9.30.2016

宿一宵

小檬有個好錫佢嘅表舅父, 
直情係契爺一樣!
由小檬6M時, 喺外國返黎stay工作之後,
大時大節慶祝活動放假hea玩一直都陪伴我哋!
有日講開叫小檬去佢地屋企留宿,小檬一口答應
梗係啦。。
舅父話買定10副lego等佢去砌喎!

不過呢個"宿一宵"我同爸爸就唔係咁睇好。。。
事緣有次返婆婆屋企食完飯, 話不如留喺婆婆屋企,
有我呀哥,即自己舅父同佢玩,
佢初頭都話好架,點知我哋同妹妹話走嘅時候,呢個小朋友就唔制!
要跟我哋走!

所以今次宿一宵,大家都買佢唔成功,玩到咁上下我哋走時應該已經話走!
最好笑就係發起人都話未必成功
我哋都叫佢唔好投資咁大(佢話會預備特別野比佢喎!)

全部一面倒買宿一宵唔成功。。。我唯有以反姿態出現,買佢成功啦!
(其實唔係純粹賭氣,因為果晚小檬嘅活動係又朝早9點開始。。
到晏晝玩茶餐廳,到夜晚同表舅父食飯就返佢地屋企,
繼續玩lego。。真係應該好快冇電!而且佢除左我哋之後,最跟就係呢個舅父,
所以我都有啲信心贏架!)

為餐飯,點都搏一搏!
玩完茶餐廳體驗之後,就同舅父食飯

唔係跟舅父搵食,一家大細兩個小朋友好難喺呢啲咁迫嘅餐廳食,
其實都幾好食,不過真係迫啲

買完lego跟住就返舅父屋企!!

哇。。。一睇我就知道我應該贏
因為舅父為咗佢嚟留宿,買咗個大帳篷比小檬當露營!!!

當咗泳池扮游水

呢隻妹。。碌來碌去

兩個玩得好開心

比我都想留喺到玩呀
(不過不停比人話唔好咁老定!!)

舅母仲整左啲星星燈,比佢喺到睇星星!!

同舅母談心中

連妹妹豬都好開心。。。行嚟行去玩公仔!

玩咗一個鐘到,我哋就話走返屋企喇!
(因為要預時間唔成功折返返嚟接佢,所以唔能夠太夜走!)

臨走前不停吩咐小檬要聽舅父母話,要有禮貌,
出街要拖住舅父母。。。下刪二百字

講完Bye Bye我哋就走,
以為唔肯走嘅妹妹好合作
話要返自己屋企喎,冇話扭要喺到玩

小檬已經砌完一份lego,舅父要佢仲咗涼先走,小檬即刻走去沖!
臨走就見到小檬除左衫舅母準備同佢仲涼!

上返車,個心已經諗唔知道佢地攪唔攪得掂。唔知肯唔肯瞓。。。
返到屋企,攪掂妹妹瞓咗之後,就開始收到相。。報告情況!

11點幾仲玩緊lego

睇電視

12點幾就入帳篷瞓。。。

到12點幾就話熄晒燈瞓緊,檬爸唔使返去接佢,先安心去沖涼瞓教!
雖然係咁,我哋都話三更半夜可以打比我哋,即刻嚟接仔!
初時都諗吓個仔,不過我都實在太累,好快都瞓著咗冇諗喇。。。

第二朝,9點幾已經見到兩個喺到睇卡通片,

跟住就陪舅父跑步食早餐,去公園玩,
食壽司食雪糕

問妹妹哥哥喺邊,佢都知道哥哥喺舅父到瞓。
呢邊箱我哋就只係湊一個妹妹,比較輕鬆。
喺屋企hea咗半日,行吓街
到下午5點我哋就接返小檬!

一上車,就已經瞓咗!!
夜晚問佢都講得返玩咗啲咩/食左啲咩..

估唔到今次我爆大冷,贏到餐飯, yeah!!!

今次都係一個好好嘅體驗
可以試吓原來小檬都夠獨立
可以唔使爸爸媽媽喺身邊都得!

亦比我試吓個仔唔喺身邊嘅感覺, 都冇話擔心,
因為舅父母都好細心,亦好錫佢
唔會太擔心
其實我心情同平時返咗學差不多

玩過返尋味,小檬已經再約舅父下星期去佢屋企喇。。。。
睇嚟呢次舅父有排忙喇!

12 則留言:

  1. 小檬好叻喎~ 係咪個個阿媽都會咁呢, 我又係成日想晉晉去姨媽屋企宿一宵, 不過未成功~

    回覆刪除
    回覆
    1. 我有唔係話好想試吓所以咁安排,而係舅父都又想佢去玩吓。。咪試吓問佢會唔會。
      都幾好玩吖。。睇吓跟人哋有冇問題,自己人又唔使太擔心!(乘機偷吓懶!)

      刪除
  2. 個帳篷+星星真係無得輸,我係小檬都唔走XD

    回覆刪除
    回覆
    1. same here...我好掛念少年時成班好朋友去camp睇星星嘅日子

      刪除
  3. 小檬好叻仔呀﹗燒腩仔兩歲時試過自己一個去婆婆到留宿幾次,不過佢呢期黐媽症好嚴重,我暑假時問咗佢幾次留喺婆婆到都話唔OK,就連爺爺嫲嫲屋企有姑姐陪住瞓都唔OK

    回覆刪除
    回覆
    1. 小檬呢個舅父錫到佢燶,所以應該冇問題
      其實都係細,黐住屋企瞓都好正常, 佢唔肯都冇得迫或者利誘
      我哥哥細個時比呀媽帶咗返家鄉下,就算有媽媽係到,夜晚都扭要返屋企,果時婆婆真係先晚冇得瞓 =p

      刪除
  4. 表舅父舅母咁有心去佈置張床,成功吸引到小檬。小檬都大個仔啦,可以去「露營」唔洗父母陪都得,叻仔!

    回覆刪除
    回覆
    1. 舅父母真係花晒心思令佢開心架!
      小檬由細到大都比較獨立。。係我呢個呀媽要小小時間適應吓

      刪除
  5. 嘩...表舅父舅母好錫小檬呀,為咗留佢係度過夜竟然咁花心思,真係要俾十個讚呀~

    回覆刪除
    回覆
    1. 佢兩個真係好錫佢!感恩!

      刪除
  6. 小朋友0既潛能真係估唔到架~

    回覆刪除
    回覆
    1. 係呀。。有時真係唔試唔知身體好!

      刪除