小檬檬hip hop

小檬上星期先好似識爬一吓半吓，都喺未係咁識向前， 只係沿地打圈轉！
今個星期，進步神速，已經識向前行

雖然唔係好正式咁爬，但都算唔錯喇！

呢日佢爬爬吓仲hip hop 添！

我倒帶睇返，應該係佢隻手冇伸返出嚟，但個身體又想向前, 咪升起左咁囉，
其實已經係第二次喇，第一次我地睇到好似見到異形咁呀！！
嚇死我呀！

小檬食餅餅 (healthy times + beans stalk )

買開BB食物，買左兩隻餅餅比佢試，

一隻係helthy times，一隻係bean stalk(後來先知道呢隻係米餅)

試左helthy times先：呢個牙仔餅未食果時好硬，佢地到真係好難咬得爛，
爸爸都要好大力先拗得斷，唔使驚佢吞左。
但係...
我地放工返到去，婆婆話有條下午未食完，
喺個盒仔度拎返比佢食，點知可能口水令佢淋左，
小檬一咬，變成一細細舊，
嘩。。。。。我即刻伸隻手指入佢口到撩返出嚟，幾驚佢會哽親！
（遇到對BB危險嘅事，媽媽就會好自然咁發揮媽媽力量去救佢）
所以，呢啲餅餅唔好食完又食呀， 要睇住佢地食先好！

再睇網上意見話heniz嘅餅會硬啲，下次試吓heniz先

食到成身成件衫都係啡色。。。

今日試食埋bean stalk 嘅米餅，好似大人食果啲日本米餅咁，
我試過，好似佢地咁梅吓梅吓，佢就好快淋，
應該唔會啃到，不過我都會睇住佢食
隻味對佢嚟講好新，所以佢初頭食係皺哂眉頭，食吓食吓先好啲！

食唔哂，又係我食？ 唔怪之啲呀媽會越來越~肥!! 
不過其實bb都應該盡量小食呢啲零食~

小檬檬6個月喇!!

小檬6個月喇！

又係果句，時間過得真係快！！

回顧時間:

樣貌   

其他人可能覺得佢唔同左多啲，我日日見住，轉變嘅感覺冇咁強烈！
（忽然醒起我係唯一一個人由出世到而家都日日見住佢嘅人）

雖然佢都算多頭髮，但係集中喺頭頂，後面而家仲有一撻突然間冇左頭髮～
果日問過吓醫生，佢話應該係瞓教磨到左，應該會生返

社交技巧

開始認人，如果陌生人抱佢，佢會望實人，陌生人同佢講野，佢會眼定定，睇吓你講咩

而家鍾意人地同佢玩，有時玩玩吓行開會唔制，會喊，
或者會要你抱住, 嗲你，唔可以放低佢自己喺地墊！
好在都係一次半次，佢大部分時間都好乖冇扭計嘅!

一如之前，勁鍾意笑，有時小小野自己都得一餐，我唔小心將啲野跌左落地墊,又笑，
同佢玩bu jai又笑，係咁笑，
笑到ka ka聲! 笑到自己都累

識咋嬌, 佢坐喺sofa，我諗住扶住佢，點知細細力批左佢一踭，哈哈，
點知佢大喊，喊到好凄涼。。。。
攪到我好似做左罪人咁，比婆婆話，但其實我真係輕輕hide到佢架咋….
肌能活動

反身已經駕輕就熟，再升呢就係反完再瞓返再返，好似體操選手咁，
碌嚟碌去!有日仲用對手支撐自己成個身，即好似跳hip hop果啲, 嚇到我同爸爸好似見到異形咁!!!

坐呢就可以自己坐到一陣，不過重心向左前先得，唔係就會左搖右搖，未可以自己坐。

識爬少少，不過向前只係小小，反而好似鐘嘅針咁喺咁沿地轉就可以

挨住sofa都可以企到一陣，扶住佢最鍾意彈吓彈吓，我地hold 住佢就累到暈！

食奶

奶量多左180ml-210不等, 不過呢個月食奶曳左，唔可以有人行過，行過實要望，擰嚟擰去，
我又唔可以講野嘅，一講佢又會望，又停唔食!!

一吓唔順就大叫，就唔食。。。。唯有開風筒，（好似聽到咒語咁，即刻乖乖食）

又係扮自己揸住，另一隻手有時會喺到撩我背脊，痕死我

一飽就唔食，再比佢食就大叫～～～
試左食米餬，冇問題，肯食，會每日加比佢食

便便

好正常, 日日都有。而家poo poo都已經有啲臭，遲啲食埋肉唔知點算

重量

@ 5M28D

體重 6.4kgs ( 14.1 lbs)

身高67cm

好多朋友都話佢肥仔左

健康

前兩日發現佢JJ前面紅左，抹吓佢仲有好少少嘅血絲。。。。

八號分風球前都要同佢去睇醫生，
原來有小小發炎，醫生話可能片片業到，我地都已經好勤力換架喎，
醫生話可能尿液都有細菌，搽吓藥膏好快好，bb有事，媽媽又擔心。。。

小檬繼續加油,媽媽錫哂你！

小檬試食餬仔

又一個月喇，過兩日小檬就6個月喇！

係時候加入固體食物!

初時都驚自己唔識點整，但原來健康院啲書有教架！
或者上網download

簡單嚟講，先會比BB先

食米餬，之後蔬菜餬/水果餬，

亦會先試一匙，再加到兩匙，慢慢再加上方去，去睇吓佢腸胃消化係咪適應，有冇敏感等等。。。
所以每次應該先試一種食物，每日觀察佢嘅便便同情況

 

而家先準備一吓啲用具先：

又洗錢喇～

磨板	已買
刨	已買richell
過慮網
果汁器
膠食具	已買richell
圍巾	已買膠圍巾
攪拌機	已買

揀呢個牌子因為媽媽朋友啲推薦佢嘅飲水杯, 即呢個牌子啲野OK啦

同埋我鍾意佢又靚！

咁啱買左麥皮送左個膠盒，再買個細啲嘅裝啲用具，
啱啱好放哂入去，乾淨啲

richell 食物處理套裝
疊埋好慳位

第一次我地冇買米餬住，只係食雀巢嘅試用裝，味道比較甜，
所以都唔會比佢食呢隻，不過試食吓先！

好奇中。。。。咩嚟架，媽咪???

開左一大碗第一次只係食一兩啖，其實可以開少啲，
不過我想跟佢嘅建議份量開，睇吓正確嘅稀杰情度

第一次試食

小朦都好肯食，食完第一啖仲推我隻手埋去
停一陣都心急叫！
要睇BB ready 好未，可以放隻匙羹到佢咀邊，如果佢會擘開口仔，就證明佢ready 架喇！
其他:
學習杯，未係好識啜！！
食物盒，一個大盒放哂咁多個盒，大，中，細，細細，慳位


healthy times手指餅/beans stalk米餅:
5 flagEE送嘅餅同推介嘅richell餅乾盒
richell煮粥器 : 方便懶人，同埋大人米一齊煮, 佢煮粥落多啲水,
 (唔知work 唔work)

仲有呢個朋友送又未出過場嘅Dior 奶樽！！ 好靚呀....
不過唔知小檬肯唔肯用嚟飲水。。。

待續。。。

小檬剪髮~媽媽操刀

小檬啲頭髮真係長得好快，今次冇麻煩呀妹姐姐喇，
由媽咪操刀！

嫲嫲送左呢個"洗頭帽"比佢，不如用嚟墊住啲頭髮啦，
點知佢帶左擰右擰，又munk又食,又阻住我。。。。
好煩

最後不如用毛巾，但蠢左，
毛巾頭髮碎好難洗。。。應該用膠墊！！

bumbo chair 真係好好，等佢可以坐定定！
完成圖~


呢套較剪喺Jusco買


剪完頭髮開心哂！
我第一次操刀，所以唔敢剪得太短，驚太肉酸佢有童年陰影！哈


佢腳骨力都幾好架喎！
企左喺到有成十幾秒，我地就比佢休息吓喇！

同場加映，食餅乾！！

放心，餅乾係假嘅！
牙膠嚟架！

傻豬

去完街街,除咗衭仔, 放佢喺地墊, 諗住抖一吓就沖涼, 點知同佢玩吓,佢又笑到傻咗!!

媽媽力量

喺FB見到朋友分享呢張"小馬克媽媽"漫畫，
真係好感人，好感同身受！！

(圖片來源：我愛小馬克 BY 馬克媽媽, 如介意轉載請通知)

在職媽媽真係好偉大！
小馬克媽媽完全將我地嘅生活講到出嚟!!感激感激!!

之前仲餵緊人奶嘅我，返工時真係唔三魂唔見左七魄！
個心好似淨係掛住泵奶咁，而家好啲
但每晚返到婆婆屋企食埋飯再返自己屋企
攪掂小檬沖涼食奶瞓教自己終於可以坐低都已10點幾11點....
冇工人嘅我地，仲未計啲家務...自己野!
(好在老公都好落力幫手!)
當中嘅辛苦真係要試過至知，尤其係餵人奶,
又勾起回憶.....

不過真係嘅，見到小檬開心健康成長，
真係咩辛苦都會忘記！

大家努力, 發揮媽媽嘅力量呀!!

檬檬禮物

上個星期檬檬好多新禮物！

星期六同左嫲嫲婆婆去飲茶，之後行左一陣街，

戰利品如下；

嫲嫲買 麵包超人度高尺 本來99話買廁所板，不過老公話未使咁快，
終於佢叫左99買呢個身高尺，乜…身高尺就可以快啲用咩？

婆婆買沖涼玩具，小章魚 ,野餐墊 
 

媽媽買 日本水靴 原價$190 特價$57!!!
不過我諗有排都未著得，不過見咁底，買左先~嘻嘻

仲有媽媽之前送比佢嘅5月個禮物麵包超人不倒翁。好好玩，佢搖搖吓又有啷啷聲,
小檬好鍾意, 一拎出嚟就笑

麵包超人假紙巾，bb最鍾意就係蚊紙巾呀， sasa聲呀，呢盒假紙巾就啱哂，

最後仲有隻有沙沙聲嘅麵包超人比佢玩，檬檬超like

有個小朋友之後，真係多左好多野，
喺淘寶買左幾個裝野嘅日箱。喺街都好似未見過呢啲波點款

日單

 

淘寶其實都幾方便。。。

檬檬生活鎖碎事

買左張bumbo chair 返去，so far都算肯坐，但有時我地食食吓飯，
佢就唔肯自己坐，要我地抱。。。。
而加可能大個左，要黐住我地，
眼安安望住我地放啲野入口

放埋麵包超人車車比佢，佢就自己乖乖玩！


而家咩都放入口，比到佢手嘅，都放入口！

我隻手抱住佢經過佢個口都要伸條俐出嚟舔一舔...

連腳都唔放過......

1.檬檬兩個轉，後面d頭髮梳極都係飛起，真係激死
2.遞親隻手去佢到，佢實捉住然後同佢傾吓計，之後都係放入口---食!
3.朝早起身傻瓜樣
4.出左街，超眼瞓，得返一條線都唔肯瞓
5.高左好多吓嘅小檬


沖涼換衫前，未除好件衫，見到檬檬B冇咩頭髮係咁嘅樣。。嘻嘻
多啲頭髮即刻好似好大個仔

草地半日遊

星期日約埋班舊同學去左老公母校草地玩

雖然好熱，而小檬又未識玩，連坐都未係好穩，
不過叫做同佢接觸一吓室外活動，同其他小BB及小朋友玩

小檬未係坐提好穩，呢張相我擺左佢坐好之後一放手就要影，
重心要放前啲先坐到一陣

又要顧住佢，又要引佢笑，又熱，嘩，真係累到爆

On your mark…set…go ~小檬都唔知發生咩事

帶返頂帽仔先

（多謝uncle RB 公司嘅帽仔, 又可以唔使買！）

終於見到笑咪咪嘅小檬喇!



全家福（肥媽媽。。。嗚嗚）

排排坐

左起: 10個月BB，1歲多啲BB，5個月小檬

雖然唔係好曬，但小檬都成日咪住對眼
其實左邊BB仲有個哥哥，不過大個啲，佢自己週圍走，都冇同啲BB玩，
第日呢幾個B大左，嚟到都已經四圍走，仲點會坐定定比我地任舞！

(每個BB同小朋友都有趣事，10個月BB眼瞓反而會好hyper，

佢哥哥仔陪爸爸整家用夾萬仔，爸爸之後去左洗手，哥哥仔幫佢將啲鎖匙放哂

入去之後刪埋，之後開唔返

1

歲多啲BB而家學緊講野，指住咩問佢都話係叫"吧吧")

休息中



媽媽們


玩完一個下午，夜晚已經超累
真係唔認老唔得!

同BB外出玩，真係帶好多野，
奶粉/熱水壺/紗巾/奶樽/外套仔/被仔/玩具/換片袋/濕毛巾/紙巾/風扇仔/防曬/防蚊貼/帽仔...
其實媽媽帶漏左要替換嘅衫，水水（因我成日形住小檬唔鍾意飲水)
咁熱，係要比啲水份佢，不過好在佢都有食奶!

好靚嘅鬆弛熊防蚊貼


最後
好另類嘅大合照