小檬賣旗日

好緊張呀～

呢日係小檬人生第一個賣旗日，

其實係我緊張啲, 因為都係我第一次賣 =p 

(老公話冇理由。。。咁小學/中學時代學校真係冇安排過嘛～)

小檬學校會揀d幫助兒童嘅機構先賣旗～ 

今次係防止虐待兒童。

天氣報告一早話星期六嘅天氣有雨，仲有狂風雷暴!!!

賣旗遇正落雨真係最煩惱～～

賣旗係學校地區，都係婆婆屋企果頭，

於是就一於喺婆婆屋苑樓下賣

如果真係天氣惡劣小朋友都可以即時返婆婆屋企，

或者休息唞吓都好。

賣旗前一晚，小檬遲遲唔肯瞓，我哋話你再唔瞓，聽日就唔知醒賣旗。

點知第二朝，小檬真係7點幾就彈起身，

同我講: 媽咪我知醒起身賣旗呀～

而家大左，真係知道第二日有野做，

就會自動彈起身。

除咗姐姐，我呢個做媽咪嘅永遠係最早起身果個，

自己梳洗好同姐姐執好晒野，就攪掂一個到一個，

最後KO爸爸。都可以按我原定出門嘅時間。

叔叔姨姨早晨，可唔可以幫我買支旗呀？

旗袋好長呀

（好在尋晚已經用橡根綁好較啱長度）

媽咪梗係要做第一個幫襯小檬架啦～

練習一吓先

跟住到爸爸喇~ 

最後又點少得唔執輸嘅妹妹豬呢

熱身完畢，正式開始喇

做媽咪嘅，梗係做佢assistant啦

除咗我，仲有呢個小助手呀～

一開始，小檬都有啲緊張，不過為咗幫人同快啲賣完，

我一見到街坊就鼓勵小檬開口問

姨姨早晨，可唔可以幫我買支旗呀？

我又喺側邊加把口。

好多街坊都好好，都肯買

有啲明明喺前面已經買咗，

見到小檬啲特燈走埋嚟再買。

有個叔叔俾咗100蚊我哋呀！！

佢唔係話冇散紙，特燈拎一百蚊架。。（好感動）

(其實唔係呢個叔叔。。哈哈)

有啲姨姨婆婆會問小檬幾多歲，有啲就會摸吓佢個頭，

話咁早就起身賣旗咁乖。。。

當然有啲扮聽唔到，話冇散銀（其實可以俾紙幣架 =p ）

小檬自己一個就手忙腳亂，又要拎住袋俾人入錢，

又要搣旗俾人。所以我都會一齊幫手

有個叔叔就要求合照。。。哈哈

咁近，小檬大fans婆婆梗係落嚟支持吓啦～

買到成身都係

兩個細細粒小朋友，行出嚟話賣旗，

又真係好得意嘅～

有啲街坊話以為佢地玩呀=__=

冇客自拍中

開始有啲雨, 睇吓成績點先

真係好重呀。。

好多硬幣！！ =p 

我哋大約9點半開始賣，到11點3賣完，總共6張旗貼紙

賣咗差不多3張半，即賣咗160張。

成績都算唔錯~ 收隊！！

返上婆婆屋企休息一吓

小檬見舅父仲瞓緊，跳上佢張床嘈醒佢 

好在舅父錫佢咋。。咪尋晚收咁夜一朝比佢嘈醒=___=

舅父知佢賣旗，梗係要支持一吓啦！

呢個婆婆又入

好在我要上午返學校交旗袋咋，

如果唔係我諗婆婆啲錢都全部入晒落個旗袋！=p

第一次賣旗，我同小檬都有一個好好嘅經歷

我要鼓勵小檬主動開口，提醒小檬要講多謝！全程冇停過, 

又唔知被啲蚊定蠓咬到成腳都一粒粒好痕!!!

（冇噴到防蚊, 好在小檬著長褲，妹妹豬賣左一陣又冇事）

小檬就賣完一張俾佢見到仲有幾張之後

小檬就話話乜咁多嘅？唔賣喇。。

我話我哋好幸福，有能力就要幫助其他小朋友，

要堅持，唔好咁容易放棄

經我鼓勵後, 又繼續賣，

再加上不斷有啲街坊叔叔姨姨稱讚佢，

尤其啲婆婆們

最終都肯堅持賣到差不多兩個鐘

有好多同學仔媽咪話小朋友賣一個鐘已經話吓好累唔賣

小檬好叻仔架喇!!!

雖然比起真正辛苦，其實呢啲都唔算係咩

不過媽咪見到小檬話辛苦都會繼續堅持，

真係一個好好嘅體驗!!!