朱太婆婆 + 三姑六婆

星期日中午到咗舊鄰居屋企，

以前佢地一家三口就住喺我地屋邨對面，

女女就好似而我家嘅妹妹豬咁大，好得意，好鍾意嚟我地屋企玩，

小檬婆婆就煮埋飯，叫佢嚟食，同妹妹沖埋涼，好似一家人。

雖然搬開咗好耐，我地都成日聯絡，我仲介紹咗呢位妹妹入我公司～

好鍾意同佢地飲茶，因為朱公公好鍾意同啲小朋友玩，

上次帶呀仔去冒險樂園，今次就同妹妹豬行街街，

小檬同姐姐油顏色，我同爸爸兩個先可以有啖安落茶飯。

飲完茶，梗係要幫手看吓鋪啦

不過唔使三秒就要走出去睇玩具！

小朋友最開心就係有人拖住佢地去買玩具～～

之後就上佢地屋企玩吓

玩玩吓比我發現我細個時候嘅豬仔毛公仔！！！

細豬仔可以放入大豬肚裡面

我記得係我大咗就送比妹妹，估唔到佢地仲keep得好好！！！

反而我自己果啲真係冇位扔哂～

朱太婆婆買嘅煮飯凳。小檬之前張積木凳都係朱太婆婆買！

(返屋企先記得影張相)

小朋友開始冇電

。

。

。

休息完

。

。

夜晚食完飯，就上左個親戚屋企

婆婆喺果到打麻雀食飯，

上去接佢順便見吓呢位BB

哇，好重手，真係重過小檬

呢位BB其實係

我爸爸。。嘅爸爸。。嘅妹妹。。嘅仔。。嘅仔。。嘅女。。嘅仔

講多次先~ 

我爸爸嘅爸爸（即爺爺）嘅妹妹（即我姑婆？）嘅仔（即我表伯？）

嘅仔（即我表哥）嘅女（即係咩呀？ ）嘅仔即係咩呀x2  ）

 我呀嫂話係 

"表外姪孫"
 有冇專家知啱唔啱？

簡單嘅我都識啲，不過太複雜真係唔識，好難
而家有啲apps可以幫吓手

個名好正，叫"三姑六婆計算機"
不過太複雜佢都好似唔識計
我都要努力啲上網學吓，唔係都唔知點教啲小朋友!!