細心記下Baby G 的。。。 1

BB真係大得好快，大個咗個樣又會變.

所以雖然好累，都要多啲望吓佢，影吓佢個樣，好好記住!

Baby G一對眼都好大，似乎似爸爸多啲，因為我對眼好似圓啲.
而家睇好似係單眼皮，但其實細心睇係內雙，有人話之後大個會睇到多啲!

佢對黑眼珠，佔左大半.....!



佢啲眼睫毛長到呢。。。。。仲要係孿孿㗎，真係羨慕死我喇
(雖然我都長，但係唔夠孿！)

尋日去健康院，比兒科醫生讚佢啲皮膚好靚，
我冇諗過會比人讚，好開心！！

(如果係我仲開心)
醫生話佢皮膚白白，又冇咩粒粒，(其實都有一粒半粒)
佢話好多BB都會有油脂粒, 自己會退!

其實我大肚時都有介口，盡量盡量冇食啲有毒嘅食物，
不過一舊燒鵝。一兩隻蝦，蝦餃我都有食，唔係介得咁清。
我覺得BB天生係點就點,不過我做到嘅都盡力去做!
唔想有問題先怪自己!

懷孕後期我冇特別食好多人都有食嘅白蓮鬚清胎毒，
我問過中/西醫都話冇咩清胎毒, 其實民間智慧都可一試,不過我懶...
只係食吓腐竹白果糖水。。芝麻餬。。。杏仁糊／茶。。。

我同事聽護士長朋友講話食多啲杏仁皮膚會白凈啲！！
所以我就買左有機杏仁粉，加入媽媽奶裡面飲
(有機安全啲)
同埋杏仁好似有小毒,唔可以食太多，
不過我跟包裝上嘅份量應該冇問題，所以大家要問清楚!

待續...