B be 初發現 @12/07

@12.07.2013

自從生咗小檬之後，日日都好重覆好忙，都未有時間或者未想去諗究竟會唔會生第二個。其實我自己都有少少猶豫。凡事都係有得有失，多一個經濟負擔重咗，我嘅愛，時間會分多一份比另一個，即係話我嘅時間同愛會少咗比檬？（諗到呢到，有啲唔開心，可能小檬係我第一個嘅B）而家已經忙嘅生活，或者出街已經打仗，想像唔到再多一個會係點。一個已經差不多冇咗自己，再多一個點算？而家冇工人都勉強頂得住，再多一個，冇可能唔請。 

當然多一個亦有好處，小檬有個伴，唔使咁悶，大個咗都有個照應。爸爸媽媽亦唔使淨喺掛住佢，分散吓注意。經濟問題，船到橋頭自然直，自己屋企都唔見得有錢一樣咁大，雖然而家社會唔同，不過，諗得太多人會癲。 

生唔生都纏繞咗好耐，尤其一執小檬啲衫仔呀。。啲用品嘅時候，又會同老公講一次，一個兩個都各有各好，所以我地都好15/16。。。於是就決定交比命運，不設防，睇緣份！ 

開始咗兩三個cycle 都係維持不變三人世界， 上一個月check到雙線，果次好驚可能未準備好，唔知道點好，仲喊咗出嚟，覺得冇得抱小檬喇。。冇得同佢攬住喇。。。好唔捨得, 好似黐咗線咁!! 但係後來係食詐糊，原來綠d過期就會有雙線如果係啲未婚少女實嚇暈咗。。真係激C 

 其實咁hea嘅情度，能中才怪！六月尾皮膚敏感又睇醫生，又食藥，又擒高擒低碌地同小檬影相，到B Be 嚟嘅時候我仲係冇諗過，仲餓住肚攪gathering。。（唔怪之gathering時敏感爆瘡瘡啦, 我仲心諗要見人先嚟爆）到遲咗嚟都好似冇咩為意，我同事又係遲咗,我仲叫佢唔好慳，快啲買支棒棒check添。點知呢頭自己講完就心諗不如自己都check吓，用老公新買綠d一試。。。真係有出現淺雙線, 即刻到藥房再買另一支，結果都是雙線！ 

腦袋一片空白，因我哋係”好冇計劃”咁”計劃”，冇諗過真係一撃即中，緣份真係要黎便黎, 不過冇諗過咁快,我地都好感激上天再賜呢份禮物! 

今日又一次做孕媽媽喇…回想起原來630的Blog blog bb gathering 已經有小B Be的參與了！ 

我教小檬我肚肚有BB喺度，之後再問佢有咩喺到呀？佢就話 “B be”喇 !! 

多謝小檬幫我諗叫佢做“B be”