6.29.2015

湊仔事

有兩件湊仔事想分享吓,不過唔係關於我湊仔,係人地湊仔嘅:

第一件
同小檬妹妹豬行書局,有啲木製嘅大型玩具可以比啲小朋友玩,
佢地就梗係行埋去玩啦。。。
有個大約歲幾嘅小朋友玩緊間大屋,小檬同妹妹豬就玩隔離嘅廚房喇。
唔係想講啲小朋友有衝突,而係呢位小朋友嘅媽咪著住件超低胸嘅背心,
烏低身同個小朋友玩,仲要係好偉大果種,其實有冇理過其他人感受嘅呢?
有冇諗過你想露,唔係個個想睇嘅呢?
點解明知係要湊仔,又要著件咁低胸嘅衫呢??不過作為女人見到都唔知點咁,
我當然明白人地著咩有佢地嘅自由,我梗係冇出聲,亦唔關我事,
所以喺自己嘅天地同大家分享吓~

第二件
尋日落咗會所泳池游水,玩完先同妹妹上屋企沖涼,
小檬就同舅父繼續玩水,我地攞咗好多沙灘玩具落去玩,
有兩個兩歲多嘅小朋友(可能係twins兄弟)想攞啲玩具一齊玩,
佢地未係好識講,小檬冇話唔比佢地玩,好似冇咩所謂咁繼續自己玩,
但係佢地媽媽就唔比佢地攞,話係人地嘅,果兩小朋友開始扭,
媽咪都拉佢地唔住,
舅父應該唔識handle呢啲情況,我離遠見到,
就抱住妹妹行返去,就話不如大家一齊玩啦,小檬都要同小朋友一齊玩喎。。。
跟住果兩個小朋友梗係唔客氣啦,佢地媽咪就淡淡然咁話,咁你地玩啦。。
唔好話唔該多謝,連一眼都冇望過我,冇理過我呢個無謂人,
呢兩位小朋友未識唔該我唔緊要,我借比小朋友玩亦唔係要你講句唔該,
不過我真係唔明白點解有啲人可以咁冇禮貌。
其實我都有啲慶,點解我要對呢啲人好??
算!!!我只係要做我認為啱做嘅野!
身教好緊要,不過無論小檬睇唔睇到,知唔知道我都會咁做。
而呢啲家長,佢第時見到自己小朋友冇禮貌,應該知道點解!

22 則留言:

  1. 好明白你嘅感受, 所以而家 d 90 / 80 後, 咪成日比人話唔識做人/事又冷漠 lor~ 到我哋 d 小朋友大咗, 我驚又比人話 d 10 後唔掂, 唉......

    回覆刪除
    回覆
    1. 同年齡真係有關嗎?其實唔止湊仔,好多日常事情都係,好似離遠見到人行緊黎,按住啲電梯門等埋人地,我會好自然地都會同人講句唔該,人地唔係一定要等你。
      試過拍咭入大堂大門,有個男人拉門入,好自然自己入咗,唔諗吓我呢個幫佢拍咭嘅大肚婆未行到嚟,我真係忍唔住出聲話 " 吖,你都幾好野喎, 淨係顧住自己入!! " 。。跟住佢後面嘅老婆見到就同我講哂對唔住 =p
      我覺得有時人與人之間,太冷漠亦唔敢表達。。。有幾多個落街會同同電梯嘅人打吓招呼??
      我!!! 我~有時我會同啲街坊有一個善意嘅微笑(唔好笑我=p )

      刪除
    2. 其實我覺得真係同年齡有小小關係,我哋細個時,邊有工人姐姐照顧,樣樣嘢都係父母親自照顧,當然家教都管/教得好 d, 而家後生果 d, 自小由工人姐姐幫手湊大,父母請咗姐姐,就乜都依賴晒姐姐做,姐姐顧得掂小朋友日常生已經好好了,仲點會再教到小朋友其他~

      刪除
    3. 係呀。。。所以我係屋企不停叫小檬同妹妹自己做返啲能力做到嘅野 (連妹妹自己食完都識拎返啲碗仔比姐姐,再講多謝,哈哈) 唔好養成依賴習慣,雖然話有姐姐幫手,但佢都係得一對手,我地都一樣照做,唔係一個都會做C
      屋企人姐姐都一定要講多謝唔該對唔住,一視同仁。

      刪除
    4. 我覺得父母教咩小朋友就變咩!所以無禮貌既父母就教出無禮貌既仔女,我都覺呢加d人好似唔識禮貌禮讓,不過人地既態度我地理唔到,唯有做好自己,令自己小朋友成為一個識尊重別人 懂禮貌既人👍

      刪除
  2. 真係乜人都有, 總之我哋做好自己, 唔好教壞小朋友就得喇~

    回覆刪除
  3. Gen mami, 第一件真係見得多, 心諗我知你熱, 唔洗請我食囉! 我自己都有但可能冇佢咁偉大,佢要露真係唔該佢去d 成人地方露,相信效果會好d, 哈哈!~
    第二件呢? 都遇過... 但人地媽咪就會say thanks 囉!! 不過禮貌呢家科就真係唔係人人識, 所以我好認同你的身教

    回覆刪除
  4. 哈哈.....我上小朋友playgroup 時,偶爾也遇過 "事件一"呢 ^^
    playgroup 上有媽媽作caretaker,也有爸爸作caretaker,我見到有人露,有時都覺好奇怪~~~ 話晒都做左人媽媽啦,點會唔知著某類衫會露出風光呢,所以有時都覺得好奇怪,哈哈XDD

    回覆刪除
    回覆
    1. 其實都唔係話烏低身先露,而係"唔烏都已經露咗一大半出嚟" =D

      啲男士都好尷尬,都唔知點好

      刪除
  5. 第一件事我都成日見唔小,有時都唔知提唔提佢好,因為其實佢想露,人地都未必想睇,但我知有d mami真係唔小心既,因為有時tee都會烏低身走光,但真係唔會合家歡時間有d 超低胸mama出現啦,有時唔係想望,但都會令人好尷尬。

    回覆刪除
    回覆
    1. 如果唔識比我都唔識提唔提好。。
      其實唔係話件tee烏低走光咁,而係坐直個人都跌哂出嚟。。

      刪除
  6. 呢個世界,咩人都有,我覺得只有自己身教,做到幾多得幾多

    回覆刪除
  7. 好少可見你咁嬲,真係激親你呀!
    其實一樣米養百樣人,我地都無權控制, 佢地著咩衫,真係無辦法,不過我都見過有d 人去小朋友party 著到北半球都出哂來,真係有點兒那個,仲要玩哂bounce house, 幾驚跌出黎。 而另外個位亞媽,真係以為你係應該咁,真係興呀,因為見過好多呢d 人,成日都take it for granted, 其實就算係陌生人,講句thank you 唔該都唔係好難je, 講兩個字就令大家都happy, 真係咁難咩? 所以我地都只可以做好自己,教育好自己小朋友就算啦。

    回覆刪除
    回覆
    1. 其實唔係話tee烏低走光咁,而係坐直個人都跌哂出嚟。。。其實真係有需要著成咁咩?見到佢咁當然唔關我事,不過唔明係咪係咁有需要。
      第二個真係火啲,算啦,有啲人可能唔擅於同陌生人溝通,不過呢啲好似講緊基本嘅禮貌喎。

      刪除
  8. 所以, 而家湊小朋友, 都係著t-shirt多, 湊小朋友成日都要彎低身呀!

    回覆刪除
  9. 其實而家天氣咁熱,我湊返學放學都著背心,吊帶裙,不過我就冇乜身材,仲要接放學之前都沖多次谅,可能都有其他家長覺得我著得少bor!
    第二件事,可以個媽媽果下晤知俾咩反應,又搞唔掂個仔,我地做好本份就ok, 唔好嬲la

    回覆刪除
    回覆
    1. 背心,吊帶,不是問題,如果我瘦啲我都會著,不過果個媽咪件背心係超級低胸,唔係一般正常咁。
      第二件事,我係唔會為佢而火咁耐嘅。。哈哈。

      刪除
  10. 上星期我在科學館都見到好多激氣事。D爸媽掛住影相,叫小朋友「望呢邊」,但成4、5歲的小朋友不懂禮讓又不去教。有時真係好想講,唔識教、唔想教就咪鬼生啦!

    回覆刪除
  11. 我試過喺泳池俾小朋友強搶Jayden d 玩具,小朋友爸爸sorry 冇句之餘,仲玩埋一份,要我出聲話走先放返低件玩具,嬲到我死。

    回覆刪除
  12. 第二件事個媽咪咁樣又真係幾冇禮貌,好似迫佢玩咁嘅態度!不過依啲就係身教,就算佢冇禮貌,檬媽都要繼續做番自己,教好小檬呀!

    回覆刪除
    回覆
    1. 係呀。。一個笑容都好吖,不過算啦,我都唔係博佢講唔該我
      我都盡量做好自己,唔係一定為小檬嘅,自己覺得啱就做架喇

      刪除
  13. 仲玩埋一份 <<= 咁好笑?

    回覆刪除