Baby G MaMi 飲糖水@ 27W4D

 5/11 到了瑪嘉烈做糖水測試

即係check 吓我有冇妊娠糖尿病，

前一晚12點開始禁食, 8:30 要到醫院，
首先係要空肚抽血，之後姑娘就比一碗糖水我飲，
喺網上的媽媽話啲糖水好好好甜，我同事飲完仲暈暈地，有啲飲完會嘔，
但係如果嘔左出嚟又要再book 過時間再飲過，所以我一定要堅持!

嘩，點解我見人地果啲係用杯，但係呢度成碗嘅？

我用左兩分鐘時間飲哂，連老公預先準備嘅檸檬都唔使用!

（老公驚我飲唔到會嘔，準備左個檸檬帶嚟, 真抵o錫!! 佢話上網見到可以好飲啲，
又唔影響結果喎，不過我都冇去睇係咪真~)

其實糖水有啲似凍檸茶果啲糖水， 不過係超甜，我覺得甜到有啲拿喉!!
飲完又冇說話想嘔，不過空肚飲咁大碗咁甜嘅糖水，真係有啲啲唔係咁好受

飲完之後，要兩個鐘後返去再抽血，由於喺醫院泊車超貴
（第1個鐘＄18， 第2個鍾好似係＄48,每半個鐘要＄24)
所以我地去左附近嘅祖堯邨嘅酒樓飲茶
（其實只係老公飲，因為我唔可以飲水或食野）
老公去泊車我先去搵位，點知撞啱壞冷氣～
 我驚太焗, 所以只係去左茶餐廳等老公食個早餐，
之後就返左車坐，瞓就一陣......

好快就過左兩個鐘，上返去再抽血！！ 

姑娘話如果有問題，一星期之內就會通知我，冇事就唔會打比我架喇!!

上網到見啲case 唔食甜野，好似小雞仔咁嘅食量都有事，
我都有啲驚， 希望唔好收到醫院電話啦, 如果唔係要見營養師就弊喇!!