N班大作戰 ~ 完結

N班大作戰終於完結！

小檬嘅學前教育交咗比屋企嘅教育部，即係佢爸爸。

我見到咁多資料討論區咁多topic我都暈，所以我決定唔理（咁多）等爸爸諗。

同埋如果兩個有唔同意見都好麻煩，

所以我都係唔知咁多，等接order做野算

於是邊日有派位結果我係唔係咁記得嘅

其實只差一間就已經全部有哂結果

上星期尾，喺FB見到blog友嘅一句'開心到震" 

諗起可能係呢間嘅result 出咗。。。即刻問吓佢之後就拿拿臨落樓下攞信

一開信箱，冇!!! 快啲睇吓討論區點講先

。。。

吓？冇信即係冇？？

 呢間原來冇就冇信，唔會有信話唔收你

吓，咁小檬即係冇offer？？？？？？？？？(喊)

。。。

係咪未派信？信箱裡面啲信好似係之前未攞嘅

。。。

好在管理員話今日未派信

於是非常忐忑咁上返去坐立不安咁等半個鐘再落去，

因為管理員話應該差不多時間

再落去見到郵差, 都未見到信，見佢仲mark緊啲掛號信，

(平時見到郵差都係掂行掂過，未試過咁留意郵差嘅一舉一動)

問佢我個單位派咗未，佢話大約15分鐘，

淨係肉體去超級市場買野，靈魂睇住郵差派信

返嚟終於見到封信喇 ~

嘩，真係有信呀!!!即係有offer 喇!!!真係好開心呀!!!

一路都知道呢間係好多人爭，

上午班位又唔多，得廿幾個，

我諗報名嘅都有過千，

有啲朋友都話呢間interview係最難嘅一間

(N班大作戰 ~ 8th interview 終極篇)

小檬都做到八九成已經好滿意

我地之前嘅offer都唔係十分滿意，而家考到呢間真係好開心，

唔係only小檬好叻就考到，

而係可能合資格嘅都有好多，而仲都要好好彩比人揀中先得！

學校其中一點使命: 面對挫敗及成功的能力     <=== 我好同意要佢學習挫敗

小檬希望你鍾意呢間學校，讀書得開心啦 !

N班大作戰 ~ 8th interview 終極篇

承上篇
N班大作戰~7th interview，
繼續比掌聲小檬媽~
˜拍拍拍拍拍拍˜

今日interview出名難嘅呢間學校，應該抱住平常心去in (其實間間都應該係)
但當我入到學校嘅時候,好難懶型咁扮唔志在,

我做野都算認真同希望力求完美，幾咁隨緣都好，

都總想叫完成到，比個交代自己, 
因為上次連課室都唔肯入, 於是今次佢肯入課室就當贏咗！！

話雖然如此, 我幾心儀呢間，因為離屋企唔算好遠之餘，又口碑好好，

所以我不經意地又比咗壓力自己! 

吸取教訓，最大問題唔肯入課室，

所以今次我準備咗啲小食，放喺衫袋，隨時準備用！
仲有不停同佢講見到老師要講早晨，
要聽老師講故事，要坐定定唔準行開，
坐完張凳要推返埋佢, 走要講Bye bye，
收到禮物要講thank you
希望洗佢腦

入到去，有一條滑梯同有架圖書車車，冇其他玩具，

記得之前PG就係衰喺滑梯度，又係好似上一間咁, 我驚一比佢玩就一發不可收拾！
於是就抱起佢，周圍睇！

好在璧報板有佢好鍾意嘅馬達加斯加, 睇咗十分鐘，平時吹水都冇咩難度嘅我，
對住張只有I phone咁大嘅圖片，我實在唔知再有咩可以吹，
記得我拎咗啲小食嚟嘛？
冇錯，呢個時候我就餵啲司各脫糖糖比佢，即刻冇事！               
  (我搣到好細粒，比佢食都唔係好覺)

已經冇咩好做，唯有比佢玩sir滑梯，

玩咗3。4次，見上一批已經入哂，

應該好快到我地，於是就同小檬講，我地要去聽老師講故事喇！

為防佢反對，我又比咗粒司各脫糖佢

雖然鼻C咁大，不過佢都好滿足, 所以可以好順利著返鞋

叫名喇，又排吓隊 =___= 
佢唔想排，想走，於是又係司各脫糖糖

part 1 認／講物品
順利入到課室, 第一個係我地, 可以自己揀一張檯坐低，
我用9秒9scan過，揀咗個感覺最nice老師嘅坐低。
果然，我眼光都幾好(wahaha) 呢個老師好nice

我覺得主要考講嘢，
問小朋友叫咩名 ~小檬答到~

邊個同你嚟 ~媽媽~

檯面好多物品，要拎到指定物品
飲水, 抹咀 想畫畫,講故事 要用乜?? 拎俾媽媽
小檬除咗飲水拎咗個牛角包比我之外，就全部都做啱
(十萬個唔明點解佢會拎個牛角包比我,火!! )

指住香蕉，問係咩嚟, 小檬答banana
你有冇畫畫架？邊個同你畫呀？
佢突然見到檯面上嘅熊仔，話bearbear =_='


老師拎唔同嘅顏色筆問佢係咩色？ 
佢全部都做到，淨係支紅色筆話係啡色
（我諗係因為隻顏色唔係好sharp，有啲瘀紅色咁，佢就覺得係啡色）
之後叫佢拎指定嘅顏色筆比我, 都拎到

有四幅圖畫（umbrella／牙刷／梳／牙膏）
問落雨要拎咩，指住梳問係咩？ （佢答咗係牙刷）


之後老師用0。09秒嘅時間將一張圖畫閃過喺小檬面前，
之後問佢見到啲咩!!!!!!
嘩，呢part真係考到啲小朋友，真係一個不留神真係冇可能講得到
好在幅圖畫係小檬嘅至愛~遊樂場
老師都差唔多未問完佢就已經好high咁話係sir 滑梯呀！！！
仲問見到啲咩，小檬答有bird / sun
 （呢part我已經好滿意, 淨係牛角包／啡色／梳唔啱）
喺課室入面又排隊=__= 等出去第二間課室
 (有啲小朋友已經想走, 包括小檬，於是又出動糖糖,
我覺得自己有啲似喺海洋公園餵海師咁)

part 2 英文唱遊
出到去又喺另一間課室門口排隊 =___=
(我開始懷疑佢地係刻意要啲小朋友排排隊嘅)

老師指示如果有音樂就用膠圈扮車鈦盤，音樂停就停。
大部分嘅家長都有提水叫停，好嘈！

停咗之後就跟住指示將相對顏色嘅膠圈放喺地下相同顏色嘅圓圈內

大部分嘅家長都有提水叫停，好嘈， 你唔提都唔會知你冇提
老師首先叫拎住黃色膠圈嘅放喺地下，
小檬想跟住，我問佢食唔食糖糖，即刻啪一粒落去，坐定定。

到佢拎住嘅藍色喇，我提一提blue 呀，佢就一支箭咁標出去放落藍色圓圈，
Bingo!!!

Part 3
再去另一間房，填問卷同見校長
我諗呢part 純粹係睇小朋友會唔會乖乖咁坐定定睇書陪家長。
佢自己一個都好乖玩
我填問券時係手震嘅！自己考試都未試過咁!
校長講完之後就叫我地出去拎禮物，
之後就完成

出到去，老公喺門口等我地，
我不停同佢講我好驚，真係好驚小檬會唔肯，要走！
 眼有淚光，我先知道原來我真係好緊張好驚

好喇。。。終於完成！！ 
小檬今日嘅表現喺媽媽心目中都有80分，
獎佢去遊樂場玩啦！！

舅父試新機

雖然我覺得in得唔錯，但一山還有一山高
都係唔好期望咁高喇! 


所有interview都完哂！！
 yeah～  

N班大作戰~7th interview

首先，請比熱烈嘅掌聲小檬媽

~拍拍拍拍拍~

點解？係咁嘅...

承上次爸爸經歷慘痛失敗嘅interview之後，口裡滿是豁出去嘅我，

其實暗裡背負沉重嘅壓力再次踏上interview之路！

 （好明顯淨係得家長緊張）


首先，第一間係九龍塘嘅一間名校，好多人報,只係當參加大抽獎。

學校準備咗啲遊戲比小朋友玩

雖然喺車啱啱瞓醒，不過有得玩就好快醒神

bubble time

做手工，不過佢鍾意玩支膠水多啲

到我地嘅時間喇，排隊 =___= 交form準備入去室內嘅課室

（爸爸喺出面睇住架車，得我一個帶，

其實有啲難度因為要佢眼見住啲玩具遊戲冇得玩陪你排隊）

行到門口，突然小檬話： 唔入呀~唔入呀~ 

我嚇到個心跳咗出嚟!! 
果一刻真係想叫"呀星星都教授"嚟一個瞬間轉移入去

我即刻抱起佢同佢講: 入面好多woody巴C㗎，快啲入去啦！！

 好在果一刻扭轉到，緊張過自己interview
不過入到去又再排過 =___= ，

啲壁報上嘅勞作真係有巴C，先可以令佢笑返。

交完報名費之後又等過，有好多玩具同sir滑梯玩，

我諗咗好耐比唔比佢玩sir滑梯級，
因為我好驚佢一開始咗之後，到叫名唔肯走，

但又諗會唔會入去之前唔比佢玩又唔心息呢？？ 

我諗咗好耐....

好在開始叫名到我地，不過又要排隊 =___= ，已經見到好多小朋友想逃走！

我又抱住佢，話比佢聽一陣有玩具攞呀

好在真係見到個課室啲小朋友拎住玩具出嚟，我真係冇呃佢架！

入到課室，先坐喺張檯到玩吓玩具，之後就圍圈聽老師講故事

可能喺英文嘅關係，佢唔係好留心，有啲時候仲想走，
我喺後面唯有叫住佢，我諗老師都會見到，
聽到尾聲仲要話: 我要玩玩具呀。。。（指住張檯）

之後係聽音樂，跟住拍手step，佢都有做，
最後要捐過個圈，前面有個小朋友唔肯
佢媽咪堅持要佢捐

(我都明白呢位家長嘅，可能平時肯做，

到呢個時候嚟玩野，係人都會抆，不過interview就係睇臨場表現嘛)
我地就喺後面塞住哂，
小檬差啲想走~ 好在最後都可以捐到

老師比禮物佢嘅時候，佢呆咗望住老師冇講thank you 

呢間我冇期望過，所以都算輕鬆完成
都算係咁啦! 

N班大作戰~6th Interview

隔咗一排，小檬嘅N班大作戰又嚟喇。。。

喺我生B be 之前應該仲有2-3間要in，唔知點解我好有預感B be會早出世，

所以果時都已經同舅父講如果我咁啱生緊女，就要佢同小檬去interview，

點知都算啱一半，真係唔係我帶，由爸爸帶

成個過程應該用兩個字可以形容到，就係"失敗"！！！

發生咩事？？？唉。。。。簡單啲講，就係唔合作，扭計！

interview時間係早上八點幾，爸爸已經好叻叫到佢起身，

換到衫（而家佢好煩，又話唔著呢個，唔著果條褲，

準備好比佢嘅一套衫分分鐘可以唔著！）

之都好準時到達現場，點知如我所料，真係唔肯入課室

點解我咁勁會知？？
係咁嘅, 之前有朋友嘅小朋友喺呢間學校讀緊，
佢知道有個聖誕Playgroup可以參加，就幫我地報左
點知由我帶嘅第一堂佢上咗part 1 之後就唔肯返入課室，要喺出面sir 滑梯
仲喊哂，喺課室門口由佢喊一陣之後
我大住籮咁大嘅肚, 好在後來幾經辛苦都氹得返佢入去上埋part 3
所以，我諗佢如果又去返同一個地方又會唔肯入


到果日interview時候,爸爸話一嚟已經唔肯入，仲喊哂！
之後啲老師比佢轉個圈再嚟過，不過爸爸用盡辦法都唔肯入面，
終於到第三次佢都係喊哂唔肯入！
結果老師要爸爸喺application form 到寫 “GIVE UP” ！

爸爸超嬲，嬲到嚟醫院接我同B be都黑哂口面！
攪到我都有啲燶面，嚟接我同B be唔係應該開心嘅咩？

小檬係好醒目，不過而家23M 先in嘅學校就應該好難再in得好，
點解，因為佢真係好爛玩！
唔肯坐定，我相信大多數學校都想收啲乖乖坐定嘅小朋友！！
唉。。諗返之前未夠兩歲in嘅都肯乖乖入去坐定定，
情況真係好唔同！
我地最想佢入嘅學校就反而係喺佢最難控制嘅時候，
如果in 咗唔得都心甘命底，但而家連入去in 都唔入！ 唯有話係timing問題, 冇緣份!
我有諗過如果係我去會唔會好啲，不過可能結果都係一樣！
 算啦，或者K1再試啦!!

我咁安慰自己,第時佢做咗成功人士比人訪問嘅時候，會講返呢件事，

諗返其實係幼稚園嘅損失呢~

N班大作戰~小小總結 2

之前in嘅兩間，已經有咗結果，
1間reject，1間waiting

第1間都預咗架喇，出名難入，又揀家長。

但係第2間結果反而令我意外，因為成個interview過程小檬都算好好，
唯一唔好就係經過個廚房佢行咗去玩咗一吓，
之後先去Miss 果邊做指令。
我見Miss問佢所有野都有答。。。

唉.. 算啦，而家冇得考究點解會唔得都冇意思，
唯有又寄望之後果兩間啦！！

小總結:
已Interview : 5間  
offer: 4 間  (1間唔使in就有offer) 
waiting list 1間 
reject 1 間 

二月尾先有另一間in，
B be你要等哥哥in埋先好出嚟呀。。。
唔係爸爸會好lee hea架！

媽媽，唔好緊張啦。。你睇我幾淡定～

N班大作戰~5th Interview

今日Interview 時間十點幾

去到見到好多in完派比BB嘅波波，

入口有好多miss喺度，

登記咗就入去課室玩住等，d玩具唔新淨

其實唔緊要，但圖書就可以用殘嚟形容，應該叫爛，

因有d已經比小朋友撕爛咗，已經睇唔到，
呢方面可以管理得好d！

之前有d學校好細心照顧到我呢d大肚家媽媽，

但呢到比小朋友及家長嘅凳仔係矮凳，我勉強都坐到嘅...

等咗一陣就叫名入得！

入到課室老師叫家長先抱住小朋友聽老師講解一下面試嘅內容，

呢到就有張高凳可以比d大肚媽媽坐。

面試：老師帶住小檬出去玩，家長就坐埋一邊等，

老師講明如果小朋友唔肯係會扣分嘅，

小檬咁鍾意玩又唔怕陌生，個個都咁friend ，當然過關！

出到去我哋只係遠觀佢哋嘅情況，

老師首先同佢玩手抓板，之後喺個箱到拎d玩具問佢係咩，

我隱約聽到佢好似話車車，之後好大聲話「仲有呀」！

一路都有另一位老師mark 分，好認真，

跟住老師話去玩波波，

點知行去嘅時候比小檬見到個喺角落嘅廚房
咁都比佢見到,
佢要玩, 老師都有同佢玩，

另一老師繼續mark分，

玩咗一陣老師就叫佢去返玩波波，

將d波波放入籃，個籃跌咗小檬都有扶返起佢。

最後就係一位net 同小檬疊軟嘅大積木，

疊完我聽到miss叫佢push，點知小檬唔知佢講咩，

繼續疊高，miss 做埋動作佢都冇跟！=_=

In完有個波波送比佢，叫小朋友比媽媽爸爸，

可能呢到睇下佢會唔會比。

呢間學校都好多人讚好，所以好多人報，

檬爸當初諗過要同舅父輪流排通宵交form，

但後來我都勸佢哋第二朝早d去算！

一個月後等通知，呢間interview 感覺真係㨂小朋友，

不過學校嘅硬件可以好d，至少爛咗睇唔到字嘅圖書唔應該再要！

N班大作戰~4th Interview

星期六早上去左第4個interview。

得知這間報名人數幾千人，收生70個，除咗識人同識飛，

Interview之後係咪真係會有機會有offer呢？？

不過既然已經報左名，就去吓啦。

之前咩訓練都冇，諗住都係當去玩吓，連衫都冇搵定。。

朝早先搵返件襯衫，點知已經短（梗係啦，呢件係6～9M 哈哈）

不過有外套仔遮一遮，唔怕啦！

好準時去到，仲有少少時間喺公園，

影返兩張相，好似未瞓醒咁。

去到1030嘅仲等緊入，我地1045就喺到排隊等

果日廿幾年度再加埋太陽，好熱！

小檬企咗一陣都要行嚟行去

好在都好快入得，爸爸去登記，我就同小檬去玩吓積木

初頭我驚佢會玩到唔捨得走，好在唔使5分鐘又可以入去入面。。。

不過係再排過。

見到啲車仔。。sir滑梯又冇得玩，真係好慘～

等咗都有15分鐘先可以上到樓梯喺班房門口等，果到就好啲，

有啲圖書比小檬睇吓。大約5分鐘後，就入班房interview，

今次係group in，兩位家長都可以入，不過就坐後面，小朋友就坐前面，

大約10個一組。有位Miss 喺中間，

另一位就喺則邊Mark 分。

Miss首先問家長小朋友最鍾意邊隻顏色，舉起手上的顏色咭，

然後叫小朋友攞起佢最鍾意嘅顏色,睇吓我地了唔了解小朋友喎

（汗。。。我小檬都唔知咩叫最鍾意喎。。。唯有揀佢最識嘅紅色啦！）

結果。。。
佢攞咗個粉紅色毛毛球

跟住就叫小朋友攞綠色嘅積木出嚟，

小檬都拎到，不過我唔覺得有人知道

Miss叫小朋友收拾玩具，

小檬連隔離個小朋友嘅籃都想幫人執埋。

Miss問家長平時同小朋友睇咩故事書。分享完之後，

就開音樂叫小朋友跟住做動作，step 啦。。舉手仔搖手，

眼見都有小朋友郁，但並唔會跟到Miss，或者太嘈喇。。

我地都要喺後面重覆Miss嘅說話小檬先聽到。。

唔使兩吓，音樂就停，呢個Group Interview 就完喇！！

上次果間我已經唔覺得佢可以睇到啲咩，呢間簡直係一場大龍鳳！

當然啦。。幾千人冇可能逐個In，

所以比咗張問卷我地填，

都係問我地啲小學係邊間
點解揀呢間學校呀。。點形容你小朋友呀
我覺得又係揀家長囉！
有錢嘅，學歷好嘅，出名嘅

（我睇啲forum話有啲藝人IN）

加加埋埋已經夠人數，
我地只係大茄！！！

其實去之前都知架喇。。不過算啦，當吓大抽獎囉！！

學校都有送啲支吹泡泡比小朋友，
小檬總算有啲收獲！

今晚啱啱知道之前In嘅第三間收咗小檬，不過係PM班
返AM班時間真係好用啲喎.....
真係要諗吓

小總結: 

已Interview ：4間

收到offer: 3間, 1間waiting

 

N班大作戰~3rd Interview

今日嘅interview 喺四點，瞓醒晏教出去都唔係好醒目，

因為之前唔肯瞓，瞓得唔多，去到都有d呆=_=

呢間學校interview分兩part, 

一位家長去見校長，一位就陪住小朋友。

我派咗檬爸去見校長，佢一表人材，學識廣博 (擦下鞋先唔係下次唔肯去=p）

應該好過我呢個C9仔去，

但估唔到跟本連一句說話都唔使講，

凈係一排家長坐喺度填問卷.....

問題係大熱嘅問題，學校叫唔好向透露喎。。。

(呢間學校唔鍾意家長講咁多出嚟，所以我唔開學校名喇！）

我就陪住小檬，首先係circle time，唱下歌仔，

小檬仲係有d呆，唔係好投入，不過都有拍下手仔

玩咗十分鐘之後就入房interview

一張枱有四位小朋友，我果張只得三個，

老師攞咗積木比兩位小朋友，第三位就玩住車仔先

老師叫小檬疊高佢,佢疊咗三粒就跌咗，又嚟過。

好快又疊到。好在老師都望到佢疊完

老師又考其他小朋友，

之後砌數字形狀板。

第一。二個都好快砌好，

小檬都砌完，老師都未望過佢一眼，

因為望緊第二個小朋友

佢又拆返，又玩過，

我驚老師以為佢唔識砌，攪咁耐，

唯有話你砌完喇？！話比老師聽啦!!!

到第三個，有兩個都係波浪型，

佢調轉咗，老師都有提佢，

最後就比三個水果，叫佢比條香蕉媽咪食，

再比個蘋果老師，小檬都有做到！

一個老師對三個小朋友（我諗四個仲難）

感覺佢本唔可能咁容易知道小朋友嘅程度

唔知點解感覺唔到呢次interview係考緊小檬。。

反而好似揀緊家長父母多啲。

呢間都算係好學校，我有去佢地嘅家長簡介日

都覺得唔錯嘅。

如果佢收，都有可能考慮會讀。

(真心，不是囂張，因為㨂每間學校, 

都有其他因素考慮) 

In 完食咗個O華田木糠布甸 

好味！

N班大作戰~小小總結

開始咗一段時間，

睇吓啲統計數字先~

已Interview ：2間

收到offer ：2間（有100％！！哈哈，因只係in咗兩間） 

等interview:有5間 

交留位費，暫時一間

留咗第一間比offer 嘅AM班，人人心態都係會買定個保險先。不過我都唔會留咁多間，首先真係要比錢，間間留真係唔掂，未係好心儀的offer都唔會留。 

睇到啲細B家長會話大B有咁多offer就唔好留咁多，我都好同意，如果已經有心儀offer嘅， 我都唔會間間留，但個個家長諗法唔同，講到底都只係想個小朋友有間自己心儀嘅學校收，但其實又係咪啲家長想留咁多嘅呢。。個制度跟本有問題，再加之前啲雙非新聞咁洶湧，住邊區都好似啲驚冇位。唉。。總之就辛苦父母啦

以上只有係我C9仔小小心聲。 

啱啱收到一間學校嘅interview時間，

係

朝早8：40。。。

計埋行車泊車時間應該要6:00至6:30起身，仲要係冬天時間。。

又一次挑戰喇！ 

N班大作戰~2nd interview 浸信會奧基

第2間Interview係浸信會奧基。

地點喺九龍塘，但唔係好多幼稚園果邊，算隔涉，

地下停車場連八達通機都冇，好似任泊咁。。。

呢間係新學校，舊年先開,全用英文授課。

雖然佢個名係浸信會，但睇返份報紙報導先知道佢地冇關係，

不過又可以用佢地啲禮堂喎，有啲奇怪。

上到去其中一個Miss帶咗我地去活動室等埋其他嚟in嘅小朋友就去school tour。

校舍非常新淨，好靚！！ 

活動空間好足夠。

攀石.....

gym

每間課室都唔同色去區分

     

課室可以通到出去呢個playground

啲設施好新，好靚（又係新同靚，唔知點再形容）

啲車車靚到呢。。。唔同之前果啲甩皮甩骨皮骨

toilet仔

medical room
有peter rabbit 床單

1st part : group interview

我諗住係坐地下，所以叫小檬爸入去

 原來都係坐喺檯仔到。

我就做以前唔會做嘅事，就係喺門後面裝佢地interview。。 

全程用英文 

1 入形狀~Miss想佢跟埋顏色入，有啲難度，所以佢冇跟，入到就入。

2 搭積木~ok

3 開拉鍊~佢冇反應。。哈哈，冇開到

4 扔波波~係果啲吉手黐住果啲波波，

佢唔鍾意吉手，所以都係冇扔。。

之後佢見玩完檯面嘅玩具，就自己行咗出去書架攞書睇 

佢攞咗最鍾意嘅Woody 書, 打開仲好大聲叫woody。。又同Miss講帽帽飛走。 

最後去咗tidy up 本書書就bye bye miss 

雖然全程Miss用英文 ，但肢體語言小檬啲都應該知佢要求佢做咩。

2nd part individual interview

基本上係in 父母，由校長IN，有位school manager喺到，

如果父母英文不太靈光都可以翻譯一吓，

問我地平時邊個照顧佢，

喺屋企同講廣東話定英文點解揀呢間學校，

喺咩途徑認識佢地。 

好快就in 完。老師都係好後生，有啲似係native speaker，

網上討論區有提到呢間學校嘅bad comment，不過亦有啲棒場客。

純粹個人感覺:

由於係新校，好似唔算多人報，相對好多嘅大校應該都容易啲入呱，

我覺得如果係細B嘅話，有興趣可以試吓！

info:

浸信會奧基英文幼稚園 Baptist Oasis English Kindergarten

開設班別﹕Playgroup、幼兒班（2013年2月開課）、K1至K3（2013年9月開課）

學費﹕English Playgroup月費 $2000至$3500，收費視乎學生每周參加多少天而定；
幼兒班及幼稚園月費$3800（分十期繳交）

地址﹕九龍深水埗歌和老街55號2樓及3樓

查詢﹕2891 9897

網址﹕http://www.boek.edu.hk