好姐姐(咪講)

一路婆婆加鐘點照顧小檬到攪得掂，所以都冇再請工人姐姐。

到有咗B be後，真係要認真諗吓點安排。
好多朋友叫我地面對現實，要用嘅就要請。

(大家未請過姐姐，都應該明白唔想請姐姐嘅原因)

於是慢幾拍嘅我地終於走去請，過程非常簡單去第二間就請咗。

完全冇上網睇吓係咪黑店。

第一間係大型嘅公司，入到去，咩都唔識嘅我地就坐喺個電腦螢光幕面前睇，

我自己覺得有啲似相睇。。。個staff"好專業"咁玩自己個電話！

我知呢間唔掂，於是撇！

諗起平時行街嘅商場有間，於是又走去睇吓。

你邊到介紹架？？？

 冇？  

吓，咁我地入唔入得嚟架？ 

原來呢間專係做熟客，接referral嘅，所以先咁問我地。

睇咗兩個較合心水眼緣嘅profile同video 
staff 姐姐再幫我地比較佢地嘅優點缺點，
唔使一個鐘就決定

好感恩，我地都好滿意呢個姐姐

(不禁暗暗咁覺得老公揀得好醒，
呢間agent 又好，雖然比一般貴，但佢好好，
以上兩點唔詳細講，想知可以再問我，我冇收$)

當然我地已經知道要調節自己嘅標準，

so far 佢各方面都好好，最緊要係佢錫小朋友，尤其係B be，

可能佢幫手最多, 睇得出佢好錫佢。

佢對婆婆都好好，出入會盡量哂啲野，唔使婆婆拎

就算婆婆拎緊佢都唔會扮睇唔到
當然有缺點，不過都係好小事。

五月時知道姐姐生日我都準備咗個蛋糕同份禮物比姐姐

熄哂燈同佢唱生日歌，比個驚喜佢，佢真係感動到喊。

可能由於佢之前係杜拜到做，工人地位好低微，
又唔比佢地笑，冇哂尊嚴冇哂笑容，

所以咁樣做佢真係會好感動！ 

佢之前一嚟到唔係好識笑，又唔會同我地一齊食飯，
而家笑容多咗好多，不過都係習慣自己一個喺廚房食，可能覺得自在啲，
冇所謂，最緊要佢自在，食得唔自在都好慘

婆婆啲英文已經算叻，起碼同佢溝通到，不過到試過好多笑料，

例如 會同姐姐講 open the 開門,

有次剛蒸好魚，婆婆叫佢倒咗鑊裡面啲水，

點知佢倒返落條魚到。。。哈哈哈。

當然可能會好嬲，不過可以試吓從佢地嘅角度出發，

佢未試過，唔識係唔出奇嘅。。。

當笑話睇之後教返佢，大家都開心啲。

有個外人會唔會唔慣？？ 初頭都會，不過而家會當佢係自己人，

好似啲姨媽姑姐三嬸之類。

而家放工就返屋企，比每日返婆婆度慳咗啲時間，

食完飯，就會一家大細落街散吓步

所以有姐姐嘅生活我算是滿意

之前我啲砂糖兔比啲衫埋住咗，上星期終於執好！

佢今朝幫我執完房，見到佢咁放我啲砂糖兔。

so warm!

原來一個好嘅姐姐真係會融入家中~