除咗小學同學一家同我地同一座之外，
原來又有另一師兄都係呢座。
世界真係細。佢和女友喺FB見到B be就要同佢玩吓，
上星期我地夜晚食完飯去咗佢地屋企玩。好方便，搭程lift就到。
果晚B be可能去陌生地方見到陌生人，
唔使五分鐘就大喊要走人，
哥哥一貫作風，有得玩有得食，冇有怕！
尋晚，師兄師姐(女友又係師姐)買咗禮物比佢地，嚟咗同我地玩。
今次主場，B be表現好好多。
小檬一直都未試過去人地屋企而我地唔喺到，
玩咗一陣，我就提議不如放小檬去佢地屋企，
見咁近，接返都容易啲
睇吓冇我地喺身邊就爆喊。
出門口之前都同小檬講，去哥哥姐姐屋企玩好冇？
我地唔去架，佢都話好。。。。
點知一出門口見我地唔係一齊就即刻爆叫喊，
話要媽咪婆婆妹妹姐姐全部一齊去!!!!!!!!
（好似皇帝出巡咁）
結果我就陪佢落去，入到屋企，坐低之後哥哥就攞雪糕比佢
我就話我唔記得帶鎖匙，要返去攞
眼裡只見到雪糕嘅小檬就話好，我再話好快返，佢又話好，
語氣已經好似話"得喇得喇你去啦唔好咁長氣。。。"
（唉冇心干）
偷影
雖然話搭程lift就到，但為免行嚟行去，
我哩咗入呀狗狗波子果竇到，再關埋廚房門，扮走咗。
好在有電話喺手，唔係我就悶C。
我好似啲工人姐姐咁坐喺張凳仔到，感吓手機，
聽到佢地喺出面玩到嘻嘻哈哈
自己就一個喺到焗汗。。。情況好妻涼。
連波子到要走出廳唔陪我。。。嗚嗚
(我都知道自己一個喺廚房好慘，所以平時工人姐姐做完野
我都會叫佢坐出嚟一齊同啲小朋友玩，或者睇吓忠奸人。)
冇熟人，同只見得兩次面嘅哥哥姐姐一齊，究竟得唔得呢？
會唔會搵我呢？
有跟開小檬嘅朋友應該知佢喺親善大使，友誼先生，
所以係冇問題嘅, 一次d都冇搵過我!!
差不多半個鐘，我就嚟頂唔住熱C
於是我坐返出嚟大門走廊
見佢地都玩得好開心
姐姐好有心機同小朋友玩
小檬喺塊鏡到見到我，
好在仲會走過嚟叫我媽咪～
臨走小檬咩返袋仔（扮書包）
叫姐姐扮老師，要小檬同老師bye bye
雖然到時返學情況好唔同，
不過總算係小檬一個小小嘅試驗吖。
下星期再試過，不過我點都要返番上屋企，
唔再焗汗！
