3.15.2016

妹妹豬N班大作戰~Last but not least Interview

妹妹豬最後一間N班interview
亦係小檬哥哥讀緊嘅呢間
媽咪壓力之大,可想而之。。。

妹妹豬一起身,心情算好靚,妹妹豬一著好衫就話返學,
面試時間係早上十點半,時間好好
其實起身食完早餐出去就啱啱好,
不過如果好平靜咁去in我怕妹妹豬又怕陌生唔講野。。。
於是要佢開心吓,諗樣令佢hyper啲嘅活動開佢個早晨
 食麥

食完食麥心情靚靚之後
去到時間啱啱好,登記之後就入校園等,
一如以往,入去之前不停洗腦,
見到老師要叫早晨,
老師問問題要答,
叫佢出去拍拍/做要出。
見到校長叫校長,
媽咪忙緊做野,自己要乖乖睇書,唔準行開
雙手俾問卷校長......

好多小朋友玩緊滑梯,我冇俾佢玩,都係講吓壁佈板上面勞作。
今次有啲凳安排喺壁佈板下俾家長坐,所以好難咁近咁講,
唔係咁好意思喺人哋面前企咁耐,唯有再行吓

見到兩個普通話老師話我好熟面口,又要用僅有嘅打結普通話
同老師講話都係到哥哥讀緊,
而家妹妹嚟面試,我抱起妹妹叫佢同老師打招呼
妹妹豬居然笠水。。。唔出聲,撲喺我膊頭 =___=
我心涼咗一大截,喺屋企已經認得呢兩個老師怎至叫咩名,
點解見到真人會唔出聲兼怕醜?
今日就係要出聲,咁樣一陣點算???點撬個口都唔開,
老師話好多小朋友都會咁,
一陣面試唔喊就得(我心諗有冇咁容易入?)
同老師吹咗一陣之後走人。。

睇咗一陣書,呢個妹妹豬見有個小朋友行埋嚟又投訴咗一吓,
見未爆發衝突就拖佢走
好快就叫我哋名,拿拿臨就去排隊。
(今次唔使等上次咁耐,好快有得入,完全唔使用糖糖)

part 1 英文 group in
老師要求小朋友取指定嘅水果俾紙版公仔~男仔或者女仔食。
一入呢間房,我就好開心,我諗妹妹豬都係,
因為教哥哥嘅英文老師同興趣班外籍男老師都喺到,
兩個熟悉嘅面孔應該令我哋兩個都定啲, 
已經唔似interview,好似平時返學校啲活動咁

外籍男老師,講出指令,第一個小朋友唔肯出。。。
個pat pat黐喺張凳上面,
爸爸不停講不停推佢都唔出,
老師叫爸爸陪佢,佢先肯出,勉強都肯做。

第二個叫妹妹豬,一樣唔肯出"___"
擰轉個頭一副委屈家嫂樣 
叫"媽咪"
老師望住我同我講可以陪佢一齊出
其實我只喺行緊
佢自己已經行咗出去
自己揀咗蘋果放入男仔口。
(因有朋友第一日In咗,知道有呢個項目,
所以喺屋企練習過一吓,佢唔肯入男仔到架,
C都話要俾女仔食,,好在今次都叫完成到,  真係抹一抹冷汗)

其他小朋友都唔太順利,一個都係要媽媽一齊,
另一個就喊,唔肯出。
(隔離果個小朋友爸爸見自己完成, 就叫個女同妹妹豬say hi
um...我想講人哋老師仲同其他小朋友in緊,
點解叫個女同其他人傾計?
你可唔可以尊重一吓老師呢?我冇即時出聲,
過一吓我同妹妹豬講留心老師講咩)

當in完水果之後就唱bye bye song,
妹妹豬隻手冇咩揮動,我亦有推一推,
clap my hand同step the feet嘅時候就有做,不過動作好細
跟住老師就拜拜小朋友,
到妹妹豬時,手仔bye完之後
佢居然走埋去攬攬男老師,男老師好驚訝, 好開心!
哈哈,我真係估佢唔到!
行出去就再攬攬英文Miss! 
Miss 話佢 "u'r so cute !! " 

Part 2 中文individual in
之前嘅經驗係我自己揀檯坐,我見到三個認識嘅老師,
諗住揀其中一個坐落去,
錯~唔係揀,係安排!! 
(我估之前係我揀因為果時係新仔)

安排咗我去其中一張檯。
一個唔認識嘅老師(應該其他分校)
我諗係因為要公平, 避免同校老師面試。
都啱嘅,有實力係唔需要怕 (wakaka其實冇)

呢位老師好溫柔咁問妹妹豬叫咩名,妹亦好溫柔咁回答,
我都差不多聽唔到佢講,不過好過唔
再指住面試相問呢個邊個嚟,
都有答, 雖然細聲d , 我諗老師都聽到佢講呱

跟住物品,手偶公仔小花想要牙刷/筆/毛巾,
妹妹豬全部拎到(果刻我仲諗三樣佢記唔記得曬呀?)
仲唔係俾老師,係俾小花添!(叻)
跟住老師話小花話個咀污jo咗,用咩抹呀? 
妹妹豬用手巾幫佢抹咀。
老師再問呢條咩嚟呀?
 妹妹豬答"唔知"(哈哈)
老師教返佢叫毛巾。
拎住水杯問呢個咩嚟?杯杯。
呢支咩嚟呀??畫畫!
老師話係喎,筆筆畫畫喎
呢個呢?刷牙, 妹妹豬想講係用嚟刷牙,
 老師可能以為佢調轉咗讀
(不過識刷牙已經叻叻)
仲叫妹妹幫小花刷牙,妹妹豬就幫小花刷刷刷。。
老師mark分就叫妹妹睇書,問佢見到咩野?
佢答rabbit,另一隻呢?elephant
(但點解用晒英文答?)
好快就完成,老師提妹妹豬推凳,
妹妹豬呢方面做得好好,
唔使提都會主動推
仲推埋我果張添,老師都有讚佢!

part 3 媽咪填問卷
 我用咗大約5分鐘完成,妹妹豬真係坐定定乖乖自己睇書。
等校長嚟嘅時候,有少少冇耐性想企起身,
不過個pat pat都係黐住張凳。
最後好有禮貌咁少少鞠躬. 用雙手交問券俾校長
講"校長"  
eye contact就差咗啲,不過我提返佢就望眼睛講多次
接過禮物講 "thank you"就完成!

出門口之後,好似小檬In完果時咁,啲眼淚又開始失控。。
終於完成喇。。仲要係算好滿意嘅完成!
唔知喊啲咩。。總之就好激動

出到嚟緊係讚吓妹妹豬啦!!
(雖然喺入面已經都不停咁讚佢)
有跟指令做,肯開口,有問有答,有推凳,肯坐定定,
有雙手交問券,仲送多個擁抱俾老師,
媽咪真係覺得佢超額完成!!

買定個Elza諗住如果佢喺入面唔合作用嚟氹吓佢,
完全唔使用
IN就梗係送俾佢獎勵佢啦!!

呢間學校競爭咁大,雖然in得算好,都唔可以諗住一定得,
不過點都好,妹妹豬已經係媽咪心目中嘅100分叻豬!!
心情仍然滾動中!!!! 

14 則留言:

  1. 妹妹豬好叻呀! 個擁抱冧死人呀
    我嗰時in完都有想喊嘅感覺, 係唔知點解會想喊, 可能唔多唔少潛藏咗啲壓力啦, 就好似當年考完會考嘅感覺呀
    祝妹妹豬順利當選!

    回覆刪除
    回覆
    1. 多謝蛇仔媽!真係好激動,覺得做咗咁多野終於見到佢in得好。仲有差不多一個月等待時間。。好漫長

      刪除
  2. 妹妹好叻!一定得嘅!
    我想講包包哥哥都未必做到咁多野!
    媽媽可以放心啦

    回覆刪除
    回覆
    1. 多謝包包媽! 包包隱藏實力啫!
      一日未收到result個心都未定到,不過盡左力in得好都算係咁

      刪除
  3. 妹妹豬好叻呀! 我也是差不多時間INTERVIEW,可惜無緣見到。
    這間競爭好大,我也沒有太大期望。

    回覆刪除
    回覆
    1. 喺?可能擦身而過。。我咩都冇望,淨係望住妹妹豬。
      你in成點?你講得好啱,競爭好大!希望大家都有好消息

      刪除
  4. 妹妹豬叻叻。。。
    我原本都唔諗住俾細佬玩滑梯,但佢已經自己走去玩。
    最尾校長問佢有冇玩滑梯,佢答左有,跟住校長問佢條滑梯咩顏色XDDDD

    回覆刪除
    回覆
    1. 佢玩完肯走咪乖囉。。。條滑樓係咩色?應該都係隨口問,睇吓你肯唔肯答。

      刪除
  5. 妹妹豬好叻呀!
    面試完晒,媽媽可以鬆一口氣啦!

    回覆刪除
    回覆
    1. 多謝,係呀。。點都好,自己relax吓先!

      刪除
  6. 妹妹豬好叻呀,個「挨da包包」一定令老師加分呀,檬媽唔洗擔心,8月順順利利手拖手返學,到時見到個情景可能又想喊呢

    回覆刪除
    回覆
    1. 真係冇諗過妹妹豬會出呢招~真係俾到驚喜我哋!
      肯定啦。。我又變喊包喇 =p

      刪除
  7. well done!!

    要雙手交問卷,仲要有eye contact 真係不易,妹妹豬,叻女!

    回覆刪除
    回覆
    1. thanks! 喺屋企都有不停教佢,不過有時對住陌生人會唔肯出聲。今次肯做又肯講,真係知道佢好鍾意呢到

      刪除