小檬學校觀課

@19/03/2015 學校觀課

小檬學校喺第二個學期安排家長到學校觀課.

學校明白家長心急會問 "點解唔喺第一個學期?!"

校長解釋係因為始終係N班小朋友剛開學

可能有些小朋友情緒仍然未穩定，見到家長會好容易喊!

所以，安排喺第二學期，等大家都適應咗學校嘅生活先

(不過以我所知，小檬同學仔以大B居多，

所以老師話呢班都好快適應到)

呢日小檬如常坐校巴返學

小朋友集合好

我地就喺則邊睇住啲小朋友唱歌早早操

唔知道點解每次見到小檬同埋班小朋友一齊唱歌跳舞做早操，

我都好感動, 記得啱啱開學時我仲睇到眼濕濕添。。

（唔係聖誕演出都咁@@）

之後就排隊去洗手間

家長們就先入課室等候。。。

小朋友陸陸續續返課室，我地呢日唔係第一日有家長觀課，

所以小朋友們都冇特別望住我地，

只有一兩位有父母在場嘅小朋友會特別望住。

小檬同我用眼神交流笑一吓就乖乖咁坐低

(唔知點解呢吓好窩心)

全程都冇望過我地喇～（真係留心）

中文堂，哈哈。。。隔咗咁耐先寫，

我已經唔記得果日教咩喇。

記憶中都係老師問問題，小朋友舉手答。。。

果然，老師問咗咁多條問題，小檬都冇舉手答。

講都唔信，佢應該係好少舉手答問題嘅。點解我地知呢？

因為學校成日有好多貨堂嘅相上載學校網站，

不過我地都未見過佢係出去白板貼吓入吓果啲小朋友。

我又唔特別話要求佢要好踴躍，

不過又唔使話一次都唔舉手嘅。

之後就到課室出面玩

今次係穿過啲障礙物，入波波。

小朋友們都玩得好投入。

最後就上英文老師堂，呢次嘅主題係超級市場。

老師扮成收銀員，小朋友就買物品。

到最後老師問有冇家長想做收銀員，好似冇家長舉手，

於是我自告奮勇做。。

（好似講到好大件事，其實只係講幾句說話⋯而且我都係唔舉手答問題嘅學生嚟架~哈哈)

小檬嘅英文老師係NET，

仲要係咁多位（大約十位）家長面前獻醜！！

平時公司見客就冇問題，唔知道點解對住啲老師家長就有啲怯

不過我果刻同自己講，

呢個係好難得嘅機會喺小檬嘅課堂上同佢用英文玩超級市場。

而我覺得自己做咗家長之後，好多事都大膽咗，或者冇咁怕。

好似離咗題添！

小檬拎住啲食物咭嚟買食物，

我會問佢 "hello ...what do you want to buy？"

佢就同我講 " I want to buy the bread "

之後佢就比麵包我，我用就嘟，

比返佢，佢就放入袋，

繼續

 "hello ...what do you want to buy？"

 " I want to buy the fish" 

跟住好似仲有milk

買哂佢要買嘅物品之後，我就收錢。

完成晒之後佢同我笑一笑就返埋位!

雖然幾個簡單步驟，

不過要面對住成班自己嘅同學仔+家長

講埋英文，冇怯場，我已經覺得好叻（眼淚又滾動中）

唔好話佢，我自己都會有少少啦，

所以我的小檬係叻叻嘅！（又嚟喇！！）

觀課完畢之後，學校安排我地同校長有個小組討論，

對於學校嘅上課安排比啲意見。

校長即時記錄我地嘅意見，睇得出佢都好重視我地嘅意見！

觀課比我見到其他唔同小朋友喺課堂上嘅唔同表現

其他同學仔，有啲都好安靜， 有啲擔天望地

有個女仔就好多野講，有個o殊啲講野嘅男仔

有個做管家婆咁話啲男仔 

 "老師話女仔出門口先架"

好好笑!!

我好鍾意小朋友，以前都有諗過做幼稚園教師，

不過當佢地可愛得意就好，如果扭計曳，我諗我都會投降！

我真心明白而家做幼稚園老師(或者學校) 真係唔容易，

學校/ 家長嘅要求越來越高, 

而家啲小朋友比以前叻

（或者曳，或者蠱惑）

又要面對一班家長（仲要唔知道怪獸唔怪獸)

所以我都好充心感激佢地教導小檬!!