小檬22個月喇!!

小檬22個月喇!! 

食

都唔明點解佢都唔算食得小，都有一大半碗飯仔，

又生果又餅餅又奶奶，都仲係唔長肉嘅？

呢排好似拉高咗，仲瘦咗添。。。面都冇咗啲肉。
不過都係健康就得，唔理得咁多，亦唔知點理。

如廁
有一日Poo咗，即刻叫佢坐，等佢知道有關係先，
不過好可惜，比埋絕招I PAD都唔得，
又要叫起身

瞓
OK啦，唱吓歌，R吓R吓就瞓，
不過唔可以比爸爸唱，
爸爸一開口唱
就話”唔好呀，唔好呀。。mime唱呀”
 所以夜晚我都係要比佢挾持住瞓教

有時好夜唔肯瞓，試過一點半，勁貪玩，要扭出廳，
有一晚我地喺房同佢戰鬥咗成個鐘，佢喊足咁耐都唔肯收聲，
終於爸爸屈服同佢出去，喺sofa 坐一陣就已經頂唔住瞓咗，
就係唔肯屈服，咁算唔算硬頸呢？

瞓瞓吓有發開口夢，有時話水水，有時話落地地，有時話唔好唔好。
有時6點幾朦朦朧朧又話R呀。。。
呀仔，我好眼瞓架。 

呢個月好扭計
要果樣唔比就即刻喊，大滴大滴跌落嚟，
有時又叫唔好，
叫佢著衫又唔好，

叫吓入去換片又話唔好，
比啲蛋糕佢食又話唔好，好煩！
大個仔咗真係有自己嘅主意，唔再係任你磋圓禁扁喇。

 不過整體嚟講都算係乖嘅，至少叫佢嘅指令都會跟住做，
叫佢叫人都即刻叫，
食緊野叫佢比佢都會比我地或者其他人
（除咗有一次佢飲緊少少檬檬茶就唔肯比爸爸，
因為每次比爸爸都會飲哂佢，冇得比返佢飲)

講野
 聽得多我地講野，而家自己會講啲我地未教過嘅，
攪掂，嚟喇，出去呀，落地地街街呀，開呀，play 呀， 檸開，冚實，
而家已經唔使教佢發音佢先識講，
佢自己知道領略到就會自己講。
好似有一日佢執好玩具會話”攪掂” 真係好好笑。

爸爸叫外母，佢又跟住叫，
我叫婆婆做”媽媽（高音）”，
佢又跟住叫成日聽嘅歌仔，而家會跟住唱，
不過只係一兩個音，或者每句嘅尾

 What is your name?
 My name 英文 xxx .
(講唔到個is不過媽媽會比佢100分。。。wakaka) 

今個月驚喜：
聽收音機講張智霖嘅名，佢話新生趣，估唔到佢已經記得張智霖嘅名，
我仲以為淨係認得佢嘅樣添！

我地同婆婆講話喺樓下惠康買鮮奶同脆脆，買完先返屋企，
跟住見我地未行又著鞋又執野又呢又路.
佢就心急話”去惠康呀。 買奶奶。脆脆呀” 

識玩小明，上上下下左左右右前前後後。。
火車捐山窿，（說得唔清）
之後係"磨刀"

有一晚我話同佢入去瞓好冇呀。。佢話”好呀，傾計呀”，
因為有時我會氹佢入房瞓話不如入去傾計咯 

識自己由A講到Z呀！雖然中間有d甩漏，有時又快得滯，
聽到三個音(W)又自己喺度笑，
不過冇特別教佢又自己識背， 算係咁
(我諗係佢由細聽ABC聽到而家,聽咗咁耐,所以識背)




 過多兩個月就兩歲喇。。。真係好快好快  
你同B be 都要繼續加油呀！！

爸爸媽媽錫哂你地！