5.16.2016

小檬K1家長日 (下學期)

又到K1下學期的家長日,已經第4次家長日,
已經唔太緊張
今次喺聽吓老師對上咗差不多一年K1小檬評語
了解一吓小檬喺學校嘅情況

首先係班主任。
普通話很普通嘅我,一般對答還可以,
不過到一啲詞語,唔識就真係唔識,
好似開口夾著俐咁,越唔講就越差!
好在如果我講廣東話老師都會明白我,
不過人哋講普通話我就硬係好似應該講返普通先得,
唔係好似冇咩禮貌咁
(不過老師應該情願我講廣東話)

老師給小檬的評語都好正面,好合乎K1小朋友嘅進度。
情緒比較感性,好完美主義,
有事可能會較易喊(吓,唔通似我?)
以我所知之前試過為咗一件事而偷偷喊
(事後問返佢,佢話冇喊,係流眼淚=___=)
老師鼓勵佢喺喊之前要同老師講,
老師講解之後都接受,多咗同老師表達。

普通話識聽識講,起碼日常學校嘅對答都冇問題,已經習慣用句子溝通。

是個有禮貌,自理能力良好,好學,
上堂時專注,愛閱讀嘅小朋友

英文老師評語:excellent progress
(今次聽到已經冇上學期咁激動)
專注力很強,很sociable,mature,理解能力好高,
好多新遊戲佢都好快明白,
有時會叫佢示範俾其他小朋友睇,be a role model,
老師睇過佢啲閱讀video,話佢好叻,好outstanding。
不過佢成日覺得自己要做一個good boy,
始終都係小朋友,都會有曳嘅時候,
如果被老師見到, 老師一個眼神都會好緊張,好驚。

呢間學校唔會有測驗考試,只會有評估,
之前已經知道結果,媽咪都好滿意。

聽完兩位老師嘅評語,
就覺得小檬就係我個讀書時
品學兼優嘅果啲同學仔

由細到大,自己都係中中等等,冇諗過自己個仔係呢種品學兼優型。
我亦唔會太開心得咁快
小檬仲細,仲有漫漫長路,
而家課程容易,梗係可以好好(我幼稚園都係考第一架!)
不過做媽咪聽到呢啲咁好嘅評語,
唔開心就呃你嘅~ hehe

媽咪都要繼續鼓勵小檬唔可以驕傲,要謙虛學習,
亦要教導小檬學習接受失敗。

小檬都要繼續加油呀~

17 則留言:

  1. 小檬真叻仔...要繼續努力呀~

    回覆刪除
  2. 好叻呀小檬,加油!!!!
    呢張相影得佢好似個teenager咁啦

    回覆刪除
    回覆
    1. 多謝,不過真人嘅小檬係細粒豬嚟

      刪除
  3. 仲要加埋靚仔,小檬好完美呀~

    回覆刪除
    回覆
    1. 多謝木木媽嘅讚賞先 ~
      不過點會係完美呢??小檬細粒豬仔嚟。。
      (不過希望係暫時啦!)
      我記得好多朋友幼稚園都係考第一架。。包括我自己。即係話其實太細跟本個個都咁叻 =p

      刪除
  4. 多謝木木媽嘅讚賞先 ~
    不過點會係完美呢??小檬細粒豬仔嚟。。
    (不過希望係暫時啦!)
    我記得好多朋友幼稚園都係考第一架。。包括我自己。即係話其實太細跟本個個都咁叻 =p

    回覆刪除
  5. 我普通話係好唔得架...起初有諗住黎緊自己報個班黎上黎應付班主任 :P
    小檬咁感性, 我覺得好好呀, 感性既人係好善良架:)

    回覆刪除
    回覆
    1. 我豁出去,唔識都試吓講,希望講多啲就識多啲,不過笑C人
      喺??咁唔怪得我咁善良啦

      刪除
  6. 一睇小檬就知醒目仔啦!!

    回覆刪除
    回覆
    1. 多謝大爺媽!!真係有眼光~

      刪除
  7. 做得好呀小檬!!
    呢張相影得佢高左好多同大個左好多呢~ =)

    回覆刪除
    回覆
    1. thanks 小草EE
      影相真係唔可以作準!!

      刪除
  8. 唔係喊,係流眼淚 >>> 笑左 XD
    小檬真係好叻呀,老師有讚冇彈!講番閱讀個video,我畀埋老公同同事(佢地都係檬媽fans)睇,佢地都話真係勁!

    回覆刪除
    回覆
    1. 咩我都有fans嘅咩??真係架???飄飄然中

      唔係喊係流眼淚,佢呢個演繹真係令人哭笑不得~
      雖然識讀晒,不過都唔係明白晒。。。遲吓如果係明白晒先真係叻
      (其實我都覺得叻,不過我都要答得謙虛啲=p)

      刪除