7.04.2016

尋找暑期班

復活節之後已經開始聽到啲暑期班,暑期活動嘅字眼。。。
有啲家長唔想小朋友係屋企冇所事事,齋玩,想有啲細藝,
於是報名參加,學啲咩唔重要~至在攝時間
有聽過因為唔想對住某屋企人或者工人姐姐咁多,於是要填滿佢!)
有啲家長想小朋友充分利用時間,學吓野充實小朋友
有啲怕小朋友放咁耐假,會懶左,所以要小朋友keep住學習

而我哋呢,因為小檬學校暑期時間唔長,
都係三星期左右,暑期都仲會keep住平時嘅興趣班,
所以我都唔太一定要佢上啲咩班,不過都會睇吓有冇野啱。
於是我哋一貫例遲,到家都未有啲咩安排!哈~

上星期落樓下八下啲教育中心(咁搵錢,梗有一間喺左近!),
住咁耐我都係第一次落去~
真係學咩都有。。。小廚師/爵士舞/非洲鼓/手工班/普通話/chit chat eng/
3D手工。。。布偶班/英文班。。。音樂跳豆。。。真係咩都有!

睇完咁多唔同。。。首先刪除咗學術,返學已經學到學夠,
唔好要小朋友放暑假都學,況且佢學校教得好好,佢又學得好好,
唔知樓下啲師資點,都怕學壞手勢(唔係話佢地唔好,係我冇去了解咋!!)
另一間猴子應該都好,不過唔問唔知道,
原本喺度學英文收費唔平!!
況且小檬英文應該OK,唔需要讀

其他非洲鼓。。音樂方面又話冇咩興趣。。。跳舞又話唔鍾意。。。
唯一有興趣就係話小廚師,
不過要再了解吓適合幾多歲小朋友學先得。
(以上只係小檬情況,個個小朋友需要唔同,亦冇話錯對)

有時行過見到啲鋪頭宣傳海報多,好似覺得係咪一定要報,
見到人哋報唔報又好似唔安落,
其實每個小朋友每個家庭情況都唔同,好多野非絕對,亦非必要
最緊要適合小朋友, 小朋友開心家長安心

8 則留言:

  1. 我暫時都係報左畫畫同泳班, 仲有Yin B最想學的跆拳(可惜到依家都未開到班 ><)..我都聽過其他同學仔平均都報5樣暑期班
    見到人哋報唔報又好似唔安落>>呢個真係有同感, 但後黎同家人傾過都係自己再買d習作+學校暑期功課俾佢每日做下,放假就安排多d親子活動,感覺自己同小朋友都會開心d~

    回覆刪除
    回覆
    1. 係呀。。其實都唔使理人,大家生活背景,習慣又唔同,最緊要小朋友大朋友都開心!
      好多時都係啲教育中心營造出嚟嘅氣氛,我地只係報左游水咋~哈哈
      小檬跆拳道平時都玩開,強身健體,等佢多啲運動咋!

      刪除
  2. 原來小檬放3星期咁少咋, 大爺返多一個星期度就放, 9月1日先開學...

    回覆刪除
    回覆
    1. 時間太長又真係要搵啲野做吓。。好似。。嚟我屋企啦

      刪除
  3. 我地報暑期班都係怕小朋友喺屋企悶,所以上咩都好,最緊要個仔開心!
    不過我見到啲英文班種類多到我都驚,到宜家都未分清楚……

    回覆刪除
    回覆
    1. 唔好話你,我都一舊雲,不過我冇咩睇啲英文班,都係諗住玩吓就算

      刪除
  4. 我地一個班都無報。上堂上埋七月;九月又番K1, 我由得個仔玩吓開心吓就算。

    回覆刪除
    回覆
    1. 係呀。。我仔暑期都好短,所以都應該唔報

      刪除