學校旅行~前傳< 病>

眨下眼又到第一次兩兄妹一齊學校旅行，
真係期待到不得之了！

不過原來好多野都係自己一廂情願，幻想通常都係好美好嘅.....

先好簡單講吓旅行前呢星期我哋嘅情況，

一個字能夠總結到，就係病！

星期六嘅突然返風橫風橫雨轉天氣，

攪到我立即病病哋超級傷風！

小病是福，睇咗醫生休息咗一日。

到星期三都未有好轉，瞓瞓吓教都可以打克痴流鼻水。。

夜晚再去睇醫生。

食完藥，個人都迷迷迷糊糊，

除咗正常呼吸食飯沖涼返工，

其他有建設成同冇建設性嘅野都冇理過！

到星期三半夜，食完藥，

繼續進入迷離境界嘅我，

突然聽到個仔喊！

瞓緊個心都諗點解好似幻聽咁！！

又突然間聽到婆婆叫女呀。。。女～ 

我就即刻成個彈起！

飛過去睇吓發生咩事，

原來小檬嘔！

快手抱起佢出嚟坐好，安撫大喊嘅佢，飲咗啲水坐咗一陣，

問佢仲有冇咩其他唔舒服！

有冇仲想嘔，又話冇。。。。

於是換衫，清潔，換床單！陪佢坐咗一陣，

講吓其他野，個人又好精神，好精靈喎！！
個人好正常，好乖仔，同頭先嘅惡魔上身嘅佢，完全兩個人！

諗住可能食野頂住唔舒服，嘔咗舒服晒，跟住就入返去瞓！

雖然個人眼瞓，但啲醫真係食到好wing，

碌碌吓先瞓得著，突然間聽到又叫我，

過到去冇事發生原來真係自己凝住。

過咗一陣又係咁，今次就真係叫我，原來小檬又嘔！

嘔咗落婆婆床，小檬好生性，仲同婆婆講對不起！

又一次清潔。。。

小檬又係好精靈，話唔想返入去瞓，

驚又嘔落床，唯有同佢喺客廳瞓！

到第二日，完全冇事，於是繼續返學。

堅持唔肯睇醫生嘅小檬到夜晚返到嚟又嘔，又話肚仔好痛，

好在老公可以安排早啲返香港，於是夜媽媽，同小檬睇急症！

醫生好詳細咁檢查小檬。。。撇除咗盲腸炎／腸疊腸／小腸氣。。。

應該係感冒菌作怪。

 同醫生要求，回答已經可以食藥丸i／o 藥水，

應該係成晚最開心嘅一句說話，

因為再唔使同小檬因為食藥水而軟硬兼司，

大吵大鬧，喊苦喊忽都唔肯食而煩惱！

好喇。。。攪咗成晚又食咗藥，

小檬到第二朝都好累，冇咩精神，

連是日outing 都話唔去想留喺屋企瞓，我就知佢真係唔舒服！

請日假等佢好好休息啦，雖然難得一日outing 都冇得去，

不過人生就係咁，唔係樣樣事都盡如人意！

有啲事情唔到人去控制。。。

而第二日係一年一度學校旅行大日子。。

小檬又點呢？

待續。。

p.s.留意病到得返半條人命嘅媽咪經兩晚折騰之後，
繼續準時返工，緊守崗位！
實情眼瞓辛苦到極點!