妹妹豬@27M

妹妹豬27個月喇!!

食

開始揀食物有啲會話唔食。。我都唔係好記得係咩，

不過出現次數唔多。

近期鍾意食嘅有龍眼，通菜

唔多飲奶～

朝早已經可以唔使飲，keep返夜晚飲，

一如小檬，都係樽飲，跟住瞓教（冇眼睇）

瞓

 夜咗瞓，尤其放假去街之後，冇之前咁準時入房。

每次入房陪瞓嘅人選都唔同，

不過好快入到去又要轉人。。。越來越長時間先瞓得著

 zzz zzzz

活動能力

未係好識跳。。沿哋跳un吓un吓就當跳咗，好好笑

上個月嘅觸目驚心嘅跨床仔，

教過唔可以自己跨之後
今個月真係少咗

自理能力

好多野都自己做，食飯／飲水／抹咀。。。

自己著褲仔，自己孭背囊，千其唔好幫佢，一幫就麻煩！！！

會重覆三千次講"妹妹自己~妹妹自己"

說話能力

又叻咗好多，已經一句句子，有前文後理。

落咗車，吩咐我哋 "媽媽抱妹妹，爸爸自己行"

媽媽啪開安全帶之後，比隻手指公我，之後話"媽咪好叻！"

行得快，又會話等埋妹妹呀。

問返佢今日食過咩，做過咩都講到。

情感發展

開始揀衫著，試過俾哥哥啲牛仔褲佢，佢唔肯著，

鍾意啲粉紅色／花花／波點／花邊嘅女仔衫

到公園繼續會投訴啲小朋友玩佢條滑梯

用手指指住人，已經不停講要一齊玩，

唔係佢嘅。。

但有時候又會叫小朋友一齊玩。

好鍾意玩，好爛玩。

好鍾意啲女仔公仔／BB。。唔係男仔頭。

有時候唔啱佢心意，會突然扭計喊，

仲要係好激烈果種，

唉。。。脾氣真係差過哥哥（唔比較唔比較）

開始怕羞，會話唔鍾意啲男士
(佢頭號粉絲好傷心)

睇電視，會話鍾意啲靚姐姐

好多語氣口吻都學晒哥哥 "媽咪你下次買呢個俾我吖"

妹妹好為食，咩都食，有日我講笑問佢（其實只係我識笑）

媽咪問：妹妹，你咁為食 你有咩唔食架？？

妹妹答: 核核同皮皮 !!

（因果日咁啱教佢食龍眼啲核核同皮皮唔食得）

好識冧人

我扮整親會即刻錫返我，攬住再o爹o爹豬咁叫媽咪

我扮喊又會即刻攬住我錫我。

又成日話我鍾意媽咪，跟住爸爸又會話"我又鍾意媽咪"

跟住明明玩緊lego嘅小檬哥哥
又會撲埋嚟話"我都鍾意媽咪"

呢個畫面
應該係我最好嘅禮物

比起哥哥妹妹豬真係o爹好多
 （唔比較唔比較）