Baby G 生產回憶 1

預產期是1月30日(初八)的我，已經問好醫生，
假如到時仍未有跡象，便要再約催生期

其實也有少許心急， 因足月便希望可快些見到BB！
亦可快些擺脫那些懷孕晚期的不適， 如腰兩則寃痛，
手腕根漲痛，手水腫，手指不能屈埋等等

（我知道其實baby G 已經算錫我）

原來Baby G也不想催生. 趕在初四早上作動！

初四那天有很多節目，老公中午要到老闆家拜年兼打牌
而我哥哥公司就安排在晚上一家人吃開巿飯！
誰不知給baby G 殺一個措手不及....

早上8：50

仍未睡醒之際，突然感覺到有一股暖水湧出，
直覺是穿水， 於是立刻叫醒在旁的老公，
再用紙巾看看有否見紅,已經抹到粉紅色,
之後叫老公幫我找孕婦衛生巾, 但後來才發現原來我根本冇買！
哈！因知道仁安的媽咪包已包括....於是用平時的衛生用品。
由於不可以沖涼洗頭， 我們便開始梳洗準備出門口，
情況比我想像中平靜， 只好像平時返工遲了起身的那樣行動快些少~

(但其實蠢咗,應該要吃早餐!)

去到仁安醫院是大約9點多，首先姑娘幫我檢查是否真的穿水，
 我都好肯定, 因不是少少的滲出！

老公另一方面就幫我辦入院手續.

確定之後，姑娘給我穿上醫院袍，換上孕婦衛生巾及網衭， 
我便送到待產房,睡在床上的我跟平時沒什麼特別感覺，

姑娘知我沒有吃早餐， 便叫老公買杯飲品給我，
才駁check BB心跳機同子官收縮機

過左一陣，吳醫生就到咗來睇我嘅情況，只開咗一度，
醫生問我想唔想快啲，於是決定落藥令子宮收縮快些 ！
check 官頸度數時真係好痛，果穜痛係冇辦法形容！
我覺得呢種痛仲腰心腰肺 

我痛到捉住醫生隻手， 係甘叫唔好唔好唔好唔好唔好唔好唔好唔好唔好唔好......
等我抖陣先，我仲不自仲扭住姑娘隻手指！
(之前睇過BK話有個案Mami 仲痛到扯住吳醫生條呔添!)

跟住姑娘同我講如果我需要聞笑氣就係側邊, 佢教我要喺有少少痛嘅時候，
已經開始要聞，要大啖大啖咁吸

如果痛得犀利，仲可以打止痛針，有四個鐘頭效力， 
但要過20分鐘先覺有效。

之後嘅片段都係迷迷糊糊咁有記憶,好多實際時間已經斷片!

進入呢間待產室時間好似係10點多，整頓好之後好似已經12點㡬,
初時嘅痛係可以接受的， 所以我都堅持唔吸笑氣住,
因聽人講到時迷迷糊糊仲唔識用力生！
不過好在我即刻問姑娘，佢叫我唔使擔心，有需要就吸，
同打針,唔係點捱咁耐~

佢哋部機會睇住我嘅情況，知道我的官縮及開嘅情度，
 差唔多就唔會比我聞就可以，
叫我千奇咪辛苦自己！

於是乎，整個下午我都是瞓喺床，一有少少感覺到痛就開始吸， 
吸果時有啲似做戲果d道友咁！
吸咗有少少wing 所以唔覺好痛,人就唔係太模糊,都知道我媽咪黎咗!

慢慢痛的感覺更強烈及密，我記得我䦎始要求打止痛針， 打完等20分鐘先有效！
打咗感覺好似好D,  其實都分唔到邊樣嘅效用好D, 我只係知道果一刻有咩就做咩！

我痛嘅情度都箅可以,可能有笑氣同止痛針幫手啦...都冇痛到大叫!

除咗喺張床度痛之外，就係好多急尿嘅感覺， 上床之前只係飲咗杯阿華田，
已經在床上的pan pan去咗一次小便之後,
應該冇咩嘢去，但bb越來越落， 令我有急尿的感覺，
所以姑娘叫我唔好諗！

迷迷糊糊過下過下好似4/5點，只記得就黎痛就吸...情況冇咩大變

又好似見到我媽媽， 我諗當時係6/7 點，
由於佢係心急人，中午畤佢已經嚟過，但只係喺度等， 我叫佢返屋企先，
所以佢呢個時候再黎， 佢問我而家點.....等等問題，
我已經唔太清醒， 仲點有心機答佢！

過咗我諗有2/3個鐘，bb再落d，更加有急大大的感覺， 
反而我覺得呢種感覺仲辛苦!!!
所有下面部位都好似被壓住， 我係咁話來想去大大！
d姑娘話錯覺黎架，唔好諗就得！

第一支止痛針過咗，我又要求打第二支，
之前聽過有人話打咗之後bb都要打返針， 但果在刻真係冇諗呢個問題，
同埋，我要相信醫生！

如是者，痛下聞下瞓下（聞左氣好wing） 到咗差唔多九點幾十點，就話可以入產房！
我記得入去之前見到老公食麥當當，我心諗，乜呢度有麥當當咩？
証明其實我都頗清醒嘅!

(原來我哥哥買黎比佢食嘅)

第一次瞓響床被人推住，情況好似拍戲果隻，望住d燈， 心情比想象之中平靜
去到產房， 已經有一個嬸嬸年紀的助產仕喺度，
當時又唔係話痛得好勁， 只係好似密左好多，呀B壓住咗所有嘢，下面果個位唔知想點！

之後醫生都入埋嚟,大家開始叫我用力，要好長的力， 
但用力時又唔好叫出聲，
試下出力生.....
嘩，大佬，用力嘅時就梗係叫架啦！ 點唔好出聲呢？？
我當然努力配合啦!

瞓喺度果張椅, 有個手抦同腳撐，
助產仕好似叫口號咁叫我, 一有陣痛時利用佢地"手推腳撐推~！"
 我做咗幾次，醫生叫我唔好連個人都移埋前，
 佢話唔夠位接bb架喇！
唉，咁用力就梗會自己都郁埋架啦~
我點顧到咁多呀~
老公喺我身邊不停咁重複助產仕的說話， 叫我加油，
仲同我講我手應該喺手抦上"推"，唔係"拉"，
唔知點解， 我覺得有手抦就係"拉" ...原來錯咗！

如是者，醫生叫我一有陣痛時就用力推， 其實就好似去大大咁，
我已經唔記得推咗幾多次，我估大約七八次，出盡哂力,
醫生話見到個頭髮，我心諗咁快??
我老公裝一裝仲以為係我D毛毛添！
跟住醫生叫我用力d，話BB心跳開始慢...我果刻真係好驚！

我唔知自己咁樣係咪已經係最盡力，成十個鐘頭冇食嘢， 
中間又痛又wing, 我仲係咪可以出更大嘅力？
果一刻想不如而家開刀啦, 我唔想BB有事!
但又知道只爭少少，冇理由甘就放棄，
 醫生話不如用吸盤幫下我，我梗係信醫生啦！
好在個吸盤係透明， 有cyber feel! 唔似係瑪加烈聽講座時見嘅鐡咁恐怖！

於是我用盡所有氣力加上助產仕嘅推肚+吸盤， 在各人嘅打氣喊吶喊聲下...
終於生左Baby G出黎!!!
果一刻真係成個鬆哂!!!!

見到佢成身血， 助產仕即刻放佢晌我心口，問係仔定女， 
我話完仔仔之後就即刻幫佢清理，打Patpat

我平靜落黎，等佢喊，等左幾秒，但好似已經等左好耐, 佢都未喊，
老公果時話，快d喊啦大佬...
呢一刻反而我係最驚！有少少淚光.....
腦裡空白一遍......

終於聽到大喴一聲，真係放下心頭大石！
(做媽媽嘅真係好多嘢擔心)

之後就抱左埋黎幫我地影左張全家福！
我仲勉強有笑容!

跟著我就繼續將胎盤之類排出，清好之後就縫針，
其實幾時剪， 我都唔知，所以剪同聯針我拫本唔覺得痛,
只係下面嘅各部位已經好似唔係自己咁,冇咩感覺！

生完之後，唔知點解我的脈搏跳得超快, 但我好平靜架喎...
醫生話部機係咪壞呀？ 再攞第二部來，都係咁...仲有血色素徧低，
於是醫生要我喺加護病房渡過第一晩!

待續...