復活節第二擊@Hea遊澳門 {day 2}

Day 2

妹妹豬都唔係好BB，於是冇安排BB床，冇double bed，只好一個大人夾一個細。

初時我同小檬瞓，不過瞓到半夜妹妹豬叫咗一吓，

我起咗身，於是走去拍返佢，就同咗老公調位。

再瞓瞓吓聽到扑一聲，小檬跌左落床，

佢好似冇咩事咁又爬返上去瞓＠＠

我頭半晚係會用隻手cool住吓佢。。。相信老公一冇cool就跌 =___=

唔知道點解都咁大個都咁反瞓，到底幾時先會唔反瞓？

其實我同妹妹都唔好得幾多，呢個妹都係瞓瞓吓郁來郁去，

所以第二朝我依然好眼瞓。。。

如果可以，我真係想繼續瞓zzzzzzz

不過又點可能呢～

梳洗好之後就去我好鍾意嘅安記，距離酒店都係10分鐘就到

唔知係咪個個都瞓得唔係咁好，

小朋友又有啲扭，大人又冇咩耐性。

不過對住美食心情又好返啲。

好邪惡嘅鮮油多

食完接到信息清EE問我哋喺邊，因為中午約咗佢地同埋舅父哋一齊飲茶，

清EE諗住嚟酒店車埋我哋！ 

真係好。。

咁啱EE屋企其實喺呢到附近，於是我哋就上去搗亂喇～～

間屋好大呀！！ 個景仲好靚～

EE叫我哋下次唔好住酒店，不過我哋驚小朋友好煩惱，唔敢打攪人。

再去聰哥哥間房搗亂之後就走

跟住接返頭先先返酒店checkout嘅爸爸就去飲茶

食咗早餐，有啲眼瞓，又有啲舅母朋友，妹妹豬有啲怕醜，

所以面對美食都冇咩反應，小檬都係食飽，

於是就由得佢地兩個玩就算！

 出外玩，食野就真係差啲～

飲完茶，清EE又車我哋去玩車車～

燒灰爐公園

到咗呢個石灰爐公園，有啲電動車車可以俾小朋友租嚟玩。

要攞飛等

$5/15 minutes 好平~ 

等待期間，小檬就喺公園玩吓先

都唔係等好耐就到

一開始係我同小檬玩，不過小檬唔係好識控制，

烏低身移佢架車，成廿度，我大汗滴細汗腰都斷。
快啲叫發爸爸頂上。

點知個妹妹豬仲難攪，佢見哥哥有車車坐自己又要坐，

但又唔行得入去，好危險，走黎走去，

終於抱住佢，可能有啲眼瞓，又喊又扭落地

終於最後哥哥停俾佢坐一陣。

小檬唔坐俾妹妹豬坐添

小檬都唔係好鍾意玩呢個車，對佢嚟講公園sir滑樓仲好玩。

妹妹豬頂唔住要瞓，

於是走咗去附近cafe爸爸同妹妹豬休息一吓，

我就同小檬睇吓玩具。

睇睇下小檬問我哋點解咁耐都未返屋企？

我話好快喇。。搭6點船就返香港，

小檬話返到屋企佢要去poo poo

行多一陣，小檬又問我到6點未？

我就知佢其實想返屋企poo poo，知佢有需要去。

通常喺街都唔會去得好好，情願返屋企，等到就梗係啦

同佢講不如係度去咗先，

都知道佢坐大人板會唔係好舒服，佢肯去佢應該好急。

於是我踎喺用手攬住佢條腰唔使跌吓跌吓咁，

佢個頭挨晒落我手臂，原來佢話自己啲poo poo臭，

用我手臂遮住個鼻，笑C我

跟住兩個大笑，兩母子此情此景，將來諗返都好笑！

完成之後，妹妹都瞓得好甜，

小檬又話肚餓

要食件cake先

已經冇咩地方想去（或者應該係冇力去）

走去坤記食過early dinner

就上早一班船返香港喇！

上咗船通知一吓仲喺澳門嘅舅父先

後感：

出發之前見天氣報告話係寒冷天氣，唔敢鬆懈，著晒厚褸，

一到中午好天有太陽廿幾度，又熱，除咗啲褸就一袋二袋拎住。

著住厚褸就熱，唔著就爭啲啲，

好在我再著多件外套仔喺入面，方便除咗厚褸都仲有件外套仔。

不過媽咪識為小朋友準備就忘記自己，所以帶左有少少鼻水返嚟，

不過好在好快冇事

呢啲乍暖還寒天氣就最麻煩！

其實第二日行程想再去滑草，不過真係好支力，所以冇去，

一日玩一日休息就最好。

妹妹豬終於都叻咗啲冇喺船扭計，記得第一次扭到暈，真係好麻煩。

小檬公公有啲生意喺澳門做，於是小時候嘅小檬媽一家都會跟住到澳門玩吓

長大後，都久唔久想去行吓見吓爸爸啲朋友，自己啲朋友

去返以前橫街窄食吓野。

不過其實我都係鍾意以前嘅澳門多啲。。。