找緊暑假的尾巴！

九月中小檬學游水恆常班又開始！

由於室內泳池維修，於是喺出面室外嬉水池。

隔咗個星期冇返，第一堂做熱身時又有啲拗。。。

有小小想喊咁，跟住見佢突然間揸緊拳頭oshhhhh 一聲

叫自己唔使驚，同自己加油。。

果刻我好感動~ 

唔知邊個教佢定係自己學

anyway我好感動佢會鼓起勇氣，唔會畏懼！

今次出呢個室外戲水池，一落水，佢都係驚。。。唔想落水。

慈母上身即刻話陪佢落水，比教練話我啦。。當然！我即刻迴避！

講數中

過咗一陣轉過頭，教練已經同佢落咗水！

之前嘅魔鬼教練冇教呢個泳會，今次呢個係和藹可親型，

不過都可以，見三位小朋友都好肯跟佢學！

係岸邊嘅我同蛇仔媽！

再轉過頭已經見呢位小朋友自己拎住浮板踢晒水游過岸

完成第一堂, 識笑添

麵包超人上身

  

中國二十四節氣真係好準，過完中秋/秋分之後，

早晚天氣真係開始涼！

經過第一堂知道情況之後，

趁仲未係好涼，找緊暑假的尾巴！ (wahaha...仲暑假)

第二堂帶埋妹妹豬去玩吓水！

新泳衣剪綵！！（秋天先嚟剪）

同對車里子鞋好襯呀～～

遮吓我先

今次顧住妹妹豬，都冇咩睇過小檬，

佢見我哋喺水到都好開心但又好專心

多謝蛇仔媽喺到偷影我哋！！

妹妹豬開始時都唔敢玩滑梯

不過爛玩嘅佢，好快就玩到唔肯走！

之前唔敢sir長滑樓嘅我，居然sir咗一次，

爸爸抱住妹妹豬都sir咗一次！

對面的男孩看過來 

=D 

有咗上一堂經驗，小檬今次喺戶外池好似冇咁緊張！

都可以自己踢腳仔游到對面岸，繼續加油呀！

小檬暑假游泳班~Lesson 3

見妹妹豬差不多上完kindermusik，

於是小檬揀學游水時間都唔理妹妹幾點喇。

第一堂我要陪小檬，於是叫契媽媽陪妹妹上堂，冇問題,可以陪小檬

第二堂游水，諗住上完先飛去，適逢妹妹失控，我又比逼放失約！

妹妹最後一堂，又諗住可以上即刻飛去泳池，

點知。。婆婆星期五晚食飯時哽骨

婆婆初時以為可以用飯吞咗佢點知唔得。。

最後要到醫院，做個小手術，好在第二日冇事出得院，

所以我同妹妹上完堂

又要接婆婆出院！

真係比婆婆嚇C！好在而家冇事～

又據探子回報，小檬都係臨入泳池果時喊。。。
喊兩下就入=__=

今次已經肯將個頭浸落水,吹泡泡。

真係好勇敢呀～～

不過要買過件泳衣呀。。教練話呢件應該太薄

而家肯落水就買咩都冇問題

都好多謝美國隊長氹到小檬肯著住佢落水！

隱約聽到教練話唔怕唔怕小檬就浸頭落去！

勇敢的小檬繼續努力！

小檬暑假游泳班~Lesson 2

原本安排陪妹妹上完音樂班之後，
我就飛去泳池會合小檬上第二堂游泳班，

點知妹妹突然喺堂上失控，

係懂事以嚟第一次咁嚴重，落堂後我怕婆婆同姐姐攪佢唔掂，

所以唯有留低，叫爸爸自頂上！

其實我對小檬有信心，冇我應該都冇問題。

據探子回報，

小檬去到泳池見唔到戰友蛇仔明，就話要等埋佢。
等到蛇仔明出場之後，

就話要等埋媽咪。。。
(臨出門時我同佢講陪完妹妹就過嚟, 其實果刻我都好想扔低你個妹！）

爸爸話到佢臨入去時, 都有喊話唔入去，
不過好在到最後小檬都肯入

到自己冇喊仲話比教練知有小朋友喊添～

可能第二次學，學緊時冇喊
踢腳中

 

安全範圍仲已經唔一定要掂到藍色位置！

同呀魔鬼教練跟住游都冇問題

可以自己一個扶住踢水

教練忙緊自己都唔會偷懶

不停踢

只係輕輕掂住池邊都OK～

仲影到一張相佢笑添！！

返到嚟爸爸話俾90分
佢如果下次臨入去都唔喊就可以有100分，

有份小禮物添！

加油小檬～
媽媽打從心底覺得你好勇敢
好叻仔！

小檬暑假游泳班

喺完全慢動作嘅暑假活動尋找過程中，
機緣巧合下知道蛇仔明已經報咗個游泳班，
本來都仲喺到15/16諗住報另一間
又未扑槌嘅檬爸一得知
就話有個伴都好喎，不如一齊學!!!

（檬爸除咗係教育部之外，都兼顧康樂部嘅）

而檬爸今次真係洞悉到成件事嘅關鍵～就係小檬怕水!!
有個伴一齊學都好緊要!!!

小檬好BB時玩過幾堂，唔好以為BB就唔識驚，
小檬果時已經喊到拆天！
游水堂

到大左玩水都怕落水，只肯喺池邊玩。
爸爸見到佢咁怕水，男仔之家唔可以咁，於是就的起心干action
報之前有問下小檬報游泳班好冇 (我哋好尊重小朋友意見架嘛）

解釋比小檬知，學咗就會識游水，到時候就唔使驚。
佢淡淡言一句好。。費是佢反口，我哋就即刻報

初學游泳訓練班
$1200/8 (一小時 1對2-3, 3-10歲)
(鳴謝蛇仔媽嘅報料，可以等小檬一齊學)

為咗鼓勵佢，買咗件佢鍾意嘅美國隊長泳衣比佢


仲有涼鞋仔，泳鏡

minion 檬

準時去到泳池已經見到蛇仔媽同蛇仔明

登記好之後就入去

乖乖等教練

我叫佢同教練講，教好泳鏡帶


拖手仔準備入

父母就跟住去看台睇小朋友

眼見小小年紀自己行，
教練又好似冇咩點人數（可能其實有係我唔知）
小檬返學之後都冇咩要令我掛心過，
但呢日重新激起我嘅媽媽病又發作
自己行會唔走失架？
會唔會太跣唔小心撞到
會唔會有其他小朋友跑佢又跑跣親??
會唔會唔小心跌落泳池架？
短短嘅路程，媽咪無限想像
（其實只係媽媽病發作，過份擔心）

行快兩步到看台睇住佢先，
見到原本拖住蛇仔明嘅小檬拖住另一教練行入泳池

小朋友先跟教練熱身，小檬都跟得好足，好快就落水，
先將浮板綁喺身上，小檬安排同差不多年齡嘅小朋友一齊，
教練係個姐姐，一對三

趴咗大半個身喺岸上面嘅小檬，
用佢僅餘喺水部分嘅腳踢水，雙手C都掹住藍色安全範圍!!!

可能教練姐姐都睇唔過眼，於是捉佢落水，叫佢落啲落啲。。。

危機警號亮起嘅小檬開始覺得唔對路，同姐姐講要we we，
眼見小檬開始想喊，上返岸搵我哋
唔知咩嘅氣力，我就喺欄杆一邊抱佢返過自己呢邊，
一抱住佢本來忍住嘅小檬見到媽咪梗係即刻爆喊
就好似喺出面受咗啲咩委屈咁
（所以好多人話學游水父母唔可以在場）
。
。
。

心裡好明白佢果種害怕（又會諗其實會唔會有陰影）

心都酸埋，
好在都冇被佢觸動到喊埋一份，
唔係又失禮街坊

拿拿林叫爸爸同佢we we，我迴避一下
根據爸爸講去完廁所都唔肯著返件泳衣出去，
最後唔知爸爸點樣叻豬
終於的佢返出去

之前果組姐姐教練太善良 
比蛇仔明果組嘅魔鬼教練見到小檬攬住爸爸喊緊，
(一陣就知道點解叫魔鬼教練）
問左幾句就一手強搶小檬走，
好容易理解下一步就係
小檬超級爆喊!! 

我哋就好似小檬被徵召上戰場做士兵，
要同媽媽分開咁，雖然十萬個不捨，但又不得不為。

而小檬就好似啲被強搶民女咁，喊到擋豬
好在唔係喺我手上強搶，如果唔係可能我唔會放手添！！（慈母）

小檬被搶之後，我同爸爸就迴避，唔比小檬再見到，
其他家長紛紛安慰我哋
話自己啲仔女第一堂都係咁，好快冇事，
唔好俾佢地望到會好啲。

我哩喺蛇仔媽後面裝佢
喺魔鬼教練手上繼續爆喊
不過都冇偷走爬返上岸
(感謝蛇仔媽在旁，我行開時候幫我睇住下小檬！！)

教練話完唔好喊就叫佢踢腳，踢吓踢吓又回復平靜，
教練仲話佢腳踢好直（可能係氹佢）


小檬係一個好授教嘅小朋友，好肯聽人教，
聽住指令
佢就好快平靜過黎。

委屈樣中

跟住扮吓蟹仔用手打橫行，小小手仔支撐身體行吓行吓。。。

突然間又聽到佢喊，
話"有啲水入左去呀。。入左個口到呀 !!!"
魔鬼教練話冇事架!!!!咁而家有冇事吖？？？!!
繼續啦。。小檬又乖乖踢

教練抱住佢喺水中又有浮手袖，都冇咩問題


又突然間話"啲水入咗鼻呀，入咗鼻呀 "
教練又話"唔會有事架!!!!! 。。。繼續！"

小檬又收聲繼續！

跟住都冇再收到投訴，教埋吹水。。水中吹bubble
玩吓玩具就完第一堂！

終於完成～～～～

上到水仲有笑容添~


梗係即刻讚佢好叻仔啦
見佢都有少少凍到震，
快啲抹乾佢，叫喊爸爸同佢沖涼。

檬爸非常咁稱讚呢個魔鬼教練，鍾意佢夠惡

蛇仔媽都話教游水一定要夠惡，如果唔夠惡，
啲小朋友唔怕就唔得，我朋友話大啲操水果啲教練都好惡。

見到小檬一開始喊到咁凄涼, 媽咪都唔係好忍心

一個唔識游水嘅小朋友喺個唔到地嘅泳池
驚而喊係好理解嘅（又發作）
我係好明白嘅，
因為我都係腳唔踩到地就驚唔識游，
比我對住呢個教練我都應該頂唔住，
何況平時乖巧冇咩俾人鬧嘅小檬？
（夠喇媽咪!! ）

另一邊廂我又好怕佢有陰影唔肯學，仲怕水。

不過見佢落堂都肯笑返都應該冇事嘅，所有都係媽媽自己諗出嚟！

成功需苦幹

雖然一開始唔太順利，不過最後都總算肯繼續吖，
小檬已經好叻叻（自我安慰mode）

繼續加油!!!

不過小檬下堂可唔可以唔好喊 ?! 
喊到媽咪個心實一實，鼻子酸一酸呢！

尋找暑期班

復活節之後已經開始聽到啲暑期班，暑期活動嘅字眼。。。

有啲家長唔想小朋友係屋企冇所事事，齋玩，想有啲細藝，

於是報名參加，學啲咩唔重要～至在攝時間

（有聽過因為唔想對住某屋企人或者工人姐姐咁多，於是要填滿佢！）

有啲家長想小朋友充分利用時間，學吓野充實小朋友

有啲怕小朋友放咁耐假，會懶左，所以要小朋友keep住學習。。。

而我哋呢，因為小檬學校暑期時間唔長，

都係三星期左右，暑期都仲會keep住平時嘅興趣班，

所以我都唔太一定要佢上啲咩班，不過都會睇吓有冇野啱。

於是我哋一貫例遲，到家都未有啲咩安排！哈～

上星期落樓下八下啲教育中心（咁搵錢，梗有一間喺左近！），

住咁耐我都係第一次落去～

真係學咩都有。。。小廚師／爵士舞／非洲鼓／手工班／普通話／chit chat eng／

3D手工。。。布偶班／英文班。。。音樂跳豆。。。真係咩都有！

睇完咁多唔同。。。首先刪除咗學術，返學已經學到學夠，

唔好要小朋友放暑假都學，況且佢學校教得好好，佢又學得好好，

唔知樓下啲師資點，都怕學壞手勢（唔係話佢地唔好，係我冇去了解咋！！）

另一間猴子應該都好，不過唔問唔知道，

原本喺度學英文收費唔平！！

況且小檬英文應該OK，唔需要讀

其他非洲鼓。。音樂方面又話冇咩興趣。。。跳舞又話唔鍾意。。。

唯一有興趣就係話小廚師，

不過要再了解吓適合幾多歲小朋友學先得。

(以上只係小檬情況，個個小朋友需要唔同，亦冇話錯對)

有時行過見到啲鋪頭宣傳海報多，好似覺得係咪一定要報，

見到人哋報唔報又好似唔安落，

其實每個小朋友每個家庭情況都唔同，好多野非絕對，亦非必要

最緊要適合小朋友, 小朋友開心家長又安心～

跆拳道升級試 (黃綠帶）

兩個星期前又收到跆拳道呀sir嘅考帶信，

好似啱啱先考完黃帶冇幾耐又咁快考？？！！

呀sir預先錄咗段片比我哋同小朋友練習，

叫咗小檬好多次佢都話唔使，自己識哂。

開始大個，要俾佢知道有啲野佢自己要上心，要緊張。
如果佢真係唔使練習都識哂，就恭喜佢，叻仔。

如果唔係，考唔到，都係一個好好嘅失敗經歷，等佢上吓寶貴嘅一課。

到考試當日朝早，我又再開一次段片俾佢睇，
好平心靜氣問佢最後一次，我再講佢知

1）如果你而家唔練習，到時候考試唔識，其他小朋友有練習識哂就考到帶，
可以一齊轉帶，你就自己一個考唔到，唔開心
 2）而家練習一吓，盡自己能力，同其他小朋友一齊考到帶，一齊開心！
考唔到自己都盡咗力，唔使唔開心！

小檬唔使兩秒就話而家練習，呢招果然唔使勞氣乖乖練習。
（不過我諗唔係個個都適合呢招）

 到會場喇~

妹妹豬同哥哥打吓氣先, yeah!!  

準備

 妹妹同哥哥難捨難離

 師公訓話一輪後，就開始考試。   

第一次都又喺門口裝吓佢，今次已經唔會。。哈哈

我哋離開會場之後就上咗去圖書館。妹妹豬第一次到圖書館，
開始識睇書，周圍攞書，揀啱之後又坐好睇，

初頭都可以定定地靜靜地睇。。

不過到後來睇到開心都會笑或者講野

都擔心俾人話。於是快手借啲書就走人。   

終於等到哥哥考完試!!!!

入到會場，急急腳去搵小檬，
又好似戰後失散重逢一樣，好開心
比咗個簡單擁抱之後就企返喺到聽呀師公講野

師公叫啲小朋友考完試要自己睇吓手冊嘅成績，
唔好人比咩你都唔知。
有啲小朋友開始睇雖然唔知道佢地識唔識，
不過小檬郁都冇郁。。??

有啲傑出獎牌頒咗之後，就解散。
一睇手冊上面嘅result，
pass 冇剔, fail 都冇剔

吓？咁即係唔pass？？？ 考唔到？？？
唔通就係咁小檬知道自己唔得就唔想再揭嚟睇？？

檬爸拖住妹妹豬係後面應該未知我心裡面咁多疑惑。

我拖住小檬去搵其中嘅助教
問。。。手冊上面冇剔pass係咪即係唔pass呀？

助教話: 吓，唔會唔pass果喎！！
吓。。咁嘅咩
（咁嘅咩係我深圳同事明句，話親佢做錯野就話"咁嘅咩?！"）

助教好快去剔返俾返手冊我哋 PASS~  

希望小檬唔識聽咩叫"唔會唔pass果喎"呢句，
如果唔係第時仲唔肯練習！

 一家人當然都到齊恭喜小檬哥哥啦!!

妹妹豬好似知道發生咩事咁好開心咁同哥哥影相

兩個又喺笑到攬埋一舊

  

 妹妹豬幾o爹哥哥

 點解突然間扁咀？

咪就係因為媽咪想同哥哥單獨合照，

妹妹知道冇份就扁咀仔喇

小檬哥哥好擔心妹妹唔開心，喺咁望住佢氹佢

so sweet~ 

 突然變咗o錫媽咪

成功合照喇！！！小檬小檬叻叻豬~ 

其實我都唔知係咪真係個個都會一定考到，

不過總算係一啲考試嘅經歷，

順利過關,我都當係小檬叻叻架喇  

尋日上堂頒帶喇～

歡迎黃綠帶小檬！ 

多多指教!!!

跆拳道升級試（黃帶）