送舊迎新～車

小檬爸揸緊嘅車係為迎接小檬嘅來臨而換嘅。

之前係揸緊5座位，不過多個B有car seat 又有老人家，

所以換咗架7人方便啲。

到妹妹出世，多一個car seat有時多埋姐姐，

更加冇得走雞。

見架車亦開始老化，最嚴重最可怕係最近
壞咗冷氣!!
一個二個好似濕水雞仔咁
小檬仲問爸爸" 可唔可以比啲冷氣我呀？"
既然架車已經好多野要整，又要使錢，

於是就決定唔整喇， 索性買過架!!

佢接咗兩位小朋友出院，都算完成佢嘅使命啦。

  

退役喇~ 

送完舊，就梗係要迎新啦

終於等到架新車～

爸爸好錫我地架，為咗我地可以坐得舒服啲，

換呢架大啲嘅新車。

咁啱舅父舅母嚟食飯，食完飯就一齊落去睇新車喇～

如果收埋第三排凳，車尾超大，真係放單車都得。

中間可以walk through

小檬細細粒，行入後座梗係冇問題，

連我都好容易行到入去 

 車箱寬敞，啲高大威猛嘅大隻佬都坐得舒服

 之前舊車唔肯坐car seat嘅妹妹，呢到冇問題喎!

希望真正行車都係咁啦

另一用家都好滿意，因為有得睇DVD，

不過停車就冇得睇，亦唔會改裝喇。

唔想佢習慣有得睇。

有需要先開，平時都係聽吓兒歌算

（唔知得唔得呢？）  

  

 car seat會移返前面  

介紹完喇，好似啲sales咁。。。

 之前架車，雜物超多，

希望呢架可以keep到整整齊齊~ 

好滿意新車，最緊要係有返冷氣。。。wakaka~ 

跆拳小子

妹妹出世嘅時候，豹叔叔一家嚟探我地，

7歲嘅豹仔啱啱學完跆拳道，豹叔叔即時叫佢表演一吓，

佢又唔怕醜喎。。原來呀豹叔叔訓練佢大膽啲，

要佢喺樓下大堂耍拳，哈哈~ 所以嚟到我地屋企梗係唔怕醜啦。

細問之下，原本豹仔之前都係喺我地屋苑會所學（佢地之前都係住呢到）

小檬偏細粒,參加郁動多啲都好喎，又喺屋企樓下唔使搭車，學費唔貴。

於是過咗三歲就報名比佢試吓學。

到而家已經學左兩個月左右，

weekday婆婆帶佢學，婆婆冇影到相，冇圖冇真相，

所以到今日先post吓。

終於我嘅跆拳小子出場喇～

多謝教練幫婆婆影相，先有返啲真相

套衫都係第一堂著咋
呀sir叫我地唔好咁早買，等佢適應咗，冇抗拒，

肯繼續學先好買衫，唔好徙左！

喺屋苑湊仔時識嘅媽咪知小檬學，
又叫個仔一齊學有個伴
佢幫我拍video send比我

我唔期望有啲咩成績，一星期一次
婆婆話佢每次去學都好開心，好鍾意上堂，純粹希望可以強身健體，

等佢多啲運動，好過喺屋企玩!

唔知幾時先可以踢木板比大家睇呢?

靚媽攝影團 by NT

呢張相係用手機架

點解都可以咁靚？？因為係NT影果囉～

而家佢仲免費開班教我地啲靚媽添

 邊個有興趣呀???

http://ientyi.blogspot.hk/2015/05/mama-photo.html#gpluscomments

舅do

小檬好早已經學講野，歲幾尤其男仔嚟講，

講野已經算叻！

亦好快已經成句句子講。

講到咁以為佢講野冇問題，

但其實佢發唔到個F音！

因為要叫舅父，所以我地會留意呢個問題。

初初以為佢仲係BB未讀得正啲音，不過到大啲其他全部都好正之外，

呢個父音都仍然係舅do

火變左躲，fire變左dire。。。

總之所有F音開始嘅字都讀唔準。
我地已經留意咗好耐，諗住佢可能未發展讀到呢個音，

因為有啲音要到某一個歲數先發到。
大大吓應該會讀到, 所以冇理 

之前喺學校有請教過老師，老師叫佢吹多啲bubble練習吓。

我地係屋企都成日教佢，不過佢都係未讀到，

因為有時佢會話"唔識讀嘛。。。"

我亦唔想比壓力佢，於是又放低件事。

到上星期，老師打比我叫我睇吓有咩治癒可以幫到佢，

等下年學普通話之前糾正返,越遲就越難糾正

於是就四圍搵資料。

唔知係咪真係好多小朋友都有需要呢??!!

我搵啲好多間協康會呀，HKU呀，私人呀booking都好爆，

要一兩個月後~如果政府好咁少事似話三年添。。。

於是就問朋友。。好在師姐係職業治療師，

同呢方面嘅朋友都有啲聯繫。

終於book到最快可以上星期六做assessment！

價錢仲有友誼價～yeah~ 

同小檬上到去，個center都好多小朋友佈置。

小檬問我去邊，我就話去搵師姐朋友喇～

媽媽填左份問卷，語言治療師了解咗我地嘅問題之後，

就開始同小檬玩。當然係一路玩一路測試小檬發音係咪準確～

讀哂所有嘅字之後，治療師話佢全部音都好準 (yeah!! )

唯獨F音發得唔準，口型唔啱。

治療話我地知佢做錯咩發唔到音之後， 

就教佢點做喇。

治療師專業當然識點教佢啦。。。

小檬都好快學咗兩吓已經明白道理

跟到方法讀，一讀到就比佢玩汽水機。

老師話佢好聰明，好快領略到，

初時都要提吓佢，練咗5分鐘，

已經將握到個竅門。

(治療方法唔講喇，如果大家有需要我可以比啲資料大家了解吓～)

跟住老師就叫我同佢練習，因為我都要識點練習先得。

咁就完成評估，治療師都印咗啲notes比我返屋企同佢練習。

評估完之後，黐玩咗一陣人地其他訓練嘅課室 

  

今次只係assessment，再返去做治療

（下星期佢地centre full booking，於是約咗下兩星期）

我諗如果到時已經練習好，應該可以唔使返去上堂治療？

可以慳返啲錢，因為治療要2400/4堂，都唔平架～仲要係友誼價黎

不過如果未得就梗係返去上堂，
始終小朋友發音都好緊要

補充資料
的確有啲音未到個歲數可能未發展到, 
可以參考如下

資料由以下網站copy

http://www.masteryhk.com/new/service.html

我諗如果有疑問，就要有專業嘅意見喇。

我自己覺得如果太細，唔好話佢發唔發到個音，

就算教佢，佢都未明白你教佢點發音，都係冇用。

小檬語錄~母子閒談

媽咪：小檬呀。。你知唔知呢畫畫啦，返學啦。。都要比錢架, 所以呢要比心機呀
小檬 : 哦~

事隔一日

小檬：媽咪，我知道返學啦...學畫畫啦，都要比錢架
媽咪：係呀 (感動中。。真係記得) 所以要點呀？？
小檬：要搵錢！！！！！！
媽咪 : =______________=

小檬畫畫班 Lesson 10 / 11~ 大眼仔警察& 海豚

 25/04/2015.

學校教緊community helper，整咗頂警察帽，

落去畫畫又要帶埋落街

自己敬禮，佢話老師教嘅

 啲看更EE都話佢係小警察，佢好開心。

可能係咁，佢今次畫咗隻大眼仔警察。

02/05/2015.

爸爸帶佢去畫畫

我同佢講左好多次動物喇，

不如試畫吓其他。佢就畫左。。。

海豚

我見到話又"畫動物？？"

小檬話唔係動物呀。。係"海洋生物"嚟呀  

 =______=

我嘅挑戰應該越來越大

妹妹豬@14M

妹妹豬14 Months喇!!

(問佢點樣影相，就咁喇~ )

食
都係差不多，通常支奶食食吓未食哂走咗去玩
一見到我地食野，係咁擒，撐住我地隻腳擒埋上嚟添
我地食緊咩都想食(有啲唔比得好煩)
食極都未夠，字典應該冇個飽字
已經脫離食粥仔行列
轉食飯仔，仲要係啲大人飯，
婆婆會比多啲啲水就佢
蒸水蛋，肉碎，蒸魚，盡量係啲簡單餸，
婆婆盡量少調味
水水湯湯都好鍾意飲，婆婆叫哥哥飲湯，
佢就自己走過來, 哥哥真係好多謝佢幫佢頂

瞓
夜晚哥哥入房都會跟住瞓，通常姐姐拍佢瞓，
因為媽咪要同哥哥哥講今日回顧。
姐姐放佢喺床就自己碌碌碌。。。就瞓著，
比之前進步左好多(咪講)
到11～12點，就會醒咗叫吓喊吓，媽媽就要奉命入去陪佢，
只要喺佢身邊就得，同爸爸傾計都唔嘈冇問題。
呢個情況之前一個月日日都發生，但呢個月就冇叫過
之前會三更半夜醒，而家一教瞓到天光（感恩）

呢兩個月成長得好快。
玩具已經識分panda／lion／mickey／麵包超人/rabbit...好多好多
話去街佢就自己走去攞鞋仔坐喺哥哥張凳著鞋，
自己申隻腳出嚟等我地幫佢著鞋。
已經自己喺屋企嚟行去行去，完全唔使扶
認得邊個爸爸/媽媽/哥哥/婆婆/姐姐/舅父/舅母
問姐姐喺邊，識走去廚房。
邊到洗poopoo會行入廁所
問哥哥喺邊？識入小檬床

邊張妹妹床，會拍拍床，點解瞓教，會主僕落枕頭仔
冇開電視，會拎遙控叫我地開。
如果我返咗工，婆婆問佢媽媽呢。指指門口用手示意冇
拎XX比婆婆。。。喺屋企常用招數等佢行嚟行去。
見到樓梯好開心，要自己上落

學野覺得上比哥哥更快，更容易學到，
一次已經識，可能又有哥哥跟住

識講爸爸/媽媽/婆婆/哥哥/姐姐/panda/
lion/book/rabbit/ kitty /貓/包包/呢個/果個/多謝
有啲充滿BB音

識跟住啲歌仔做動作(哥哥果時唔會)
好癡我，一起身就媽媽媽媽，
有時湊小檬去對面畫畫，就冇帶佢去
一見到我著外套，著鞋佢自己就走去拎鞋，
以為自己都有得去，再嚟就攬住我隻腳。
喺屋成日叫媽媽，而家爸爸都叻咗，會要爸爸抱佢攞書書。

超級唔鍾意坐車，唔可以乖乖咁坐好，一定會扭吓!
唔鍾意坐BB車，出世到而家都應該冇坐多過10!
唔鍾意網床，所以放喺廳到用嚟裝雜物, 結果收起冇用!
脾氣比哥哥大，唔鍾意會發脾氣，有時lur地！！
我最憎，我唔會理佢，而家好似知道呢招冇用,
好似有啲改善!
好鍾意落街，自己同人打招呼揮手hello

通常出街嘅人都會見到妹妹就會講...
好多頭髮，頭髮孿毛，隻眼珠好黑，成個公仔咁
拉高左，其實都唔肥豬妹喇。
肚仔都會成日叮起（唔知點解婆婆咁形容）

叫佢錫你要噗一聲。
拎住我嘅袋/電話會話叫媽媽
貫徹媽媽同哥都係好開朗開心！
見到佢啲動靜同笑容真係比佢冧C，好得意～

哥哥坐麵包超人，我又一齊坐～

我都好鍾意公園

搖搖搖

媽媽日本返嚟喇，d禮物梗係著哂上身啦

媽咪話我好浮誇，應該行周星星路線

其實我都有文靜一面

(我好鍾意揭書架)

一見到人著鞋，我都唔執輸架

影完studio媽咪話我表現好，獎勵我去cafe

(其實媽咪自己想去)

喂？爸爸？？？

一揸住電話就叫爸爸
因為我會比電話佢whatsapp叫爸爸

頭髮又多黑又孿, 唔夾起會好凌亂

姐姐忍唔住幫我札起哂

招呼蛇仔明哥哥

哥哥油顏色，我就做妹仔，幫佢收拾

師姐送嘅 frozen 裙

 哥哥嘅夾衣+ 大大嘅酒粒

表舅父送嘅學行鞋仔～

師姐比嘅粟米，冇得開發脾氣～ 

要攬住入房先肯瞓

春麗妹妹

bye bye～下次見！