兩隻小豬去溜冰

每次經過溜冰場都話同小檬去試吓玩，

不過小檬都會話唔好唔好（佢要一輪先接受新事物）

已經講咗兩三個月，呢兩日天氣唔係熱到暈就係突然落大雨，

最適合就係室內活動～

於是就再一次提議去溜冰，初頭又話唔好唔好，

唔知老公同佢斟咗兩吓講咗咩之後就肯去！

唔理喇。。佢肯去玩就得。

Element the rink

每位入場費$20

收費：每分鐘計 $1/1分鐘

租鞋唔使錢，如果唔玩，都可以有20分鐘免費入場，

家長可以幫小朋友換吓鞋，
之後等小朋友自己入去玩（當然講緊大啲嘅小朋友啦）

入去攞鞋先，首先度吓腳仔！

跟住職員就俾啱尺寸我哋

靜雞雞講，小朋友滿三歲先玩得，

妹妹豬當日就俾"被三歲"（唔係我講架，唔好話我呀！）

於是有得玩=p

知道冰場特別凍，已經準備定外套，

亦知道有機會跌，

於是就等小檬著長褲，

妹妹豬呢，我知佢一定唔會落地，

於是就靚啲著條裙仔！

仲有厚襪,因為溜冰鞋好硬

(但見其他小朋友原來發覺仲可以準備安全帽／護膝／護諍...)

臨行時諗同兩隻豬仔換鞋都係一大挑戰，雖然事前已經著定厚襪，

不過都有啲驚因為小朋友好大機會話對鞋咁硬, 唔著呢對鞋！

到有幸著完，又會話著咗行唔到，唔著！！

不過可能兩個都好期待溜冰，於是好順利著完！！

著好爸爸就去租兩隻海豹＄150/隻 (min 2 hours)

反而呢到比較貴，因為玩幾耐價錢都係一樣，

如果小朋友玩兩三分鐘突然扭計唔玩都係要俾錢。

四個著好晒鞋，之後就行去閘口用八達通俾錢，

小檬見爸爸著住溜冰鞋行到一拐一拐，

覺得好好玩，又好心急試吓自己行

我呢個緊張媽咪又驚佢跌，

但自己著住溜冰鞋行動唔係好敏捷，

小心亦亦咁追住個仔 =p

那邊廂原本爸爸行得仲差！ 

一個拖一個, 碌下碌下咁行（其實妹妹已經係姐姐抱住到閘口）

再要推埋隻海豹出去，好狼狽，突然間覺得好捉蟲，

應該要搵多兩個大人一齊玩，幫吓手。

一輪混戰之後, 終於成功入到場！

我孭住個斜咩袋仔淨係裝電話，原來唔俾，

唯有電話放喺爸爸褲袋，

相機唔喺自己手，唔方便，變成相得幾張！

兩個小朋友好興奮呀

我好快就記得返點溜，如果唔用seal都有啲驚跌

隻seal推住溜其實好正，唔會驚跌～

反而爸爸就唔係好得

（證明佢冇咩係冰場識女仔！）

一家大細一齊玩~好開心呀~~

螢幕前面嘅你

感唔感覺我地嘅興奮呢？

一開始都唔敢叫小朋友落地，怕佢地跌親之後唔敢玩，

行多幾個圈之後就試吓叫小檬落黎玩吓

不過其實我自己一個就得，仲要扶佢就有啲淆！

都係俾佢體驗吓就算，第一次唔敢嚇怕佢！

妹妹豬呢。。。就仲難控制佢行定企，

於是就冇比佢落添～

玩多幾個圈妹妹豬就話唔玩，同佢入去搵姐姐休息吓。

我就同小檬繼續玩, 跟住連小檬都話唔玩

我就一個享受下, 可以無拘無束自己一個玩!!
返番去那些年~ 少女時代 

記得我小時候第一次接觸溜冰係同6年級同學仔一齊去，

果時都係扶住側邊行吓行吓

到少女時代就通常考完試，同啲同學一齊輕鬆一吓，

好叻又唔係，不過都可以自己一個溜到。
成班同學一齊玩好開心
年少多好...

N年後嘅今日同埋小檬／妹妹豬一齊溜，

真係發覺時光飛逝！！！

臨走撞到小豆一家，原來小豆有學溜冰～

學唔學溜冰我就冇諗過，只係想小檬唔好咩都話唔試，
希望佢可以容易啲接受啲新事物, 接觸多啲唔同嘅活動！