happy friday ~

Happy Friday~

  媽媽放假, 可以去街街喇!!(其實係媽媽想去)

而家同佢出街都好多唔識嘅人問我地
佢幾大呀。。。佢好多頭髮喎。。。佢好得意呀。。。佢成日笑呀。。

媽媽一講佢就停唔到口，哈哈。。

每次去faces，啲化妝品姐姐都同佢玩，有人對住佢笑，佢又會即刻笑，氹到啲姐姐鬼咁開心，

有次仲幾個牌子嘅姐姐都走埋一齊停頓哂咁同佢玩, 佢又爛玩，玩到kit kit 聲，

人地同我講啲護膚品點好點用，佢就眼定定咁望住人，
攪到人地笑到都唔知點講落去

同佢出街，都有啲著數架，有次喺茶餐廳氹咗啲姨姨比碟菜婆婆，
麵包佬又話送麵包佢食，
媽媽又有啲sample 試吓，

而家細細個已經幫輕吓我地，

乖乖, 辛苦哂！

第一次BBQ

上星期同小檬嘅舅父預早慶祝生日，
自從大肚生左小檬之後，差不多就嚟兩年都未BBQ過，
我地屋苑會所有BBQ場，喺平台對住青馬大橋，景色怡人，

又乾淨，所以搬左嚟之後，BBQ就去我到！

小檬第一次BBQ呀。

(媽媽，咁都算呀？我冇燒架喎...)

佢其實只係坐喺度，週圍望，
而以前BBQ都好熱烈嘅我，今次就齋睇住佢，等人奉獻。

仲有表舅父地喺買嚟嘅靚靚 LGB cake

Happy Birthday to Kau Fu! 

之後玩得太累，我地傾傾吓佢就喺我膊頭瞓著左，佢真係乖，唔會扭眼瞓第二朝，
拿拿淋捉佢沖涼，大個仔左，試吓咁沖得唔得先。。。媽媽懶˜˜˜˜

 

呢期行可愛路線, 得唔得呀?

小檬扮可愛！

呢期小檬扮可愛！

(呢張相係我單手抱住佢影架，仲要冇手震，狂影佢之後，
我嘅技術真係好左好多, 自我鼓勵！)

其實係我諗小檬就快出牙仔喇，
佢已經牙痕咗好耐，好多口水，
呢排仲成日申脷，頂啲牙肉！

應該係出上面果啲先，好緊張呀~~~

唔知有牙仔牙嘅小檬係點嘅呢?!

無時停仔仔@6M- 訖pat pat

睇吓啲BB嘅大概發展先：

嬰兒翻身4～6個月左右

嬰兒學坐6～8個月左右

嬰兒學爬8～9個月左右

嬰兒學企8～10個月左右

(don't worry...個個小B都唔同)

 

檬檬嘅發展係:

 

4M5D   就識轉身

    

5M       想想地爬，個patpat訖吓訖吓，但都係未識向前, 見好多BB都係識向後爬先識向爬前，同埋識坐後先識爬，但小檬跳左steps…

6M       識爬佢經已爬到跳hip hop，而家已經爬得好快!6M14D 訖PatPat

       

真係快,我都冇諗過咁快,上星期尾仲係咁訖PatPat，訖到不之幾咁高!!

我真係好想知係咪個個B都會咁架???????? 佢練習緊啲咩肌肉呢？

識爬就要更加睇實佢，事關我都未咁快預備佢識爬，啲電線仲未安排好，
而佢，就成地玩具啲唔玩，爬出地墊走去玩啲電線呀，凳腳呀，combi個轆呀，風扇呀。。。。
入廚房真係一分鐘就要出返嚟，唔係佢又已經唔知去左玩咩。

唔比佢玩，打佢手仔，都唔驚，喊一吓，又玩過！
抱返佢去地墊，佢自己又記得去返電線位!

婆婆話而家要看牛咁看喇~

要快啲攪好啲家居安全喇...

 

打針針

小檬未出世時，我地都諗住同佢去私家診所打針，因為驚健康院太多人，又等得耐，
不過我大肚果時去過，都唔算好多，又諗，點解唔享受一吓政府嘅服務呢？所以都係決定返健康院打針。

每一次打針啲姑娘so far都好好，可能我果度唔多B6，每次打完針都會比定退燒藥水你旁身。
每次都問下媽媽食奶嘅情況, 有冇問題呀，(雖然答案有啲流) 都會教吓你BB另一階段要注意嘅地方，都好好!

跟進BB都算可以啦，姑娘都會睇吓BB發展有冇問題，識轉身未呀，識坐未呀，
識自己去拎玩具未呀（佢都未拎到出嚟小檬快到已經去搶同放入口喇）

不過度高唔係次次度，我冇記錯小檬到2歲先再度，
真係好笑，咁點睇住BB發展嘅進度？
佢2歲都唔高我唔會唔知囉！

至於我地遲左起步嘅輪狀病毒口服疫苗(懶惰爸爸媽媽, 其實應該兩個月開始)
我地都有比佢食，果時都猶豫左一陣，諗緊需唔需要, 唔係錢嘅問題

因為有啲話食左都會中，不過唔食中嘅機會大啲！
所以，最後都比佢食啦!
$1450/3劑
(有啲診所食兩劑)

我地4個月先食第一次，不過醫生話OK，
都可以嘅。。。4個月, 5個月，6個月 終於食埋最後一劑!

 

醫生話佢食得好叻，雖然佢食到皺晒眉，我地都唔知咩味，

不過佢冇nur返出嚟。
(佢話好多BB唔肯就nur）

仲有隻唔知叫咩嘅針。。。。真係唔記得個名，冇心機揾返
肥仔醫生話遲啲睇吓需唔需要先！ 

打針時間表

Kenwood 碎肉機

星期六有啲啲時間，就試左新野 Kenwood。

南瓜煮熟左都已經淋，所以，真係好快就已經變成蓉。
佢有兩把刀，我只係用左一把，第日攪肉先用兩把

睇返小檬，雖然南瓜好甜，但佢都唔係好願意咁，食到E起哂咀！食左小半碗，

開始頹。。。。
最後仲黯然銷魂，擰埋一邊避我 

哈哈~
等佢試吓唔同食物味道之後，我就將佢混埋落餬仔，佢就食哂
點解唔一開始就混？
我想佢試吓原來食物有唔同味道!
如果唔係大左就仲難接受
(我嘅理論 ~ 哈!)

再嚟試整蘋果，不過太小，唔係好攪得起，之後再用濾網

今次蘋果都唔酸，佢都食得好開心。。。傻檬檬!!



用後感，都好容易用，好快攪到想要嘅野
好安全，容量都足夠。唔算大部，都慳位。外型cyber，靚仔。
唔方便嘅，係我要另一煮煲煮熟啲南瓜先，
的確冇Avent一個攪掂咁快方便，又唔使睇火，
不過整BB food都唔會用好長時間，所以我都係會揀呢個,

慳啲!

奧運熱

尋晚返到婆婆家，見到劉翔整傷左，冇得再比賽，有啲可惜。
以前TBB開始時有得播奧運，都會睇吓，所以氣氛好好多（可能今年我自己嘅氣氛唔夠啫）

但今年又要湊住檬，已經好多野做，真係未睇過一場比賽。

可能小檬知道，等媽媽有啲節目睇吓,
佢喺地墊度玩玩吓，用手同隻腳撐起自己，

好似做緊掌上壓咁!!!

而家佢啲動作真係日日新鮮，
所以我地都要快啲去買門攔先得喇!