小遊戲分享

前兩同小朋友gathering時，玩咗個遊戲，見燒腩媽都好鍾意，

可以再分享一吓

近排喺屋企或者喺街
同小檬妹妹豬都會玩呢啲遊戲

小朋友等待期間冇耐性（其實大人都係，不過有時迫不得以）

呢啲遊戲係唔需要道具嘅，或者好少道具身邊一定有嘅

務求隨時隨地就玩得 又學到野

1. 鬥唔笑

大家互相望住對方眼睛 鬥唔笑
呢個妹妹豬都玩得

我對小檬，小檬對妹妹豬都得。

唔好諗住唔笑，咪好慘？

當兩個小朋友見到對方果樣好快就會笑，

唔使道具又會笑到碌地，等車等位等咩...都唔會悶

妹妹豬細個啲，唔使兩秒就笑返。。。萬試萬靈，

gathering時候燒腩仔就叻，可以忍到，

小檬見佢個樣忍得咁辛苦即笑

呢個遊戲去到邊隨時隨地都玩得，

又可以kill time，小朋友又可以笑一餐。。好開心架！

適合年齡，兩歲開始，太細唔知做咩。。哈哈

2. 物品想像

用一件物品發揮想像力

上次去澳門等落船，唔知袋到有個綠色嘅圈圈，

(可能係其中一part玩具)

我就同小檬輪流一人一句，話呢個係咩野嚟，

e.g 用個圈圈扮眼鏡，講呢個係一個綠色的眼鏡，

或者呢係一個巴士手環，

小檬都講到好多，佢講唔到時，就叫佢再留意吓身邊係圓形物品。

呢個係一個鐘，呢個係一個耳環。。戒指。。車轆。。

（用正方型，三角形都得）

呢個遊戲要用句子講，可以訓練埋用句子講野

(開始大，要多啲用句子講野)

可以訓練/發揮想像力，叫佢下次行街留意身邊事物，

會多啲聯想力

呢個妹妹未係好識，不過都可以用啲簡單佢認識嘅物品玩

小檬就不知幾鍾意，講到好多佢諗到嘅野

3.估物品
要喺固定地方，叫小朋友睇住一樣野，
叫大人估（或者調轉，不過小朋友諗會容易啲）
例如，小朋友睇到米奇鼠鼠，
就問係咪紅色架？
係咪黃色架？係咪會郁㗎。。。

調返轉大人睇物品呢
初時要教吓佢地問
小檬問就可以用唔同方式.佢嘅諗法問 
冇咩所謂，深淺自己調校

advance level只可以問" 係唔係" 

呢個妹妹豬未係好識玩，
不過都可以叫佢揸住一樣野，望住問，
佢識答都好叻

4. 找形狀

行街時唔好淨係睇玩具，可以留意身邊事物，

我會同小檬鬥搵三角形／正方形／長方形物品，

圓形三角形容易啲搵

呢個妹妹豬都識少少，圓型最叻，其他學緊。

小檬就advance level 開始學橢圓形，就會搵橢圓形

好似D字就係橢圓形，手袋扣。。。等等

5.找顏色 

適合妹妹豬搵啲基本顏色，紅／黃／藍／綠

小檬，advance level好似啡色／灰色／金色/銀色...

例如：搵灰色，叫小檬見到灰色嘅物品就出聲，

大家輪流講。都係用句子講
我見到銀色波鞋

6.找標誌／警告語

叫佢見到標誌就出聲，再估吓係咩，諗下個標誌點解

呢個只限小檬

先認識一啲比較容易理解嘅，好似公園不准踩踏草地，不准玩單車...

出口／緊急出口/防火門標誌，順便教埋佢出街自己照顧自己嘅能力

7.講英文生字

小檬學letterland，會一人講一個字母開頭嘅英文字。

A～ apple，ant，arrow.....

呢個只限小檬

呢啲小遊戲都係我喺生活上自己諗出嚟嘅。。

如果大家有好嘅遊戲都分享一吓～

小朋友如果可以爸爸媽媽玩，其實玩咩都咁開心啦!!