小檬與B be

自從有咗B be 之後， 就已經同小檬講我有咗BB，

雖然我諗佢未係好明，不過我都唔理，

等佢要知道有個BB喺媽咪肚肚到。

出世之前都要做啲準備功夫，我會叫佢叫B be啦，

叫佢錫錫B be，同B be講佢係哥哥，

等佢知道出世後都要錫B be。

暫時佢地相處都算和睦。。哈哈！ 

當B be出世時小檬就應該兩歲多，

呢個都係容易啲接受BB嘅歲數，

有朋友嘅大仔三歲幾就唔係好接受到喇，

成日話憎細佬，可能覺得佢威脅到佢！

 B be ，你好嘛？

你要o錫B be呀，知嘛？

知~呀！

祝大家中秋節快樂！

Thanks NT for the photos !!

Before & After

多謝NT哥哥去完澳洲工幹之後返黎幫B be再影輯相。

B be 2M @ NT photography 

首先嚟一張

Before ＆ After

B be食緊手仔, 好可愛! 

換季特登冇收埋條裙

(其實係吊帶又點解要收埋？我都唔知道自己講咩)

爸爸件長袖衫就真係唔記得keep起，收埋咗。

算啦，求其搵件黑色Tee啦，

反正佢成衣櫃都係黑色咁滯（扮Ekin。。哈）

NT photography

坐完月~

坐完月喇。。真係唔知由邊到講起！
萬千樣野想講，但每日都冇時間寫, 隨意講吓啦...

 (如果寫blog好似whatsapp或者wechat可以講就好喇

呢篇全靠兩個都瞓咗先可以咁順利！)

B be 好大食，差不多兩三個鐘,

呢頭餵完，掃完，果頭又話食，我好似每日都坐喺果個位置冇郁過。

婆婆已經好多野做，所以今次由我幫B be沖涼，
之前小檬我一次都未試過，但試過又好似唔係好難，
B be 沖涼都算冷靜，所以我都冇咁lei hea。

有時B be啲poo poo 真係好似肉醬，太勁，
所以我會走去用花灑沖，方便快趣！
小檬以前換親片都喊，B be又係好冷靜，唔喊嘅！乖

有時婆婆同姐姐煮緊飯，我又餵緊妹妹，
小檬如果扭吓計要東要西，你都唔知點攪。
已經多野做，我去吓廁所／食吓飯小檬會話唔好啦，
都要黐住我,瞓教又係我，瞓晏教，同夜晚都要我同佢瞓， 

當抱住B be 小檬扭住我嘅時候，

真係想仆暈是但一個！

有一晚攪掂哂一點先記得未沖涼
（好在已經坐完月，唔使用薑水）
到第二日先記得要沖，有日朝早起身掛住去餵奶，連牙都未刷添
小檬又未識自己走去poo，淨係poo完同你講，又要洗poo
喺屋企已經有婆婆姐姐，有時爸爸幫手都忙到甩碌
我嘅樣就好似家有喜事嘅吳君如，差在冇啲鬚根咋，
完全明白點解會變黃面婆
我真係好佩服果啲FTM, 如果湊兩個冇工人姐姐嘅FTM 仲勁

我有睇余人生嘅產後調理，所以婆婆仲要煲中藥比我,早晚一碗
（仲有煲薑水沖涼，米水代茶，有時又要煲吓湯，燉吓野, 諗埋藏煮咩餸，
煮埋飯比我地, 姐姐仲要係月中先嚟. 其實婆婆最忙）


B be之前淨係肚餓先喊，不過而家都好似成日扭抱。。。

好細膽,小檬哥哥又點會就住玩啲玩具吖, 

少少聲都會嘈醒佢，又喊過，所以有時推佢去走廊瞓

小檬見佢喊又走去拍拍佢

B be 喊緊


叫妹妹睇mickey唔好喊喎
(我已經唔知幾時佢喺邊到自己取得Ipad)

周身唔得閒，真係冇時間同小檬玩，

呢日佢自己好乖咁玩

所以我一得閒就會同佢玩，唔想忽略佢

呢日就出走同佢去咗葵芳

食薯條 

走走走 

一齊sir梯梯 

星期日FB比同陽光玩遊戲嘅一家大細相洗板，

於是瞓醒晏教趁仲有少少陽光（其實係夕陽）

即刻落樓下同小檬玩一陣

四人自拍難度又高咗

媽媽嘅吳君如look 

嚇親 B be...haha

日落，又要返去忙碌過! 

坐月近況

話說B be 出院之前果日有啲黃，

不過照咗一日燈之後都算可以合格出院, 返咗屋企先

講吓各人情況:

媽媽

返到屋企，我谷奶痛到暈，除咗比B be食之外，就係泵佢出嚟，好痛！

真係痛到喊！已經唔記得有咩辦法，即刻上網揾，問下朋友(多謝妹豬媽嘅意見!!)

冷熱毛巾都試過，但都唔可以即刻解決，我凈係坐喺同一個位置，冇郁過！

痛咗一日一夜到第二日先好d！

我真係覺得辛苦過生仔

康復都算快，好在冇好似生小檬果時嘅

腰骨痛，手痛, 水腫(果時腫都豬腳咁)

（咪講）

食得瞓得, 夜晚要起身餵B be，老公都有幫手，所以都算瞓得唔錯

婆婆都係煲薑水比我沖涼洗頭

忍唔住，同咗小檬落樓下玩

仲同佢整吓pancake

小檬

雖然我谷奶痛到暈，但我都記得要代妹妹送份禮物比小檬，

話比佢知妹妹好錫佢！

喺醫院探妹妹時已經黐到我實，媽媽媽媽～

可能我入咗院幾日，佢嘅生活模式有少少唔同，

所以佢頭果個星期係好黐身好扭, 返到屋企，

好在只係頭果幾日先扭啲，呢幾日又好咗好多。 

所以除咗餵奶之外，我都盡量陪住小檬

雖然佢黐身，但係佢應該唔係呷醋，因為佢好錫妹妹，

成日走過嚟叫妹妹，話要錫錫妹妹，拖佢手手，摸佢頭仔，

又要抱妹妹，總之我抱住妹妹餵奶嘅時候佢就會埋嚟一齊。



呢幾張相喺攝於早午晚，佢都係自己走黎錫錫妹妹。

有時佢nap嘅時候，婆婆同佢瞓又話唔好, 

我又要左手抱住呀妹食奶，右手幫佢R吓掃吓瞓，

真係兩隻手都唔得閒

餵奶嘅姿勢仲點可以要求係正確！！

我抱住妹妹，佢又要抱埋一份，

雖然好里hea，但呢種感覺又好溫馨

左手餵奶中

佢都好幫手，會拎個墊/片片比我

其實佢唔扭計我已經當佢幫左忙架喇!!

B be

第二日再去醫生度check黃，抱住佢時佢係咁震，

雖然話初生B通常好多都會咁，但係醫生話佢震得好密，

建議我地去照燈果時可以順便check埋佢啲血嘅含氧量。。（好似）

因為佢擔心B be 係抽筋，如果係就要做埋腦掃描！

 出返嚟之後，諗咗好多野。。。好擔心，擔心到喊咗出嚟！ 

同咗B be去醫院之後就返屋企，盡量唔諗B be，淨係照顧小檬一個。

晏晝接到醫院電話，未聽個心都跳咗一跳，好在感恩B be冇事，

check過一切正常， 真係放下心頭石！！

第二日就返去接B be, 黃就退到少少，要返健康院再跟進住。
B be好大食，兩三個鐘就食一次，食得痾得先可以快啲退黃，
不過我啲奶好似唔夠佢食，都要補奶粉，

有時又要照顧小檬，所以餵完佢食再想泵已經冇時間，

或者超累，所以都冇好好咁泵清。

我都估計都今次比之前更加難堅持，而家只係希望堅持到一個月
如果得先再考慮extend

婆婆已經好忙，所以今次由我幫佢沖涼，
之前我都冇同過小檬沖架，不過冇想像中咁難！

剛沖完涼

B be好似佢爸爸咁，有兩個酒粒架，不過要啜先睇到


B be都算好乖，淨係肚餓先喊，連換片，或者沖涼/ 喺健康院除佢衫
都唔係好喊，可能係一兩聲之後就唔喊, 
暫時都唔會冇端端喊（我記得小檬果時有半夜三更喊）
所以，比佢飽飽就好好湊!!

下星期一再返健康院check 黃，

希望數字可以快啲去返正常

送上我們的第一張全家幅!

Maternity Photo @ NT photography (part 2)

係B be出世之前嘅3日，NT哥哥同我影咗大肚相part 2

如果延遲多一個星期，都已經唔使影喇

好在佢果時都已經執咗兩張比我，

所以我喺床到未痛時都post 咗兩張喺FB到，

唔係又變生咗都未post喇

期待...

始於逃離唔到麒麟臂嘅命運!!

小檬見我瞓完喺到影之後又扮我。。。哈哈

後面嘅結婚相喺一個呼應

見到呢到，

應該估到其實只係喺我屋企影

攪攪陣嘅小檬

最後盡地一鋪~可一不可再嘅一張！！

我覺得影得好靚，我咁嘅身型都影到我咁

 好似著得好少，放心有著褲架

希望唔好嚇親大家!

搵到個可以信任嘅攝影師真係好幸運

玩驚喜的B be @ 37W 出世喇!!!

續。。。

舅父車到我哋返屋企，已經10點幾，

瞓落床11點幾，點知1點幾又要起身去廁所！

好在好快瞓返，點知2：15突然感覺到her一聲~穿水！

(我都有預感佢會早啲出嚟架喇，

因為果幾日B be個頭仲好似鑽緊出嚟咁，

我真係感覺到佢郁吓郁吓咁，

隻大脾條筋位扯住好痛，連行都痛，

不過就真係冇諗過早到咁！)

第一胎都係咁穿水, 好冷靜咁標去廁所,其實都有少少拗

跟住同自己講"冷靜"（真係講出嚟架！）

之後叫婆婆起身，話穿咗水，叫佢打比舅父嚟車我。

又係第一次咁，係咩巾都冇準備，

求其攝條毛巾就出去打電話比老公，

檬媽：喂，老公

檬爸：係

檬媽：穿水...你返嚟喇！

檬爸：哦，好！

再通知醫生我生得，好在之前都有執咗個走佬袋，雖然未係全部執好哂，

我媽係緊張大C，話要同我落樓，我話梗係唔得啦。。

落個樓我都仲得！
我叫婆婆咩都唔使做，淨係睇住小檬就得，

等舅父其間不停咁諗仲有咩要安排....

不過個腦都係一片空白!

舅父飛車唔使15分鐘已經到我屋企樓下車我去醫院，

佢明明話識路，但我send咗個msg比老公之後就發覺佢行遠咗啲啲嘅第二條路....

不過都好在係遠少少，到咗大圍之後，佢問我點行。。。。。(汗)

今次真係大佬喇。。我唔係揸車果喎!

好在坐得老公車多，我認路都OK，

可能舅父驚我大肚，揸到超慢，慢到我真係驚要喺佢架車生！

 我就同佢講而家我穿咗水要生仔，理論上係應該揸快啲嘅！！

 終於到醫院, 辦手續,  check係兩度

有冇驗血報告？冇喎，吳醫生話幫我同醫院追

有冇驗B鍊嘅報告？ 14／2先做，未知有結果。。要問吳醫生喎

你睇我地幾咁準備好!!

3:15  

入待產室, 咁啱又係上一次嘅床位，有啲親切感

好快駁好機，等。。。

舅父就坐我則邊，問吓我東問吓我西!

我瞓喺床，心諗都冇咩痛, 咦...唔係喎

講唔夠兩吓，已經有啲痛，不過都係少少，

未需要咩止痛

講咗唔夠兩吓，又開始痛，問定d笑氣喺邊，

其實我都唔想用, 因為唔想好wing，

但係開始有啲大痛, 有用,不過唔係聞咗好多吓

5:00

再有啲大痛, 又問定護士係咪再痛就可以用打止痛針？！

話要check吓開咗幾度先，一check已經5度

佢話5度已經唔可以打喇。。
吓？咁快嘅咩？

5:15
再check 已經開到8度!!

我又唔係話痛到癲咗咁, 不過真係痛，一吓之後到一吓

都要叫"好痛呀。。好痛呀。。"

5:21

入產房喇!!

20分鐘時間內

我由想打止痛針變咗入產房話要生，

有少少唔敢相信咁快

舅父一路we chat住老公，所以先記得哂啲時間。

好明顯，我老公未趕得切落嚟啦。。。

不過我都唔理得咁多

入咗產房之後我就問醫生喺邊？ 

護士話返緊嚟，

吓？？我好似想生囉喎。。。

痛痛痛,痛嘅程度，都真係幾痛，

好在都有啲笑氣頂住

我又問醫生返未呀? 護士話好快架喇。

我話我要生喇。。（其實未..嘻嘻）

佢叫我放鬆, 乜得嘅咩?

我諗等咗5分鐘，吳醫生就返到，好快又有一吓嘅痛，

大家又叫我push。。如是者push咗3~4次

都未得，佢地叫我努力啲push，我話我已經好努力架喇!

我話好痛呀。。。吳醫生呢個時候仲要話生仔係痛架喇。。

真係比佢激C我！ 

如是者我諗都有6-7下，醫生話就得架喇,

不如又幫吓我喎，咁就梗係好啦，又唔快啲講，

原來都係用吸盤! 唔知點解，最後果幾吓真係好痛, 好辛苦！！

又係果啦~push長啲，唔好叫，忍住到氣一次過push 出嚟，

終於我順利將B be 帶到呢個世界喇！

B be @ 19/02/2014 (37W)
 6.1lbs  

喺出面等嘅舅父好快手影咗張B be 單眼相

其實爸爸返大陸出差, 已經計劃是我生B前最後一次，
結果B be整蠱爸爸,要爸爸從睡夢中趕回來！
六合彩又唔見咁啱,雖然最後只有我在產房與B be大戰，
爸爸仍未趕到,但冇辦法啦，
母女平安已經感恩! 

(NT哥哥要出trip三星期,所以出發之前嚟同我影咗幾張靚相。

你快啲返嚟同我再影呀˜)

5 days B be @ NT photography

Hi ~ 各位EE, 我係B be 呀~ 多多指教!!

B be @ 35W

啱啱過咗B be 35W (就嚟36W)

上一星期嘅checking已經話BB有5磅，

如果到時足月太大隻就可能要開刀。。。好驚！ 

不過老公話之前小檬果時都係咁講，

不過到出世又野生變咗中碼，

而家仲係細粒B添～

啲人話係因為第二胎會容易啲大隻喎。

小檬果時手腳到中期已經開始腫，但B be呢，

到尋晚先發現突然間腫（可能前一晚食咗韓國BBQ）

到尋晚long對腳加老公按摩加今日勁飲水就好似好啲，

不過啲戒指好似又唔啱啦。

好多親戚話生女又會早啲，第二胎又會早啲，

攪到我成日要諗定點安排，有啲緊張。

萬一老公真係出咗差，呀哥又返咗工，

搵定哂啲朋友做backup

呢個星期真係行都辛苦咗，
差不多每晚四點幾去完廁所就瞓唔返，

碌嚟碌去，轉身都辛苦！

兩邊腰位同尾龍骨又淵！ 

上一次檢查嘅相片，睇到之後我問

"點解老公喺我肚入面嘅？ "

仲好似有鬍鬚添~ 

好多人都話小檬似我，睇返d朋友，

都係仔仔似媽媽，女女似爸爸。

唔同B be 真係會似爸爸？？？
噢。。。

B be 鞋

又買喇~ 

一見到呢對鞋仔真係忍唔到手，

好在都有discount，心靈上都得到少少安慰（可惜銀包冇）

又係有少少毛毛，適合冬天著，
又要諗吓到時冬天幾大先啱著，

喺舖頭已經諗咗好耐先諗掂！
應該都係兩歲到就啱著

希望都預啱時間size啦！

如果有媽媽版本，我都想買對呀～ 

第二次懷孕小小心聲

由唔知再生唔生，到交比上天有咗，

到有咗B be到而家就32W，真係暫吓眼！

心情方面

小檬時

好緊張好興奮，尤其知道後第一晚好似瞓唔著

所有事都掛個肚。

B  be 時

由一開始唔敢相信，到cfm 知道嘅時候，

我試過好唔開心喊，果一刻心情好矛盾，

雖然知道有咗BB係開心事，但另一面驚會同小檬會冇咁close，

因為冇得抱住佢（天真。。）

果一刻好似接受唔到，真係好矛盾！

過咗一兩日平靜落嚟，就冇野。

初期我都有抱小檬架，不過小檬爸就唔比啦

我都有趁佢唔知抱一兩吓，中秋節仲喺停車場抱住瞓咗嘅小檬去酒樓添！

不過，之後就好少抱喇。

唔抱，就坐喺sofa叫佢上嚟攬吓我，

佢都一樣好黐我，呢排仲比之前更加黐我

（有時連爸爸拍吓瞓教都唔比，唱歌又要我唱，R痕又係我。。。）

我都會成日同佢講妹妹，有時買咗啲衫仔都會話係買比妹妹。

我都好希望自己同兩個都係一視同仁，唔會偏心，

雖然好難，但係希望真係得啦！

家務安排

小檬時

爸爸幫手做家務，再加上初期有流啡，我好似冇咩郁過！

B  be 時

都係差不多全部老公做（其實之前已經好多係老公做，佢真係好錫我）

喺屋企換片同小檬沖涼洗pat都係佢攪掂。

不過我係能力範圍做到之下嘅簡單野，都會幫手做。

唔好諗住我咪好得閒？因為小檬會要我喺則邊陪住佢先得，

不停咁叫媽媽媽媽媽媽媽媽媽媽媽媽媽媽………

屋企啲玩具就因為我冇幫手執返好，好多七零八落，

希望我生完可以搵返哂啲唔見咗嘅puzzle或者積木啦

(唔好問我點解老公唔搵，因為我老公啲野放喺面前佢都會話冇嘅，好神奇！）

飲食

小檬時

孕婦唔可以食嘅我都會盡量唔食, 好少飲凍飲! 

老公燉過一次湯，媽媽都有，媽媽湯水多啲, 

有飲媽媽奶,好勤力，醫生話有益，話飲吓冇防（但講漏咗會肥）

後期有飲杏仁茶或者杏仁餬，

有同事話護士長同佢講BB會白啲，

不過又唔可以過量

B  be 時

今次都有買一罐媽媽奶，不過係肚餓先飲。

湯水好明顯少過之前，因為婆婆要照顧小檬.

介口都一樣，話孕婦唔可以食嘅我都會盡量唔食，

不過薯片呀。。煎炸野都有食少少，汽水好少飲，只係偷飲過老公嘅一兩啖，

凍飲都有飲吓，不過唔多。

總結嚟講，我都應該算乖嘅（自己話）

事前準備

小檬時

如臨大敵，所有物品都要買，所以好緊張檢查清單

B  be 時

咩都唔想買，盡量用返哥哥嘅! 

真係要補給嘅先買。

最主要係女仔啲衫仔

倒數階段

有時諗諗吓反而好驚，之前未試過生，心口有個勇字就去。

雖然小檬嘅經歷都唔太差，不過唔知點解而家有啲驚。

上次朝早屋企穿水，老公喺身邊，應該冇咁驚。

雖然都差不多預產期都會叫婆婆喺我身邊

有諗過如果今次咁啱得自己一個睇住小檬又作動咁點？

或者如果老公返咗大陸做野，得我同婆婆都好麻煩，

叫醒小檬一齊去？定係自己去呢？如果係打比舅父都希望佢知醒可以陪我去啦！

當然，最好嘅就係老公喺身邊啦！

B  be 你要乖乖呀～

今次婆婆要照顧埋小檬，應該冇之前淨係要照顧我咁多，

唉。。我唔會再期望有其他人幫手，講就無敵，

話買啲魚煲湯我飲啲魚都應該仲喺大海到，

未撈上嚟。等飲呢啲湯我諗B be識行都未有得飲。

快啲炒定啲米整茶喇！

前一個星期有一晚瞓瞓吓個肚好似有啲痛咁，

果一刻好驚係咪咁早出嚟？ 

心諗冇咁快呱，不過吳醫生話其實BB幾時都有機會出嚟果喎, 

冇話一定要足月先得

我都明，所以我都盡量安排好哂之後嘅野，

B be 出院衫，走佬袋。

要快手啲喇!!