N班~ 返學1個月報告

返咗學大約一個月喇，小檬情況如何？

首先小檬都持續好鍾意返學，未因為話返學而喊過（咪講）

有啲家長話會有倒退期，好在小檬都未有，

睇嚟佢都好enjoy同習慣咗每日都要返學呢件事

學校

學校website嘅Parents area可以同學校有緊密嘅溝通
每個星期都可以睇到小檬喺學校嘅情況，
同佢一齊睇返佢會好多野講。

知識

返嘅喺N班，從遊戲中學習，
學校教個人字, 已經認得個"人"字，
返嚟喺咁話爸爸係人，媽媽係人，妹妹都係人。
（好在唔係話我地唔係人啫！）

英文已經唔使圖畫已經認得幾個簡單英文生字
 BOY/NOSE/EYE/HAND...

有啲教材喺屋企同佢玩住學，

我地都覺得好好，又可以當係親子遊戲。

每個星期有新教材，同學校同步

(教材價錢都唔貴，又精美）
初頭諗咁多點睇得哂，原來小朋友學野真係好快，

已經睇咗好多本，每本都要重溫，佢都好鍾意睇書，

內容全部都記得一清二楚。

啲認字咭呢，我地就當遊戲玩，爸爸媽媽同佢（或者換婆婆同姐姐）

放哂喺地下鬥快揀啱，玩到爬哂地，好開心。

有時會快過佢，等佢知道唔係一定贏，輸咗都唔可以氣餒，
下一張再贏返，面對現實嘅世界，小朋友學習輸，

其實比每次要贏更重要！

自理能力
老師話VV 佢未有去到，不過唔使心急，始終啱啱開始
（同一位家長講開，佢嘅兒科醫生朋友話
原來好多小朋友肌肉未發展成熟就要學VV，忍得尿多,
尤其係女仔，會好容易有要尿道炎，所以如果小朋友未ready 唔好迫佢地呀)

喺遊樂場自己除鞋仔，著鞋仔OK。
自己放書包，搵自己個位，拍凳全部都做到OK。

唱遊

學校嘅歌仔，小朋友好快就學識，
我地跟佢返學嘅頭幾日已經學識咗兩首，

我而家仲不停咁喺腦裡play緊。
而家連姐姐婆婆都識得唱！

parents area有d小朋友唱兒歌嘅viedo（不過由K2K3小朋友唱）

等家長同小朋友可以喺屋企再聽，
我地學咗又可以同佢一齊睇返一齊又跳又唱！
而家連姐姐婆婆都識得唱！

德育

學校都好著重德育，有本「德育手冊」教小朋友德育
仲有「好行為獎勵計劃」比家長比分，鼓勵小朋友！
而家一曳話會話比老師聽就乖哂，好尊重老師（定怕？）
長期咁會唔會好驚老師？應該要改改？

家校溝通
書包內有文件袋，如有需要老師家長可以寫字條溝通，講吓小朋友情況

老師會打比家長，老師話佢比較被動，講野好細聲，可能仲未同老師熟絡。

手冊上好多分數都有三至四分，兩分居然係禮貌分！
可能小檬到陌生地方都比較怕醜, 唔敢出聲講多謝唔該!

英文老師都有打比我話佢都聽得明佢嘅說話，
就算有啲唔明，用body language 搭夠都明
不過上堂都係比較緊張，冇咩笑容，
老師問我佢喺屋企喺咪咁，
我話佢喺屋企係一個happy boy成日笑，
老師話始終都係啱啱開始，要比啲時間。
（靜雞雞講，老師係NET，啲英文快到呢。。
我都差啲聽唔切，我諗好快小檬啲英文會好過我架喇）

活動:
生日會/綵燈會/家長課程簡介會（教埋家長點教小朋友）

其他

一次未飲哂啲水水就放杯入書包，整到書包濕哂
濕過兩次褲仔(倒瀉水，片片漏)

（貪方便樓下買P牌真係差啲）

著錯學服褲一次（即刻返屋企換返）

去學校接過3次放學

學校送嘅calendar，有學校假期同公眾假期。

每頁又有教德育, 仲有活動貼紙添!!

小檬繼續努力呀!!