9.06.2016

兩位上學的小孩

妹妹豬返學之後,家裡就有兩位上學嘅小孩。
當媽媽的,便要照顧兩位小孩嘅功課,手冊,學校大小事務。。


幸好已經熟悉學校活動嘅安排
妹妹豬只係N班,冇咩功課,
頭幾日收到老師電話報告近況之後,就冇收到電話
其他收到電話嘅媽咪都係小朋友有啲事
no news is good news
直至頭先啱啱再收到老師電話,
話妹妹豬放學條片片都係乾嘅,
即係可以試吓唔著片片返學
(好緊張)
估唔到係屋企一啲都冇進展嘅妹妹,
啱啱返學最叻就係介到片!

老師有話佢有時會坐得唔好,郁來郁去,周圍望,
不過冇喊,聽老師話,好鍾意返學已經好夠。

而小檬哥哥呢。。上咗K2後,唔再係畫線條,
需要認真寫字喇,每日都有寫字練習,
對於剛開始學寫字嘅小檬,
我唔會比太大的壓力,
唔要求寫得靚,只求完成便可!

大約10至15分鐘也可以完成一樣。
平日半小時也可以做完。
但有時做做吓,都會話累,
當然,如果冇心機點寫都唔會好(或者唔會做得完)
所以都會叫佢休息一吓再做,
其實我唔係太鍾意呢個方法,
因為我想小朋友知道完成晒先可以玩。
但亦考慮到佢都係啱啱上K2,多咗寫字,
如果一下子迫得太緊,怕弄巧反拙,
而且老師亦教可以完成部分,輕鬆一吓。

K1成年認字再加埋而家寫字,小檬已經認吓字
有日學咗寫個"土"字,佢見到眼睛個睛字都話見到個"土"字(頂部),
仲話加一橫就係個"王"字,又話加多點就變公主個"主"
("主"字未教果喎?!?!?應該係睇"公主"學識嘅)

又問右邊下面加一點,點讀?
"玉"?
喺邊到學個"玉"字?
佢咁答我
 " 冇邊到,好細個已經見到,不過唔識讀之嘛!"

佢令我覺得好驚訝!係咪真係認得架???
點都好,佢肯問咁多有興趣知點讀,已經好令我開心~

K2另外一個大議題就係開始預備小學。。
需知道我哋嘅開始係需要好耐嘅,
所以而家講開始已經好適合
前一兩日先聽到有人話啲K2家長好快變晒怪獸家長,
係成班都變,好似病毒咁傳播。。
一竹篙打一船人,
聽完有啲唔開心,
係咪太濫用呢個怪獸家長嘅名詞?點解個個都變呢?
相信每個家長都最了解自己小朋友嘅特質,
會比最適當,最好嘅自己小朋友,
又點會個個都係呢??
有人係但一定唔係全部都係

而家做家長最難嘅係點先算適當?點先算夠?
我唔會因為一句而唔做,
但亦好肯定有試過因為咁, 如果做得太多, 
驚自己會變成別人口中嘅怪獸

講完一論,
做父母嘅總想為仔女設想。
認為自己啱嘅事

因材施教,每家教育部嘅策略都應該會唔同,
而同一家庭的兩位小孩也可能資質性格受教情度不同,
而未必可以接受同一教育安排。
沒有人比父母更了解自己嘅小朋友,
當父母的,
為你自己的小孩安排你認為最適合嘅便是!

小檬&妹妹豬,兩個拖住小手上學去
繼續享受學校生活!
爸爸媽媽會在你們背後!! 

10 則留言:

  1. 加油檬媽, 其實冇需要為怪獸家長一詞而唔開心啦~ 你講得好啱, 家長們只係想比最合適既野比小朋友, 每個小朋友發展都唔同~

    回覆刪除
    回覆
    1. 多謝晉媽~ 我冇唔開心,只不過覺得唔應該話所有都係,我距離怪獸應該好遠
      自己的事,自己懂,或者有懂我的便可以

      刪除
  2. 依家啲人對怪獸家長一詞用得太濫,所以唔好放响心度,只有爸爸媽媽最了解自己嘅小朋友,自己覺得啱就得。加油,撐你!

    回覆刪除
    回覆
    1. 其實唔係話我,不過我覺得唔應該話全部都係。係又話
      唔係又話。。況且,做幾多先係,點先係,家庭背景,小朋友資質唔同,已經好唔同。

      刪除
  3. 每個父母有唔同嘅教育主張,最緊要自己知自己做緊咩就得,始終小朋友係自己嘅,唔使理人哋點睇

    回覆刪除
    回覆
    1. 其實又唔係話我,不過我唔明點解要話全部都係,我只係覺得唔應該咁講。。話哂全部家長都係

      刪除
  4. 在大海中堅持自己想法的肯定不易,只要知道自己的想法,而另一半又能配合,孩子亦能力上兼顧到;繼續開心返學便是了。

    回覆刪除
    回覆
    1. 係呀。。堅持自己。。唔好比較!大家加油

      刪除
  5. 香港讀書唔容易,做家長更艱難,加油呀!

    回覆刪除