第一次整月餅

連放咗4日假，真係成個人散哂！

小檬返咗學之後，都識多咗啲家長朋友，

除咗同班同學有group chat 之外，

同一屋苑一齊坐校車嘅都認識咗兩三個媽咪。

其中有一個K1嘅小妹妹，雖然高一班，
但佢係細B，其實只係大小檬幾個月

同媽咪整月餅, 係都要媽咪叫埋小檬，

女女同媽咪講好鍾意小檬（估唔到咁快!! ）

於是我就應邀上佢地屋企整月餅喇！

小妹妹媽咪已經準備哂啲材料，我地一去到就整得！

佢地好多工具呀，連小朋友圍裙都有，粉團已經整好，

我地首先將粉團量好份量，分好一份份。
我切好，之後交比小檬磅

淨係呢個過程都好漫長，

因為我一路切分好啲粉團，小檬一路將佢幫我搓返埋。。。

好不容易就分好喇


之後就將餡料放入餅皮，

然後包好佢，講就好容易，

但叫個兩歲幾嘅小朋友嚟講，

都係天一半，地一半。

叫佢壓扁啲皮嚟包餡，

佢就係咁搓，當玩泥膠！

包好之後，去壓個月餅出嚟！！ 

完成第一個!!!!!


 最開心就係壓 ~ 

有一個喇~ (呢個算幾靚)

再入埋袋，放雪櫃雪兩個鐘就食得！！

終於完成～！

 

好多謝呢位媽咪，如果唔係我呢位懶媽媽都未必會整月餅！

比我想像重容易，我以為會好複雜，比我未必會主動去整，

而家我上去，齋整就更梳干

完成品賣相唔係咁好，有啲餡就爆哂出嚟有啲又多皮得滯
(唔記得影相)

小檬自家製月餅，有邊個想要呀？？

呢日有小插曲，我地一上到去小檬就坐低玩。

玩玩吓我見小檬用隻手掃吓掃吓手臂，遠睇再見到三點紅色，
心諗咁快比蚊咬到？？？

行埋去原本係小妹妹嘅歲半弟弟咬咗小檬一啖，
成隻手錶印！！

佢媽咪就鬧小弟弟啦，跟住就問小檬有冇這事，

我攬住佢，呢一刻先有啲淚光。。。想喊

我安慰佢唔使喊，不過下次就要同弟弟講唔可以咬，

之後要話比媽媽爸爸老師或者大人聽！

呢件事比我知道原來小檬比人蝦都唔會出聲，

我諗因為係喺人地屋企，好在今次我睇到，

可以教佢如果再遇到佢都要識保護自己！ 

原來自己個仔比人蝦做媽咪都好心痛架！