N班大作戰~1st Interview

尋晚早少少同佢瞓，好在都合作！

今朝我哋7點15分就起身（平時嘅我應該未反身),

攪掂哂之後就叫佢起身！

佢都未瞓醒，不過都好合作，冇扭喊，

但唔知點解唔肯著件馬仔恤衫，喊哂口好奇怪...好在熨咗兩件！

喺車到食包包，好快就到，已經有七八個家長排緊隊，見d小朋友年紀都差唔多，

可能分年紀In，咁都幾好，同一年紀層比較！

等咗一陣就入得，交返張表比埋錢，再拎住d名嘅sticker 落條樓梯去課室，

爸爸去咗泊車仲未返，佢落樓梯都未係好好叻，

有四排咁多，唯有抱起佢...

幾經辛苦先落到去，貼好名就可以入課室玩住等老師。

其他枱都有一位家長及小朋友。

可以玩枱上玩具，玩咗5分鐘，就有一位老師坐落嚟

我坐喺隔離, Interview 的內容:

老師：小朋友你好，你叫我老師早晨吖

小檬：師，早~晨！

老師：今日邊個同你嚟呀？

小檬：媽媽...爸爸

老師：呢個邊個嚟？（指住我）

小檬：媽媽（唔知點解識叫返媽媽，唔係咪咪）

老師：好叻喎！

老師叫小檬將積木砌好喺塊上！佢一塊一塊咁砌，之後又叫佢拆返出嚟，平面好簡單的

老師：好叻喎！

老師拿出砌木板，有飛機，火車，船，叫小朋友砌返

小檬砌錯一個，不過之後都砌返啱 

老師：好叻喎！

老師問如何推玩具車

小檬推推

老師：好叻喎！

老師送上一張貼紙

我問佢要點呀，佢先話pls ，之後話"橋橋"

老師：好叻喎！

最後問我，平時邊個湊

如果上午班額滿，會否考慮下午班。

In完之後喺操場玩咗一陣d車車，不過佢唔肯用隻腳行，

一上去拎下呔盤就走人！

呢個老師好鼓勵小朋友，每次都會話好叻！

聽聞呢間d程度唔深，校舍唔算大，d老師有d好後生

我相信呢間interview算簡單，佢都算合格，過程中大部份時間我都冇出聲，

只係講咗一兩句提佢，盡量希望係佢自己去面對！

今日表現狀態都唔錯，我都好滿意！

不過就算唔好，我都唔會話佢，因為佢只係一個歲幾嘅BB！

無論如何，媽咪點都會支持你嘅！