一年一度學校旅行，係媽媽充滿期待嘅兩兄妹第一次學校旅行，
之前擔心未好返無緣旅行，
好在小病剛癒嘅小檬，經過一晚之後，
第二朝乖乖精神自動起身冇扭計！
而妹妹呢。。。瞓得朦朦慫慫咁換衫準備出門！！
去到集合地點，婆婆已經到達，有任務在身嘅我，
同小檬班一啲熟悉嘅家長打個招呼
照顧一吓吓姐姐婆婆小朋友之後，就去幫老師手！
忙完一輪返到嚟，見到妹妹豬喊，
原來有個媽咪知道妹妹未食早餐
（其實唔係冇食，當日佢唔肯食麵包，比咗啲餅佢食就算）
分咗自己嘅三文治比妹妹，
唔知咩事，妹妹就撲埋喊！（又係怕多人，怕人睇住佢）
收聲之後帶佢去見自己同學仔諗住好啲，都唔係咁鍾意，
同自己班老師打個人招呼後，又喊過！！
老師都驚訝平時乖乖嘅佢，發生咩事！！
唉。。。。。
順利上到車平靜到達。。。爸爸就揸車入去, 方便走時唔使限制時間
先黎一張到此一遊
又係咁。。。耷晒頭，唔肯望鏡！
因為係佢唔熟嘅家長影相！唉。。。
妹妹先玩集體遊戲，安排咗姐姐同婆婆同小檬跟住啲同學仔家長一齊玩。
心情咁嘅妹妹豬，去到當然係呆！
唔喊就算，
我同佢玩嘅第一個遊戲都算肯玩嘅！
到第二個遊戲爸爸同佢玩，
校長見到我同我傾咗幾句，
轉個頭就見到淚流滿面嘅妹妹豬
加有個人怒氣沖沖望住我。。。
"個女喊呀。。攞紙巾啦仲傾！"
（冇講出口，不過面部表情應該係咁講..
唉。。我。。咁。。。大佬。。點呀。。。下刪三百字）
比人攪到心情都唔好埋嘅我，差啲大合照想開片！！
呢波未平，那邊廂婆婆打嚟話小檬唔肯同其他小朋友一齊去餵馬。。
話要嚟搵我哋～
唉。。。好地地又唔肯玩！
呢個扭檸完一輪，果個扭吓計，天氣爆熱之後，心情仍然充滿怒火！
到哥哥玩集體遊戲，好在好合作／同啲家長又熟絡啲，心情都好返啲 (我)
影埋大合照就自由活動。。。
撈吓金魚，跳吓彈床
好快就到食飯時間！
眼見對面嘅女同學，食飯有文有路，唔會跌到周圍都係，
連K1嘅細佬都識食雞，唔使剪肉，
我就發覺小檬真係有好大進步空間！（唔比較！）
跟住就自由活動喇～小檬夠膽擒上好高嘅繩網
肯自己行條獨木橋，又突然發覺佢大個仔咗好多！
小檬玩繩網嘅時候，妹妹豬頂唔住瞓咗一陣，
都差不多時候離開，
快手影返張合照先！
終於都算成功！
一路行返出去上車嘅時候，
妹妹開始話個肚仔唔舒服。。。。
突然仲嘔！！！！
好在妹妹有衫換，嘔完之後舒服啲。。
可能一冷一熱？
可能哥哥傳染比佢？？
唉。。。回程繼續嘔咗一次。。。
第二日又走去睇醫生～
醫生話有啲感冒菌，所以唔舒服嘔！
好在休息咗一日，星期一已經冇事！
一個病完到一個，
媽媽實在好累！
這趟旅行不太開心。。。
期望下年！
