3.14.2017

9男女5天大阪自駕遊 Day 2~ 神戶麵包超人館

離開動物園之後就到神戶麵包超人館。
玩完大半日,之前係動物園已經瞓咗一教嘅妹妹
又瞓咗zzz zzz 坐車最好瞓

到著! 
啲停車場好爆!
不過好在周圍好多停車場

好快抱住嘅妹妹又醒埋

喺附近已經見到好多小朋友拎住啲汽球,
個個都好靚~
絕對靚過香港果啲,如果拎得返黎我一定買!
同小檬講影張相先,一陣睇吓有冇時間先買
(媽咪講大話,o殊!!)

我哋一家大細入館, 其他家人就喺側邊個商場行


其實館嘅範圍唔大,不過對咩都玩得一餐嘅小朋友嚟講,就好夠喇!      
    影吓相



扮煮飯

變飯煲


做細菌小子

賣雪糕

整麵包

扮狗仔


麵包超人劇場開始喇。。
雖然唔知佢講咩,不過都照入去坐吓啦~

 麵包超人一出啲小朋友好開心~
小檬同妹妹豬就礙於言語不通
就冇其他小朋友咁興奮~

不過小檬好投入跟住唱首歌

冇睇完就走咗,趁冇咁多人,可以玩吓條彩虹滑梯

叫小檬要等埋妹妹,佢真係有轉頭留意妹妹!乖仔

因為舅父想我幫手拍啲片,所以冇影相,睇返片發現啲職員好有愛心,
小檬sir到落嚟會拍手話佢叻叻

同會拜拜妹妹豬!
香港嘅。。。應該會冇咩表情=___=









有個公仔用小朋友影相呀~ 
小檬居然知道佢叫炒麵包超人!


畫公仔整帽帽呢個活動啱妹妹豬level

畫畫畫




扮老師




最後玩埋呢啲彈彈波~


平時貼身保護住佢玩嘅媽咪,嚟到日本覺得安全啲(咩道理?)
就尤佢自己彈

結果妹妹豬自己彈嘅時候,唔小心彈咗落地,
撞到個鼻。。好在都唔係好大力~
又冇喊,淨係話
好~痛~呀~

喺出面影埋呢個麼天輪
就落返樓下商場

見我哋咁瀟灑,其實呢到得十度八度,
入館之前舅父將我我哋啲褸放晒喺車度,等我哋玩得輕鬆啲,
呢一刻又未搵返舅父攞衫,所以快手影咗一張相就走

落樓下行啲shop,點知仲見到啲舅父母婆婆哋喺麵包超人呢個商場!
原來佢地喺到睇麵包超人表演(免費)
又揀緊禮物比妹妹豬!
佢地買完行呢次真係行去側邊商場喇

跟住我就好似狂風掃落葉咁用最快嘅時間行麵包超人shop,
因為要快快會合返佢地!
買完又好似冇買過
(唔夠喉,唔夠時間,好似未睇哂咁!)
玩住等媽媽中

會合返大隊行隔離商場。。。正當女士們入咗sanrio時,
婆婆入嚟同我講,爸爸拖住嘅妹妹話肚痛!!!
婆婆話可能係肚餓!
於是婆婆就同爸爸喺隔離買卡落C薯片比妹妹食
冇錯,零食能醫百病!
做呀媽嘅我就繼續購物,連小檬都唔知去咗邊
應該係愛人表舅父拖住去咗睇玩具
(平時慈母嘅我去咗邊??)

混亂完一輪,就搵間餐廳食個early晚餐喇!
滿載而歸

跟住就揸車返大阪酒店!

返到酒店同小朋友沖完涼之後,
兩位小朋友唔使一分鐘瞓咗落床就已經瞓著!
yeah~叫婆婆過來同小朋友瞓住先,
因為呢晚Team A嘅爸爸都同我哋一齊夜浦!

冇揸車出去喇。。喺附近搵食!
好多都開始關門,有啲又煙又暖氣太焗,呢啲度食, 我諗我好快暈低。。
終於搵到間!!!

有啲猶豫又唔太肯定嘅情況吓order啲野食,哈哈。。。
cheers!!

以為叫咗啲串燒,原來係炸物,連牛肉都炸
原來炸物係大阪名物!

嚟咗第一碟冇叫嘅青瓜加啲沙律漿,應該係送嘅


好快又嚟第二碟
我哋冇叫應該都喺送嘅....
好奇怪侍應keep住拎呢碟嚟
圍住打四圈咁!

我哋開始懷疑。。再問問侍應,其實都唔明大家講咩。。
數量同表舅母叫嘅雞翼數量相同,再望望,
呢碟青瓜就係喺雞翼嘅下面!!
應該就係咁攪錯~ wakaka...

不過我哋唔知道係我哋指錯,定係佢睇錯,
呢個言語不通嘅情況下,係冇可能知道真相嘅

呢班浦友成晚就笑呢碟野!

有啲蝦碌日後諗返講返先開心~ 

2 則留言:

  1. 麵包超人館呀﹗我記得我想當年行間shop又係行極都未睇完咁,kakaka...

    回覆刪除
    回覆
    1. 我諗喺日本行街喺永遠都唔會夠嘅~

      刪除