CWB

星期六小檬爸爸又醉心事業（實情係同老闆們打牌）

於是我又趁機同小檬搭地鐵，唔想佢淨係識坐車。

之後都搭過，不過而家大咗，多野講，

喺地鐵見到三碌玲啲廣告，見到海豚，

之後就同佢爸爸講喺地鐵見到海豚。。。

唔知以為係真添~

去圓方拎個袋仔整返粒鈕，點知出事喇。。。

係我唔好，明明同呀仔行街，

點知買咗朵花

唔好再講喇，我會好內疚（其實好開心至真 ）

諗住食埋拉麵先行，點知見佢已經有少少眼瞓，

改變策略，買個麵包比佢食算！ 

食完轉埋車到中環，佢已經檬咗（我地叫瞓做檬咗）

好唔容易先落到車，諗住喺sogo應該有啲cafe可以坐低，

點知淨喺行出地鐵上去到sogo地庫，再去搭lift 都多人到想C。

真係唔知咩事，細細粒嘅媽咪（雖然肥）仲要抱住瞓咗嘅小檬，

差啲不支倒地！

本來諗過行去世貿，應該冇咁多人，

但三十幾度我諗我都一樣不支倒地。

於是都係揀喺冷氣地方暈低算！！

上到9樓仲要行樓梯，去到cafe又要等位（我認我天真！）

一路口噏噏鬧緊走嘅時候，好在見到有個偉大嘅同志已經起身再去血拼，

終於有返啲血色！

喺CWB探佢媽媽嘅EE終於出到嚟拯救我！！！

瞓多咗一陣就起身，攪咗咁耐先有得睇玩具。

而家SOGO嘅玩具細到呢。。。可能裝修緊啦。

有個德國出品嘅木製碌波子，

成三千蚊至五千蚊一盒，快啲叫小檬碌多幾次，

玩完就行去鄉里媽咪未去過嘅希慎，

影下小懵

（之前有同事送咗呢隻LINE兔仔比小檬，

但寫錯咗小懵，於是我地就叫呢隻兔做小懵！）

好好笑，公仔下面寫住不準觸摸！ 

你話我知有咩人係呢啲情況吓會唔掂個公仔？ 

尤其係小朋友！

好累又好肚餓。千辛萬苦先搵到間食TEA嘅cafe

仲有小志強

最後又喺老三陽買咗幾隻粽，又幾好食喎！

（原來佢搬咗我都唔知，證明我真係好耐冇去）

回程喺香港站

小檬隻手又要平衡！！ 哈哈

自從喺吉吉島有條斜嘅自動電梯教過佢要伸手出嚟平衡先唔秩，

佢一見到平嘅自動電梯就係咁！

返到屋企，抱住B be，小檬仲要玩腳腳，真係散哂！