一生一世的媽媽

好耐冇見過週圍飛唔使做嘅TC哥哥喇，心血來潮搵佢食飯，

諗住好快食完就返屋企接更婆婆走。

佢嚟公司接埋同我去西環食，點知掛住講就行錯去紅隧，

星期五紅隧真係塞到暈，結果用咗差不多一個鐘先去到。

去咗間幾好嘅浪漫餐廳！

（有即時報告比老公知架，佢同公司食飯）

可能太浪漫嘅關係，啲菜嚟得好慢，

9點3喇，我就打個電話話比婆婆知我就返。。。

點知，佢一聽電話就問(怒火襯底)

你喺邊呀？？？？？？

返未呀 ？？？？？？？ 

個女又扭計！！！！

我話就返喇。。。

快啲食完TC就車我返屋企

呢個時候我就喺TC架車喊咗出嚟，

好似好耐都未試過喺朋友面前喊，

好在佢係老朋友啫！！

其實我差不多每日放工都係即刻返屋企，

就算係去街先返，都係買啲小朋友野，

我自己去睇吓衫，做吓facial。。etc係未試過！！！

或者返到去就同小檬做吓學校啲手工，

好明顯，佢瞓咗之後我係繼續做。

繼續執好啲野，或者淘啲有需要用嘅物品

真係返遲一吓就咁？？？？？

我都明白婆婆湊佢地都好辛苦，但係我都係一次半次啫。

果一刻真係唔太好受

終於返到屋企抹乾眼淚先入屋，

比錢婆婆搭的士。。。

差不多十點，姐姐湊住扭緊計唔肯食奶嘅肥妹豬，

我就同小檬講故事瞓，好在好快KO到小檬。

之後就到我接力湊小妹，姐姐去沖涼，我就同小妹瞓。。

差不多十一點終於瞓到，唔使半個鐘，

呢隻妹又醒咗，我又要抱住佢瞓，

又唔知做咩唔肯瞓，玩我啲頭髮，

又突然間唔使我抱扭落張床玩個枕頭同啲被，

跟住又唔鍾意，我又抱返。。

完來肚餓，於是又叫姐姐起身開奶

（因為我唔可以放底佢，會爆喊）

姐姐當然唔係咁LIKE啦

 瞓瞓吓比人摷醒

唉。。你估我想嘅咩？

呢個係佢嘅缺點， 算，好在平時態度都好好, 唔係成日會咁）

食奶又扭一大餐，終於都係姐姐KO到佢，

過一陣又醒吓，結果就我一個同佢大戰喊吓喊吓到三點先瞓。

講咗咁耐？爸爸在那兒呢？

就係公司請食buffet之後老闆話要打返四圍喎。。。

哦，我明嘅，應酬嘛！

 我明白~  媽媽係每1分鐘。24小時。365日。

一生一世嘅事!!