知都係唔得，
我又話：吖，佢手仔唔知凍唔凍呢，我叫佢摸吓，點知摸完兩邊都唔見, 唔通男人就係咁唔細心，
呀仔個心口突然有胸肌激凸都唔見到 ??? Oh NO～
呢個時候佢仲開始瞓埋添！

 於是我話我上吓網先瞓，你瞓先，好彩佢背住我，我唯有摸吓檬檬手仔，等佢醒，或者喊，
等佢去安撫佢，點知呀仔眼瞓得滯，點整都係郁吓郁吓又瞓返。當然因為我唔係咁大力啦）
真係比你兩個激C!!  唉。。。。。。真係冇哂辦法，
唯有將個盒放返喺腳仔下面，唔使銀住佢瞓。等第二朝

6點幾，檬檬肚餓叫，爸爸出左去準備，我就將個盒放返喺檬檬心口，爸爸返嚟一打開，
終於見到喇!!!
Papa: 哇。。。。點解嘅？？
 哈哈！！今次終於成功喇！！

小檬papa：以後可以同你嘅寶貝仔影多啲相放喺電話到喇！
以後嘅父親節，我同小檬都會令你幸福快樂。