Gen Mami's Blog

3.16.2016

成長椅 & 子母廁板

如果係屋企食飯，通常都係姐姐或者婆婆先同妹妹食飯，

攪掂佢, 我哋先開始食。

到而家妹妹豬大咗啲，

我有啲想佢可以多啲黐住我們一齊食。

咁啱有好朋友大肚，於是決定要用緊嘅high chair 退役轉送俾佢，

買咗呢張high chair

呢張凳調校唔同高度，可以由BB坐到大人

（不過BB stage好似好危險？！）

其實都有塊板可以放前面食飯

我就唔使用

想妹妹豬直接喺檯食。

妹妹都學緊用筷子

再買多塊墊可以坐得舒服啲

個設計要有條安全帶先可以綁住個墊，

所以我求其攝住佢算

不過呢張凳冇安全帶，有我呢妹都唔肯扣，

唯有不停教育唔可以自己落嚟，要落就叫大人。

腳仔果個位有條木可以晾腳。高低可以自己調校

妹妹高咗又可以自己調校另外一個高度

其實俾想像中大少少，不過都OK嘅。

終於一齊食吓野喇。。。

至於小檬方面，而家坐緊我張可以升高少少嘅電腦凳

高度啱啱好，遲吓就應該可以坐大人凳，唔另外再買喇！

呢張咁靚凳喺邊到買？就係偉大嘅TB喇~

成長椅

RMB $732. (包郵)

其實初頭唔包架。。只係老闆攪錯咗，

後來佢都冇收返我，叫我幫佢寫啲好評！！哈哈

如果大家想買，可以試吓話我介紹

睇吓老闆肯唔肯再包郵啦~

我買咗先知原來有另一張先係日本正品！！

不過呢張價錢啱，貨質量OK，所以都好滿意！

整開又整，終於整咗呢個子母廁板。

@一田 $250 ( 咁上下 ? )

之前喺TB買過一個，不過啲窿位唔啱。

放棄咗，見到呢個應該得，

買返嚟再試，終於攪掂。

大人嘅廁板就有油壓慢慢落

小朋友嘅就冇喇

有個攝石攝住唔好秩落嚟

以後唔使再放小童墊喇，廁所唔用咁多雜物！

而個小童廁所呢，小檬都唔知道有冇用過一次半次，

不過好快又到訓練妹妹如廁

點都應該要keep，

如果兩個一齊poo poo 都起碼有個細嘅頂住吓先！

妹妹豬Last Interview 後感

妹妹豬Last interview, 背後媽咪所背負嘅係沈重壓力

過年見好多親戚朋友，開始問關於妹妹讀書嘅問題：

妹妹豬唔係讀緊書咩？==>唔係，啱啱兩歲之嘛 =_=

係咪讀返呀哥果間？？==> 我都想，不過要interview之後先知收唔收 =__=

唔係呀哥讀緊，就收嘅咩？？==>唔係，如果係我就唔使咁惆悵=___=

(不過學校話如果同分會有優先)

呀哥喺到，應該實收啦！？==>無呢個理論/規定嘅，學校只係睇小朋友=____=

身邊人尤其冇小朋友或者係長輩
唔會諗到而家小朋友讀書係咁麻煩

（唔同之前個世界,朋友話幼稚園都未算，到小學先知！）

而且眼見妹妹豬之前咁多個面試雖然不過不失，
不過成績都唔太理想，
到而家為止，
妹妹豬都只係得一個offer
其他全部waiting，
開始擔心佢點應付呢個面試。
（其實係我點應付=_="）

一齊讀同一間，唔好計呢間學校好唔好，

返學放學時間／放假日期／學校活動日一樣，
照顧方面，返工請假方面，一定方便好多

突然都有諗, 早之唔好入間咁難
做跟尾嘅（佢呀媽）咪唔使咁辛苦！！哈哈

我亦冷靜落嚟，小檬適合呢間學校，所以佢學得好開心。
始終兩個小朋友係兩個獨立個體，唔應該放埋一齊諗。
如果妹妹豬唔適合呢間學校，可能佢會好辛苦，
所以盡咗力，睇吓學校揀唔揀佢，或者佢揀唔揀呢間讀！
口雖然咁講，心又盡力想妹妹考到
因真心覺得呢間學校好好。好好。。

自己開始視覺失調@@

呢個月做咩，安排咩，都先諗妹妹豬嘅呢個interview

排流感嚴重，interview之前兩星期，

唔敢到太多人地方，亦冇約朋友

開始閉關

又不能困住太耐，又要都公園走走

見小小凍，即刻著衫，超級小心保護呢個小baby

絕對不能生病

不停教吓interview內容，但又不能太過pushing。。

不停講吓要點做，但又不能長氣。。。

interview 之前一晚
佢媽咪我，雖然好早瞓落床，

但係都瞓得唔好，唔知係咪真係緊張呢？

冚住晒被又熱，唔冚就凍，成晚郁嚟郁去
醒吓，
又轉嚟轉去，
瞓返。

如是者好快就到天光,未夠鐘就彈起身

快手快腳攪掂好晒自己梳洗化妝換衫，

準備妹妹豬起身，雖然有姐姐幫手，
不過都盡量親力親為幫佢換片換衫衫，

唔想有任何令佢唔鍾意嘅事情發生，
即係話就晒佢（一日咁多）

當你為咗佢，做咗咁多功夫，
而最後見到佢interview超水準表現，
相信唔難理解
點解我內心的激動淘湧而上
眼淚不受控制,有如缺堤之水
奪眶而出~

3.15.2016

妹妹豬N班大作戰~Last but not least Interview

妹妹豬最後一間N班interview
亦係小檬哥哥讀緊嘅呢間
媽咪壓力之大，可想而之。。。

妹妹豬一起身，心情算好靚，妹妹豬一著好衫就話返學，

面試時間係早上十點半，時間好好
其實起身食完早餐出去就啱啱好，
不過如果好平靜咁去in我怕妹妹豬又怕陌生唔講野。。。
於是要佢開心吓，諗樣令佢hyper啲嘅活動開佢個早晨
～食麥當當。

食完食麥當當心情靚靚之後
去到時間啱啱好，登記之後就入校園等，
一如以往，入去之前不停洗腦，
見到老師要叫早晨，
老師問問題要答，
叫佢出去拍拍/做要出。
見到校長叫校長，
媽咪忙緊做野，自己要乖乖睇書，唔準行開
雙手俾問卷校長......

好多小朋友玩緊滑梯，我冇俾佢玩，都係講吓壁佈板上面勞作。
今次有啲凳安排喺壁佈板下俾家長坐，所以好難咁近咁講，
唔係咁好意思喺人哋面前企咁耐,唯有再行吓

見到兩個普通話老師話我好熟面口，又要用僅有嘅打結普通話
同老師講話都係到哥哥讀緊，
而家妹妹嚟面試，我抱起妹妹叫佢同老師打招呼
妹妹豬居然笠水。。。唔出聲，撲喺我膊頭 =___=
我心涼咗一大截，喺屋企已經認得呢兩個老師怎至叫咩名，
點解見到真人會唔出聲兼怕醜？
今日就係要出聲，咁樣一陣點算???點撬個口都唔開，
老師話好多小朋友都會咁，

一陣面試唔喊就得（我心諗有冇咁容易入？）
同老師吹咗一陣之後就走人。。

睇咗一陣書，呢個妹妹豬見有個小朋友行埋嚟又投訴咗一吓，
見未爆發衝突就拖佢走

好快就叫我哋名，拿拿臨就去排隊。
(今次唔使等上次咁耐，好快有得入，完全唔使用糖糖)

part 1 英文 group in
老師要求小朋友取指定嘅水果俾紙版公仔~男仔或者女仔食。
一入呢間房，我就好開心，我諗妹妹豬都係，
因為教哥哥嘅英文老師同興趣班外籍男老師都喺到，
兩個熟悉嘅面孔應該令我哋兩個都定啲,
已經唔似interview，好似平時返學校啲活動咁

外籍男老師，講出指令，第一個小朋友唔肯出。。。
個pat pat黐喺張凳上面，
爸爸不停講不停推佢都唔出，
老師叫爸爸陪佢，佢先肯出，勉強都肯做。

第二個叫妹妹豬，一樣唔肯出"___"
擰轉個頭一副委屈家嫂樣
叫"媽咪"

老師望住我同我講可以陪佢一齊出，
其實我只喺行緊
佢自己已經行咗出去
自己揀咗蘋果放入男仔口。
(因有朋友第一日In咗，知道有呢個項目，
所以喺屋企練習過一吓，佢唔肯入男仔到架，
C都話要俾女仔食,，好在今次都叫完成到, 真係抹一抹冷汗)

其他小朋友都唔太順利，一個都係要媽媽一齊，
另一個就喊，唔肯出。
(隔離果個小朋友爸爸見自己完成, 就叫個女同妹妹豬say hi
um...我想講人哋老師仲同其他小朋友in緊，
點解叫個女同其他人傾計？
你可唔可以尊重一吓老師呢？我冇即時出聲，
過一吓我同妹妹豬講留心老師講咩)

當in完水果之後就唱bye bye song，
妹妹豬隻手冇咩揮動，我亦有推一推，
clap my hand同step the feet嘅時候就有做,不過動作好細
跟住老師就拜拜小朋友，
到妹妹豬時，手仔bye完之後
佢居然走埋去攬攬男老師，男老師好驚訝, 好開心!
哈哈，我真係估佢唔到!
行出去就再攬攬英文Miss!
Miss 話佢 "u'r so cute !! "

Part 2 中文individual in

之前嘅經驗係我自己揀檯坐，我見到三個認識嘅老師，
諗住揀其中一個坐落去，

錯～唔係我揀，係安排!!
(我估之前係我揀因為果時係新仔)

安排咗我去其中一張檯。
一個唔認識嘅老師(應該其他分校)
我諗係因為要公平, 避免同校老師面試。
都啱嘅，有實力係唔需要怕 (wakaka其實冇)

呢位老師好溫柔咁問妹妹豬叫咩名，妹妹豬亦好溫柔咁回答，
我都差不多聽唔到佢講，不過好過唔講嘅
再指住面試相問呢個邊個嚟，
都有答, 雖然細聲d , 我諗老師都聽到佢講呱

跟住物品，手偶公仔小花想要牙刷／筆／毛巾，
妹妹豬全部拎到（果刻我仲諗三樣佢記唔記得曬呀？）
仲唔係俾老師，係俾小花添！（叻）
跟住老師話小花話個咀污jo咗，用咩抹呀？

妹妹豬用手巾幫佢抹咀。
老師再問呢條咩嚟呀？
妹妹豬答"唔知"（哈哈）

老師教返佢叫毛巾。
拎住水杯問呢個咩嚟？杯杯。
呢支咩嚟呀？？畫畫！
老師話係喎，筆筆畫畫喎

呢個呢？刷牙, 妹妹豬想講係用嚟刷牙,
老師可能以為佢調轉咗讀
（不過識刷牙已經叻叻）

仲叫妹妹幫小花刷牙，妹妹豬就幫小花刷刷刷。。

老師mark分就叫妹妹睇書，問佢見到咩野？
佢答rabbit，另一隻呢？elephant
(但點解用晒英文答？)

好快就完成，老師提妹妹豬推凳，
妹妹豬呢方面做得好好，
唔使提都會主動推
仲推埋我果張添，老師都有讚佢！

part 3 媽咪填問卷
我用咗大約5分鐘完成，妹妹豬真係坐定定乖乖自己睇書。
等校長嚟嘅時候，有少少冇耐性想企起身，
不過個pat pat都係黐住張凳。

最後好有禮貌咁少少鞠躬. 用雙手交問券俾校長
講"校長"
eye contact就差咗啲，不過我提返佢就望眼睛講多次
接過禮物講 "thank you"就完成！

出門口之後，好似小檬In完果時咁，啲眼淚又開始失控。。
終於完成喇。。仲要係算好滿意嘅完成！
唔知喊啲咩。。總之就好激動

出到嚟緊係讚吓妹妹豬啦！！
（雖然喺入面已經都不停咁讚佢）
有跟指令做，肯開口，有問有答，有推凳，肯坐定定，
有雙手交問券，仲送多個擁抱俾老師，
媽咪真係覺得佢超額完成！！

買定個Elza諗住如果佢喺入面唔合作用嚟氹吓佢，
完全唔使用
IN就梗係送俾佢獎勵佢啦！！

呢間學校競爭咁大，雖然in得算好，都唔可以諗住一定得，
不過點都好，妹妹豬已經係媽咪心目中嘅100分叻豬！！
心情仍然滾動中!!!!

3.09.2016

me is go to space

小檬的功課有啲聯線部分，

老師除咗比剔之外，如果畫得好，仲會俾啲comment，

好似 wow ~ good job !

wow ~ great work! 之類

由於呢頁係喺學校做，所以一定出自小檬手，

絕對唔會有我哋幫手。

不過就算喺屋企我哋亦唔會幫佢手，一定等佢一手一腳，

唔係習慣咗我哋會幫手就麻煩

檬爸每次見到佢做得好老師有comments果啲，

都好欣賞，好驚訝小檬畫得咁好

我反而覺得係咪個個都係咁架？

唔好大驚小怪，永遠覺得自己個仔就好叻先得。。。

曾經有諗過問下啲同學仔，不過最後都冇，

因為個個發展唔同，唔需要比較，老師覺得靚，俾咗讚賞就得！

啱啱喺＄12店買咗本遊戲書俾小檬，

有日佢自己畫完，就自己寫咗個good job比自己

so cute!

=D =D =D

油埋顏色之後,仲問我哋rocket 點串

跟住自己寫 rocket 同 me is go to space

雖然語法錯咗，不過至少佢肯嘗試，

佢肯主動問同寫出嚟，我已經覺得佢好叻！！

小檬真係一個好積極，好正面！！

懂得自我鼓勵嘅小朋友~

3.07.2016

小檬。K1觀課

暫吓眼K1又到下學期，同舊年一樣，都係下半年先觀課。

小檬之前兩日已經不停講有啲小朋友爸爸媽媽喺堂上觀課，
佢叫我哋星期五兩個一齊嚟，我諗佢都應該好期待

一於以往，參加學校都可以睇到佢地做早操，
個個小朋友都好開心，除咗小朋友有做之外，所有老師都會一齊做，
做老師都要好好記熟舞步，真唔簡單！
唔知點解，每次睇佢地做體操同唱校歌，都好感動，

當了媽咪之後，就更加感性。

返到課室，只安排咗觀課家長嘅小朋友上堂，其他就喺出面玩。
首先係中文堂，已經聽咗半年普通話嘅小檬同其他小朋友一樣，
上中文堂已經全部識聽，完全明白老師嘅指令。
老師問問題，好多小朋友都好積極舉手回答，
除咗少數一兩位小朋友，包括小檬！！

記得第一日返K1見到小檬好積極回答，以為一路都係咁，
但點解今日會咁？再望吓佢，居然呆！！
唔通眼瞓？啱啱返學咋喎？！？！
雖然佢冇舉手，不過都有留心老師嘅說話，唔會淨係掛住望我哋，
而我哋亦冇刻意望住佢，靜靜咁觀課。

過咗一陣佢好似醒返啲（可能頭先發緊夢！）
亦有舉手回答問題。
回答已經是一句句子
"春天到，我看見青蛙！"
發音正確，怪不之他可以在聖誕表演上當上小司儀。

跟住的英文堂Letterland，一年N班半年K1，
小朋友上英文堂已經識聽識講
完全沒有難度，從小朋友嘅興奮情度睇得出，
佢地真係好鍾意letterland。

見到小朋友嘅投入開心笑臉，
真係好開心佢地可以咁愉快咁學習！
唔怪之小檬每日都會同我報告上letterland嘅情況，
上鍾意嘅英文堂，又已經醒返，
小檬好積極咁舉手答問題，
絕對唔會因為有我哋啲家長而怕醜
（呢間學校訓練小朋友自己係有一手）

跟住嘅遊戲，小朋友分開兩組比賽，家長同小朋友玩同睇都好開心！

之後再返課室完成最後一part，
小檬手持字咭，一讀數字到相應嘅詞語時，小檬反應超快咁走出去貼好！

觀課之後，校長家長們分享返感受，
有問題可以提出討論。

大家家長會分享一吓小朋友學習情況或者屋企情況，

成長問題都可以分享討論吓

觀課之後感：

聽埋啲家長分享之後，小檬同呢班小朋友真係好鍾意返學，
返學真係令佢地好開心
我就更加開心佢地可以係一個咁開心嘅學習環境裡面
學到對佢地有用嘅知識，
而老師亦俾好多空間等佢地自己去尋找答案，
提升佢地學習嘅興趣，學習係終身嘅，
如果要死記，死塞，學習係唔長久嘅！
happy learning真係好重要~

分享完之後食個茶餐就接埋放學，繼續happy learning!!