7.05.2016

小檬暑假游泳班

喺完全慢動作嘅暑假活動尋找過程中,
機緣巧合下知道蛇仔明已經報咗個游泳班,
本來都仲喺到15/16諗住報另一間
又未扑槌嘅檬爸一得知
就話有個伴都好喎,不如一齊學!!!
(檬爸除咗係教育部之外,都兼顧康樂部嘅)
而檬爸今次真係洞悉到成件事嘅關鍵~就係小檬怕水!!
有個伴一齊學都好緊要!!!

小檬好BB時玩過幾堂,唔好以為BB就唔識驚,
小檬果時已經喊到拆天!
游水堂

到大左玩水都怕落水,只肯喺池邊玩。
爸爸見到佢咁怕水,男仔之家唔可以咁,於是就的起心干action
報之前有問下小檬報游泳班好冇 (我哋好尊重小朋友意見架嘛)
解釋比小檬知,學咗就會識游水,到時候就唔使驚。
佢淡淡言一句好。。費是佢反口,我哋就即刻報

初學游泳訓練班
$1200/8 (一小時 1對2-3, 3-10歲)
(鳴謝蛇仔媽嘅報料,可以等小檬一齊學)

為咗鼓勵佢,買咗件佢鍾意嘅美國隊長泳衣比佢


仲有涼鞋仔,泳鏡


minion 檬

準時去到泳池已經見到蛇仔媽同蛇仔明



登記好之後就入去

乖乖等教練

我叫佢同教練講,教好泳鏡帶



拖手仔準備入


父母就跟住去看台睇小朋友

眼見小小年紀自己行,
教練又好似冇咩點人數(可能其實有係我唔知)
小檬返學之後都冇咩要令我掛心過,
但呢日重新激起我嘅媽媽病又發作
自己行會唔走失架?
會唔會太跣唔小心撞到
會唔會有其他小朋友跑佢又跑??
會唔會唔小心跌落泳池架?
短短嘅路程,媽咪無限想像
(其實只係媽媽病發作,過份擔心)

行快兩步到看台睇住佢先,

見到原本拖住蛇仔明嘅小檬拖住另一教練行入泳池


小朋友先跟教練熱身,小檬都跟得好足,好快就落水,
先將浮板綁喺身上,小檬安排同差不多年齡嘅小朋友一齊,
教練係個姐姐,一對三

趴咗大半個身喺岸上面嘅小檬,

用佢僅餘喺水部分嘅腳踢水,雙手C都掹住藍色安全範圍!!!

可能教練姐姐都睇唔過眼,於是捉佢落水,叫佢落啲落啲。。。
危機警號亮起嘅小檬開始覺得唔對路,同姐姐講要we we,
眼見小檬開始想喊,上返岸搵我哋
唔知咩嘅氣力,我就喺欄杆一邊抱佢返過自己呢邊,
一抱住佢本來忍住嘅小檬見到媽咪梗係即刻爆喊
好似喺出面受咗啲咩委屈咁
(所以好多人話學游水父母唔可以在場)




心裡好明白佢果種害怕(又會諗其實會唔會有陰影)
心都酸埋,
好在都冇被佢觸動到喊埋一份,
唔係又失禮街坊

拿拿林叫爸爸同佢we we,我迴避一下

根據爸爸講去完廁所都唔肯著返件泳衣出去,
最後唔知爸爸點樣叻豬
終於的佢返出去

之前果組姐姐教練太善良 

比蛇仔明果組嘅魔鬼教練見到小檬攬住爸爸喊緊,
(一陣就知道點解叫魔鬼教練)
問左幾句就一手強搶小檬走
好容易理解下一步就係
小檬超級爆喊!! 

我哋就好似小檬被徵召上戰場做士兵,

要同媽媽分開咁,雖然十萬個不捨,但又不得不為。

而小檬就好似啲被強搶民女咁,喊到擋豬
好在唔係喺我手上強搶,如果唔係可能我唔會放手添!!(慈母)

小檬被搶之後,我同爸爸就迴避,唔比小檬再見到,
其他家長紛紛安慰我哋
話自己啲仔女第一堂都係咁,好快冇事,
唔好俾佢地望到會好啲。

我哩喺蛇仔媽後面裝佢
喺魔鬼教練手上繼續爆喊
不過都冇偷走爬返上岸
(感謝蛇仔媽在旁,我行開時候幫我睇住下小檬!!)

教練話完唔好喊就叫佢踢腳,踢吓踢吓又回復平靜,
教練仲話佢腳踢好直(可能係氹佢)


小檬係一個好授教嘅小朋友,好肯聽人教,

聽住指令
佢就好快平靜過黎。

委屈樣中

跟住扮吓蟹仔用手打橫行,小小手仔支撐身體行吓行吓。。。
突然間又聽到佢喊,
話"有啲水入左去呀。。入左個口到呀 !!!"
魔鬼教練話冇事架!!!!咁而家有冇事吖???!!
繼續啦。。小檬又乖乖踢

教練抱住佢喺水中又有浮手袖,都冇咩問題



又突然間話"啲水入咗鼻入咗鼻呀 "
教練又話"唔會有事架!!!!! 。。。繼續!"

小檬又收聲繼續!


跟住都冇再收到投訴,教埋吹水。。水中吹bubble
玩吓玩具就完第一堂!

終於完成~~~~

上到水仲有笑容添~


梗係即刻讚佢好叻仔
見佢都有少少凍到震,
快啲抹乾佢,叫喊爸爸同佢沖涼。

檬爸非常咁稱讚呢個魔鬼教練,鍾意佢夠惡
蛇仔媽都話教游水一定要夠惡,如果唔夠惡,
啲小朋友唔怕就唔得,我朋友話大啲操水果啲教練都好惡。

見到小檬一開始喊到咁凄涼, 媽咪都唔係好忍心
一個唔識游水嘅小朋友喺個唔到地嘅泳池
驚而喊係好理解嘅(又發作)
好明白嘅,
因為我都係腳唔踩到地就驚唔識游,
比我對住呢個教練我都應該頂唔住,
何況平時乖巧冇咩俾人鬧嘅小檬?
(夠喇媽咪!! )

另一邊廂我又好怕佢有陰影唔肯學,仲怕水。

不過見佢落堂都肯笑返都應該冇事嘅,所有都係媽媽自己諗出嚟!

成功需苦幹
雖然一開始唔太順利,不過最後都總算肯繼續吖,
小檬已經好叻叻(自我安慰mode)
繼續加油!!!

不過小檬下堂可唔可以唔好喊 ?! 
喊到媽咪個心實一實,鼻子酸一酸呢!

22 則留言:

  1. 小檬~加油呀!男仔應該好快就會習慣水性啦!

    回覆刪除
  2. 小B都好驚水, 我未敢俾佢學呀, 驚佢怕左仲衰.
    我朋友個女, 未學游水前好鐘意去玩水, 點知學左兩堂之後堂堂爆喊話唔學, 攪到教練都無佢辦法, 唯有剩係陪佢玩水.
    我打算等妹妹再大少少先俾佢倆姊妹一齊學, 希望到時會好D~

    回覆刪除
    回覆
    1. 其實都好難講,我諗睇吓咩小朋友夾咩教練,我都好怕小檬怕左水,希望下堂順利啦
      我都有諗過等埋妹妹,不過原來攪一個都暈低咁濟,兩個一齊應該唔喺好掂

      刪除
  3. 小檬咁叻仔實克服到既~~~~

    回覆刪除
    回覆
    1. 希望啦。。小檬好在都好獨立!好肯聽教練講

      刪除
  4. 親身見證, 其實當日小檬非常叻同好快學識教練講啲嘢, 不過小朋友見到媽媽係會嗲啲架~

    回覆刪除
    回覆
    1. 多謝蛇仔媽!好在有你我先定啲,唔係我實飛落池到救小檬
      我都未讚蛇仔明叻! 又勇敢又聽話

      刪除
  5. 包包又係好怕水架,我諗住下年暑假畀佢學游水,我完全代入左檬媽,睇到中間我都想喊,想像緊包包到時一定會喊!
    希望包包會好似小檬咁叻!

    回覆刪除
    回覆
    1. 而家玩多啲水,等佢唔驚先,下年啱時候先同佢學會好啲!包包咁叻仔一定得
      果刻我都好驚我會喊,如果喊咗就真係醜C怪!

      刪除
  6. 小檬好叻呀,好彩佢好乖,就算驚都有嘗試,咁就成功一半啦!
    肚B又係驚水(依個夏天先改用花灑洗頭...),唔知有個魔鬼教練迫下係咪都可以做到呢?

    回覆刪除
    回覆
    1. 我覺得好睇小朋友,我初頭都驚小朋友會唔會仲驚有陰影,不過又覺得佢都撈咗咁耐,應該有啲計,係受嘅多我先唔理。你都可以俾肚B試吓

      刪除
  7. 最終都可以克服到, 其實已經好叻仔呀~!!!

    回覆刪除
    回覆
    1. 都係。。我都好滿意喇。。有啲野真係唔可以心急

      刪除
  8. 美國隊長泳衣好有型呀 ^^
    好叻呀,好快可以學識了 ^^

    回覆刪除
    回覆
    1. 我本來唔想買美國隊長架。。想買兩件頭,唔啱都可以分開著,不過為左鼓勵佢一開始有動力去游,佢鍾意咩都尤得佢

      刪除
  9. Aiya...我真心以為只有大人先至怕水架咋,亦因為咁樣,大人好難學得識,所以最好都係細細個就去學。不過我見小檬都適應得好快,應該過多兩堂就完全無問架喇~

    回覆刪除
    回覆
    1. 都唔係呀。。我眼見都好多小朋友好怕水

      刪除
  10. 你寫得好好笑。雖然明白你的慈母心,但真係好好笑。
    小朋友係咁樣的,O仔自己同爸爸游就鬼咁勇,但我一在場就會「媽媽,我驚驚,要抱抱。」,O爸眼都反埋。O仔唔算怕水,但未肯放個頭落水。我地打算明年暑假正式學呀。

    回覆刪除
    回覆
    1. 唉。。做呀媽嘅真係成日思覺失調!!我覺得自己教唔到仔女嘅。。真係要人哋先教得聽仔女

      刪除
  11. 我俾ET 之前學水就係我地落埋水,結果咩都學唔到。呢D 好呀,不過我都明,睇住喊到豬頭咁0既BB, 做阿媽真係好唔捨得。

    回覆刪除
  12. 我都同意唔可以父母在場

    回覆刪除