7.21.2016

小檬。第一個獎項

今年學校增設五個獎項,
學術,體能,紀律,音樂,美術。
散學禮就會頒

當知道有呢幾個獎之後,做媽媽嘅就開始諗,
究竟小檬會唔會得其中一項?

體能~
冇咩可能,細細粒,唔夠啲高大同學仔跑跑跳跳

音樂~
K1下學期先開始識跟住唱吓,雖然做到performance司儀,
不過我諗係因為佢啲普通話好。

美術~
畫畫都幾好,不過啲勞作就仲係麻麻,
整架的士變咗壽司=___=

最有機會就係紀律同學術

紀律~
我都相信佢喺學校好乖,因為咁多次見家長老師都係咁講,
老師都會話冇野好講,小檬太乖,根本冇野要講!

學術~
小檬都幾叻吖(自己覺得,哈哈)
成個學期都冇咩點溫習,小檬都好似跟到,
係有啲字仲未認到啫,不過見佢好似識就算
係前排啲字咭返咗咁耐都冇玩過,先貼吓出嚟,
哈哈,真係靠食老本。
另一方面我總相信其他同學仔一定有啲更加叻, 所以都係一半一半

到尋日即將揭曉有冇獎嘅時候。。。做媽咪嘅有啲緊張,
一方面好想小檬得獎(好容易理解啦)
另一方面又怕咁快就得獎會唔會好大壓力呀??
(其實小朋友未識,係家長自己有壓力)
一開始就拎獎,下年冇咁點呢??
會唔會更加失落呀??
K1已經咁多野諗,幾時得嚟大???
媽咪又開始思閣失調!!!
 媽媽以為會出通告通知又或者家長園地有相睇。。。
差不多時間就不停
F5
F5
F5
F5
F5
" Award of Outstanding Discipline "
終於真係如我所料

好開心呀!!!
全班得五個獎有一個,已經好叻叻
都唔算係豬肉獎吖

雖然媽咪有啲想佢攞學術獎,
不過攞唔到學術獎,都唔算失望
自己放幾多時間教佢谷佢
自己心中有數!
我都覺得佢未係叻到全班第一,
不過頭五位都有嘅 =p

而且紀律都好重要架!
學術幾時都可以追,
但品行紀律自細就要好好培養!
(自我安慰中)

小檬其實都未係好識咩叫攞獎,只係知道唔係個個有,
我就話俾佢知道呢個獎係話佢係學校好乖,
老師校長都讚佢聽老師話,所以比佢,媽咪就會獎勵佢有份禮物!

咁叻仔,點都要獎勵一吓啦!!!

小檬, I''m proud of you!!
K2繼續努力

4 則留言:

  1. K1就有奬攞,小檬好叻仔呀﹗

    回覆刪除
  2. 小檬好叻呀!我覺得紀律獎仲難攞過學術獎呀!

    回覆刪除
    回覆
    1. thanks! 我都咁認為,紀律真係靠自己!

      刪除