倒退期

好多人之前話小朋友返咗一時段時間就會有倒退期,

一開始返學好叻嘅小檬都出現咗。

第一大特徵就係最直接咁話唔返學，

然之後就蹺埋對手，整長條咀！

最主要應該係眼瞓，叫極都唔想起，

跟住好辛苦叫到起，就話唔換衫，要著住件睡衣！

之後又唔食早餐，唔飲奶。。。返學前又唔想整喊佢，

用軟工又唔得嘅時候我都忍唔住要鬧佢！

雖然出現次數唔算多，不過好驚會繼續落去。

小檬有到好，就係好容易唔記得自己扭緊計，

搵啲野同佢玩就好快唔記得。
之後又會換衫返學，落到樓下等校車上校車仲不知幾咁開心添

今朝小檬換衫時又係扭吓呢扭吓路，不過最終都可以出到門口。

喺到排隊都算好乖，學校車嚟仲自己行出去，

點知臨上校車時就話唔返學，喺咁攬住我喊，
果刻唯有抱住佢，等其他小朋友先上車，最後先抱佢上車，
上到去都仲係喊，啲媽媽們話佢喊得咁厲害，
又叫我抱返佢落嚟（留意慈母已經六神無主）
校車叔叔話要開車喇，我唯有話唔上喇，我自己帶佢啦
其實我驚開壞頭，不過果刻冇諗到咁多

跟住其中一個媽咪話校車開喇，
冇得上架喇，問佢上唔上，佢又話上喎。
我好似玩傳炸彈咁拿拿臨抱佢上車就放低，
點知又喊過，我實在唔可以要成車小朋友等我去慢慢安撫佢，
於是就叫校車EE抱住佢就轉身落車
啲媽媽們叫我唔好望，快啲行開

唉。。。，點捨得唔望吖？？
唯有裝吓佢，都係勁喊。。。媽媽們話轉灣開咗車就冇事。
上返屋企換衫就見到學車叔叔sent 咗張相比我

悶悶不樂的小檬


因為學校放假比K1 interview，所以星期五同星期一都放假，
尋日下午同佢去咗公園玩，
老師話長假期之後好多小朋友都會咁。
(我打比老師等佢留意吓)
希望只此一次啦。。。唔好再係咁呀！

如果唔係我都唔知點好！