Lesson 3 @ Bambini

一個星期話咁快就過。。。

又係返PG時候。

本來諗住雞咳(呢個名詞係婆婆教嘅)咁早就去睇咗duck duck先，
不過到最後放左自己飛機！

今朝小檬瞓到10點先起身，同我地落去食咗個早餐之後，返上嚟已經要出門口！

喺車到叫佢瞓一吓，佢又懶型咁聽住Leslie嘅"想妳"望窗唔瞓。

去到探熱完，洗完手仔就開始，
今次坐低好乖，冇再叫喺出面嘅爸爸！

有6位BB上堂，應該Maximum嘅。

有一位一入到嚟已經喊緊，另一個就久唔久喊吓。。。

中間唱唱吓歌，小檬突然食起手手嚟，呢個係佢眼瞓嘅跡象。。。
跟住我唯有更加用力令佢對Miss講嘅野有興趣！ 

唱遊完，Miss問啲BBs有冇去個fishing，
我心諗，唔係嘛，咁細個點fish呀？
之後佢叫我地幫BBs除咗隻襪仔，同摺好衫袖，褲腳。。。

突然間Miss唔知喺邊到點樣拎咗個魚池仔出嚟

真係估佢唔到！

啲BBs將個撈fai嚟fai去，即係會係小檬同我個頭上出現。
仲要夾住啲水滴緊落嚟

之後有啲BB用手撻啲水水，更加多嘅水花喺面前出現，


撈呀撈，小檬都算乖，淨係用隻手去拎啲fish fish 算好斯文。



所以我可以偷吓雞影吓相


最後有個BB申埋隻腳入去玩添。。佢爸爸禁到禁唔住
（上PG BB時如果唔聽話或者扭計，搗蛋，好似考緊啲家長應該點做好）

玩完喇，抹乾手仔腳仔就break一吓。

今次下半堂，由爸爸試吓。

我喺條罅到裝佢地，
爸爸~摺高啲小檬隻袖啦，咁長佢點髹呀。。
爸爸~扶住個圖畫小檬先髹到架。。。

爸爸~ ~ ~

唉，算啦，我諗你地明見到老公做得唔合心水又出唔到聲音嘅時候，
唯有就係當見唔到啦！

"著"一聲，就唱Bye bye song 喇!

呢個就係小檬爸同小檬嘅傑作

好明顯，爸爸冇出手幫吓，
啲水草同啲魚係好癡纏咁一舊嘅！