去玩。去顛。Ocean park

@2/6/2013

3月嘅時候，喺海港城有個展覽買海洋公園飛有折，$280/pc
6月底前去，當時諗都好
4/5月天氣冇咁熱，可以去吖！

點知，自4月頭請假落雨開始，每個星期六日都係落雨，
直至上星期六先陽光普照,所以唯有熱爆都要去！大家應該仲記得呀檬唔鍾意戴帽，但太曬喇，
所以我一定要佢戴, 喺屋企準備時一戴上之後,  我就讚佢好靚仔，好有型
仲同佢去照鏡，佢就肯戴，
頂帽趺咗仲要我哋幫佢戴返添！
揸車都好快就到，一去到大門，梗係影返張相留念啦，
係小檬第一次嚟海洋公園喎！我地一拎相機出嚟就有位海洋公園哥哥走出嚟幫我地影。。。。

之後仲變魔術咁變一咗架相機幫我地影，
影完就即刻哂埋出嚟比我地買。。。佢影得都OK，又見小檬第一次嚟
就買咗。。。

呢啲錢唔知道點解會乖乖奉獻。另一張整咗啲特別效果，有隻鸚鵡嘅

$168 2pcs 

我拎錢果時好爽，冇猶疑嘅, 而家覺得好貴


不過有埋框...其實都OK吖(自我安慰)

行入一啲，就有另一景點，又影



咁靚嘅景，梗有影相哥哥出嚟賺錢啦!今次買呢張因為小檬笑得咁開心，真係值得，
其實係哥哥引佢笑得好辛苦架

 
第二站就係睇熊貓喇！小檬不停咁貓貓。。貓貓。。貓貓，真係未停過！


我們唔係好早到，所以睇完熊貓已經要食野。。見到海龍皇餐廳，點知好多人，原來係可以對住個水族館食，唔怪之咁爆啦！
終於去咗大熊貓餐廳，雖然啲價錢好貴(＄98一個湯飯)

但唔代表有heart，飯一舊舊硬到呢。。
老公就叫咗呢個得意熊貓奶黃包比小檬，不過媽媽食哂啲奶黃。。肥肥

飲飽食醉，小檬有啲眼瞓，喺餐廳等佢瞓，
見到熊貓又唔肯瞓，唯有照行啦
到左老大街嘅環迴水世界其實即係旋轉木馬，排隊大約都有20分鐘至30分鐘手抱嬰兒要坐南瓜車，其實小檬都可以坐喺前面我扶住佢，不過都係等佢大啲先，一家人坐一架車。。。

佢已經又熱又眼瞓～ 




玩完又要唞吓，老大街好多懷舊食物，我地喺間涼茶舖有風扇，坐吓涼吓。。小檬見到水樽又兩眼發光～


然後就去搭吊車。我唔係畏高嘅。。。不過我有啲怕搭吊車。唔知道點解，
不過每次都叫自己唔好驚。今次攬住小檬又要顧住佢都好啲嘅，
不過當架吊車喺中間唔郁時我又有啲驚喇。。。
小檬冇驚，仲周圍望，佢都好乖乖咁坐喺到。

過咗山之後，我地就去睇水母，都未去到小檬已經教咗豬喇。
我地冇帶車仔，所以我地就去咗呢間景色一流嘅灣景餐廳比小檬涼住冷氣瞓一陣。

註：啤酒唔係我地嘅，係未有人執檯。

都有瞓左大半個鐘喇。。我地走繼續行程

下一站係冰極天地。
先嚟同企鵝合照，小檬居然驚，唔鍾意。。。另一隻都喺喎。。。

攬到我實一實...

(有一次我喺吉之島拎隻大咀鳥同佢玩佢都唔鍾意, 原來佢真係驚啲大咀巴嘅雀。)

企鵝好快跳入水再游，小檬睇得好入神

坐海洋列車回來之後就周圍影吓相，見到好多用草剪成的動物，每個都影返張相。


下一站係海洋奇觀。

魚魚。。魚魚。。魚魚。。魚魚

其他

玩到呢到差唔多7點3，我地已經筋疲力盡，本來已經想走，
但又話有個水表演7點半有得睇，橫掂都係喇，等埋佢啦。
用水柱做水幕，有兩條激光出兩條龍。。。

而果啲煙火表現，嚇親小檬（點解而家先咁細膽？）佢攬到實都唔敢睇，我地就走人喇～

遲啲都應該會買year pass， 因為湊住B真係冇可能一日可以玩得哂或者行得哂，
今次只係揀咗啲嚟玩
十月或者再嚟啦，因為生日，可以免費嘛～