小檬畫畫班 Lesson 1 ~ 水母

而家啲小朋友興趣班種類真係多到暈，

任何一個屋苑商場都開滿小朋友興趣班／學術班嘅舖。

琳瑯滿目，究竟點揀學啲咩？

又係咪真係咩都要學？ 

功利啲呢，對考小學有優勢嘅都會考慮一吓學，

我諗呢點冇咩家長會唔同意，

自問唔係出污泥而不染嘅脫俗人士，我都係一個普通嘅媽咪，

咩幫到個仔，應該都會諗吓做吓。。。

對於學野，聽過唔同嘅經歷，

最深刻係舊鄰居仔仔好細個就學小提琴，講緊三歲就比佢接觸，

跟私人老師學，一對一，學費唔平，

買哂小提琴比佢，前排約返食飯見吓面，

自己有小朋友而家先問吓佢果時驚唔驚仔仔唔鍾意而唔學，

半途而廢，浪費小提琴？ 

佢爸爸話有啲野就係要破釜沈舟。

終於呢位小朋友，而家長大成人，讀書成績都好好，

又好鍾意音樂，咩音樂都玩，去咗日本留學學音樂，玩編曲，作曲。

佢爸爸當初都冇特別想佢喺音樂方面有咩成就，

只係希望培養佢對音樂嘅興趣。

身邊嘅呢個case當然係算成功，起碼一學學成十幾年。

自己細個果時學芭蕾舞，轉頭要考試又話唔學，哈哈，

我媽咪都買哂芭蕾舞裙果，浪費哂，佢又冇迫我繼續學喎。

其實如果一樣興趣要去到迫先學，迫先做，

就應該更加令小朋友卻步！講到尾，

話明興趣班，當然要小朋友有興趣啦！

講到咁遠，

其實我想講小檬到咗三歲，就帶小檬學吓野，交吓學費，哈哈！！

（係，我相信搵興趣班，揀舖頭，

學啲咩都要撞吓板先會知道咩最啱佢）

我就好簡單比佢試吓畫畫，開吓頭先，就喺屋企對面，

知道有間喺荃灣好好嘅畫室，不過初初開始地點近啲會好啲。

淨係屋企附近都有三間，兩間舊啲，一間新開。

兩間舊嘅都有試過

第一間  畫畫
細舖，應該最多人學，因為歷史最悠久

家長留喺出面，所以唔知道教成點，

畫到幅畫出嚟（果時又細個啲)

第二間，教育中心，小檬唔係好鍾意，原因不明

唔記得冇blog添

第三間新開, 於是約咗星期六試堂

呢間喺畫室好多分店，我都唔知佢喺香港開咗幾耐，

我亦冇睇吓啲comments。

由於新開，就未太多人join，

所以今次試堂一對一

之前果間就有塊布圍住，唔使路人甲望到。

呢間就冇, 我初頭都唔鍾意

佢好似好容易比人搔擾咁

不過後來我諗應該等佢習慣咗，

就唔會受其他人影響到，

（咁啱學校老師都有話佢有時上堂唔夠專心

希望佢習慣咗喺學校都可以唔會比其他人搔擾到)

小檬喺到初頭都有望吓望吓，

不過好快就慣咗, 都好專心冇理過啲路人

(況且唔多嘅)

小朋友學野嘅時候會點打發時間？ 

附近好多按摩同整指甲地方，小朋友學野，

媽媽就扮靚relax，我有理由相信佢地係一黨嘅，賺哂女人同小朋友錢。

我初初都諗過，不過後來都唔捨得就咁放低佢，

唯有借張凳坐喺門睇住佢上吓網就算

（好在呢到冇咩人行）

我坐出面都有聽到吓Miss點教佢。。

我聽到問佢想畫咩，有幾個幅畫圖比佢參考，

油咩顏色自己揀

教佢揸筆，Miss以為佢K班識，

叫佢圓圈要合口拖手

我見Miss都有行吓過嚟，

不過坐喺自己個位多，我心諗小檬都唔知會畫出啲咩？ 

一個鐘真係好快就過

登。

    登。。

           登。。。。

水母~ 

嘩，我自己就比108分喇！

起碼唔係抽象畫先，第一堂，算喺咁啦！

佢自己都沾沾自喜

藍色海水，係用水彩油

其餘應該係紛彩

就係見佢畫得咁好，於是我就join咗呢間試吓一個月先！！

我就唔期望有啲咩成績，小檬學得開心有興趣最緊要！