B be 孕記 @ 9W~ 14W

B be @ 09/08 9W 

呢個星期去checking，原來已經係9W，我仲以為係8W添，今次照B be已經有3cm喇，仲見到佢手仔腳仔郁郁吓添。。。老公同小檬都有陪我去，拖住小檬話比佢聽電視入面果個就係B be喇.

果刻有d感動！ 之後佢再見到又叫B be~

本來諗住喺政府到照oscar，但啱啱睇BK見到有個媽咪嘅case好唔開心。所以都係算啦，喺私家照算喇～ 

呢排同差不多10個朋友同事見過面食過飯，到冇比人發現，可能身型都冇咩改變（都係肥） 睇返上胎好似都幾快見肚，懶嘅關係，仲未搽肚紋油，不過果日已經買咗啲底底同褲，個EE話第二胎會大得快啲，所以要快啲搽定喎。。。 （等我快啲摷返出嚟先，其實上胎啲大肚褲，底底我都有keep好，不過懶摷所以買住小小頂住當，今個星期要積極action唔係就side哂喇。。

B be @ @14/08 10W 

有小檬嘅時候，我有飲安怡媽媽奶，今次都有買，有時同鮮奶隔住飲，不過無論邊隻奶，我都好容易肚屙，雖然唔係好嚴重同唔係次次，不過都好經常會。所以我好似冇咩點肥到，反而仲有唔知道嘅同事話我瘦咗添。 唉。。食野又唔係食得好好，成日頂住，有時又冇胃口，想唔瘦都難，不過為咗B be我都會盡量食！ 

B be @20/08 11W 

唔知係我，掩飾得好吖，定係我嘅身型冇咩點變呢？好多喺我身邊出現嘅朋友及同事都冇發現我大肚， 應該以為我點解個肚腩又肥返少少。 唔知點解反而唔敢比人知。。好似啲少女咁~ 

B be @10/09 14W 

已經14week喇。暫時都唔係好多朋友同事知，今日去咗政府醫院checking，其實前日已經見過一次護士，今日就見醫生。 今日見醫生聽下BB心跳，搵咗一吓，嘈到我都唔係好識聽，醫生話呢個週數正常。其實醫院有部機照吓BB係咪真係負擔唔嚟呢？ 

今次呢位女醫生好好態度，之後就返去健康院喇。到後期先返醫院。 假紙寫11點到2點半。都唔知應該當請上午假定下午假。 

上次喺私家照嘅oscar都已經有結果，係low risk， 感謝！！ 醫生好好，度頸皮之前睇埋B be 啲手手腳腳，仲想話我地知道係妹妹定弟弟，不過B be 好怕羞，交叉住對腳，我轉咗三面都未照到。 

我都唔係好渴求知道，因為仔女都冇所以謂，最緊要健康！ 

對比小檬果時，今次真係冇咁緊張，唔代表我唔緊張B be只係有左小檬分散咗注意力。

14W，我個肚肚好似開始大得好快咁。。。

 當日發現B be時，揾個袋仔入住棒棒叫小檬拎比爸爸，點知道爸爸比返小檬。。。激C我！ 最後連續三次佢先打開嚟睇。。。反應都係問我係咪真架？