小檬21M喇！

小檬21M喇！！！！

食

婆婆話佢呢個月食飯乖咗，一大碗飯，肯食肉／蔬菜瓜／湯湯／生果／魚 

媽媽亦踏出第一步第一次食糖~比左半粒jelly belly佢食！ 

都有食過布甸， 之前有同事入嚟食完飯喺對面糖水舖買咗啲上嚟一齊食，

佢行過就記得果度有得賣布甸，

於是婆婆又入去買咗杯比佢食

（不過我覺得呢間愈來愈唔好食，又貴，係婆婆先會買） 

自行如廁

冇進展！！

只係poo 完會話比我地知，有時掛住玩都唔記得，

婆婆嘗試同吓定時Wewe一捉住佢唔比佢走開，就唔肯！ 

比咩佢玩住都唔得！唉。。我都知道呢啲野迫唔嚟。 

認知能力 

識得1至10，都係唔見咗個6字，開始認得啲數目字，唔係盲目咁講。

 ABC，識講到IJK，都有啲認得啲英文字母，

不過有時都亂龍 

認得巴士／的士／火車／地鐵 

講野

已經可以講到連續六個字 

檬媽：尋日我地去邊到呀？ 

小檬：去咗萬昌舅父到呀～ （呢個係表舅父） 

問返佢今日去咗邊，同邊個玩，都會記得講得出佢地嘅名。 \

今月驚喜

教過佢爸爸個名，初頭驚同佢自己個名撈亂，

不過好在冇，教埋我個名，同舅父個名， 

而家人地問佢叫咩名，佢講完之後，會話埋比人知 咩媽媽，咩爸爸，

即通街啲人都知我我地叫咩名。 

自己主動叫人早晨 

我地去食飯，酒樓喺一個uncle屋企附近，我地上方過去一次，

佢同我地講koko，初頭我R爆頭都唔知道佢講咩，

後來先估到佢叫uncle，冇諗過佢會記得！ 

有日食飯，佢食又係叫落地地，我地話我地都未食完，

佢居然自己舉手叫{唔該，單單}哈。。真係唔知好嬲定好笑！！！ 

同佢喺ATM攞過一次錢，有日經過佢就話錢錢，嚇我一驚 

經過seven 就話報紙爸爸（買報紙比爸爸） 

問佢舅父喺邊，佢而家識話返工（再唔係工工）問佢返工做咩，

佢就話錢錢，買提子，爸爸就買布um（讀唔到個冧字），

姐姐（舅父女友）就買莓莓（藍莓）

繼續加油呀！！